EPESUS 6 - Nanduk Ngget Tul Pidnak Wene

Enabuwa kagolat-net yidnak yidnak kwarurak wene 6:1-9

¹ Li marik marik wa-e. Mondok kwarurak wene-ge yu-o: Kir-e Nagawan Indo ebem woragolar-e, kineid kiniya-nen yidnak yidnak nak kwarogolat wolmer-o.

² ”Keid kiya iri-ge kek tak onposolat wolmin-o” yidnak wene iri-ge mondok nandug-et imiri mbarak pidnak wene urul paga yak ondosolar-e:

³ ”Kek tak onposola-ge, konak nag-et nggweyak ma yu me woralar-e, kuruk mot pem-et woragun-o” luk yij-o.

⁴ Nde, kit ineidtak-nen-e kinlirak insilepma worak tak unpurak pug-o. Are, ndegel onpogolar-e, nggomo ondogolat, Nagawan Indo-nen yidnak wene mirik onpogolat wolmer-o.

⁵ Ndegel unpugwi nap wa-e. Nggweyak ma yu me-n kit-nen ndegel unpugwi nagawan nagawan-nen yidnak yidnak nak kwarogolar-e, kinndi kwiye min konowak lele min-et kwarogolat wolmer-o. Kerisut ndegel ibili nggal-et kinndi mot mor-et ndegel onpogolat wolmer-o.

⁶ It ndegel onpogolar-e, it enalen tak purak pem it-nen yik keneyarok woragola-nen nak kwarurag-e lag-o. Are, an-e Kerisut ndegel oboso-nen yusu-o peragoluk, kit kinndi-net Mbal Pem Nagawan indi-n pidnak irit it ndegel onpogolat wolmer-o.

⁷ Ap ndegel onpogolar-e: ”We ki nap ndegel unpusu-ge lag-o. An-e Mbal Pem Nagawan-et ndegel ubusu-o” peragoluk, kenalen min-et ndegel onpogolat wolmer-o.

⁸ Nde, ndegel unpugwi nap na, wisirik woragwi nap na, it eneyabu konak nak wanidnak ala-ge, Nagawan Indo-nen onggo wok unduwa-o luk kir-e kenaru nar-o.

⁹ Kit nagawan nagawan wa-e. Kit-nen na iri nggal-et ndegel kunpugwi nap inmin-e: ”Kindimin-o” yugwi iri keya ber-o. Kit min ndegel kunpugwi nap min-e Kineid aid arem worasu iri-nen-e ap entare lombonoso bug-o luk kinndi yebet ker-o.

”Mbal Pem Nagawan-nen idnak wim puwokluk yurugwi yerer-o” yidnak wene 6:10-20

¹⁰ Worok tak posolar-e, Nagawan Indo ebem woragolar-e, at amawi kwarat iri bem kenarong worak irit wolmer-o.

¹¹ Sere-nen konmbol pem layekluk kenare posola, mamak puruk, tugup lag-et worabok-nen Mbal Pem Nagawan-nen idnak wim puwokluk yurugwi mende oboksa-t yerer-o.

¹² Nde, nir-e ki nap inmin wim mbatli-ge lag-o. Are, amawi worak oboksa min amawi min nggweyak ma ndamuk yu tena woragwi nagawan min teram woraso amawi worak inndi meya min it iri inmin-et nir-e wim mbatli-o.

¹³ Iri bem-e, kir-e Mbal Pem Nagawan-nen idnak wim puwokluk yurugwi mende oboksa yerer-o. Iri yurugup pem-e, meya mom tarem iri wok yosola-ge, mamak puruk woragolar-e, wim tembesa keya buruk, mondok tugup lag-et woragub-o.

¹⁴ Iri bem-e, kir-e tugup lak mendak wolmer-o. Ndemeret wene-ge tani are nggal kunpugulwak pem ngonoksa yutluk, lud tak nak kwarugwi-ge tagun nggal yutluk,

¹⁵ lambuksa woragwi aid wene iri yil mbururak pem kinndi lid lud tak pidnak iri-ge kunuwok sum nggal yutluk, wolmer-o.

¹⁶ Nde, kinndi angin tubu yidnak iri-ge ndimno tena woraidnak nggal pempa tena wolmer-o. Meya Yoso Nap amare kanduk nggal pidsa-ge kit-nen ndimno iri bem-nen nigirik pugub-o.

¹⁷ Kit kinmiri yurak wene-ge enanggul ndimno nggal wanogolat, Konak Indi-nen wok kindidnak yalawi nggal wanogolar-e, Mbal Pem Nagawan engga irit waner-o.

¹⁸ Wanurug-e, tepan yogolat, Mbal Pem Nagawan emengen mbarogolat wolmer-o. Konak Indi ebem woragolar-e, pempa pempa tepan yogolar-e, kunluk kenlengen kwesa woragolar-e, marak nap pidsa enmanggim-e tepan kundugu kundugu yogolat wolmer-o.

¹⁹ Nanongga an nemende tu kuwarak posola, kura bidnak aid wene na-ge an-nen kwiye lag-et nam tak peyek-nen an namanggim na tepan yogolat wolmer-o.

²⁰ Aid wene waruk mburuwakluk, an-e wirik nibidnak nab-et nde, aid wene na bem o kubu me nibil nggwidnak worasu-o. Iri ala-ge, aid wene na-ge ”Iri nggal kwasa yonog-o” luk yak nirid nggal-et an kwiye lag-et wene iri yek-nen namanggim tepan yogolat wolmer-o.

”Wiwa-o” luk yak indidnak wene 6:21-24

²¹ An-nen kwarusu wene min an worasu wene pidsa kenaru maklug-e, nit nennggam abuwa worak, Nagawan Indo eyabu wanosolat mot mot nak ndegel oboso nap Tikikus-nen yak kuduwa-o.

²² An-e kit kendam ap yu ibil lobok yusu yu-ge nit-nen kwatli wene kenggerak yak kondosolat, kit kinndi yongonosolat makluk ibil lobok yusu irir-o.

²³ Nineid Mbal Pem Nagawan min Nagawan Indo Yesus Kerisut min-nen wok ondoso lambuksa woragwi elem min ap enabuwa kagwi elem min inndi angin tubu yugwi elem min-e nennggamirak oboksa inmin wolmag-o.

²⁴ Nenagawan Indo Yesus Kerisut abuwa kagolar-e, mondok lak yoso buk abuwa iri na bem abuwa kali nap oboksa enpem-e Mbal Pem Nagawan-nen we wok ondoso elem-e it inmin wolmag-o.