EPESUS 4 - Nanduk Ngget Tul Pidnak Wene

Lambuk tak inpidnak nab-e misiger-et nde, we wok indidnak mende-ge nin tak nan tag-o 4:1-16

¹ Iri ala-ge, Nagawan Indo ebem kamat nibidnak nap an-nen kit kenmengen mbarosolar-e: Mbal Pem Nagawan-nen wene mbo konposolar-e: ”Iri nggal kwarogolat wolmer-o” yak kindid iri-ge, iri nggal-et ndak ndak kwarogolat woragup na-e luk kenmengen mbarusu-o

² Kir-e pempa kinndi teberak woragolat, kinndi yanggonag-et woragolat, kinndi luruk puruk woragolat mer-o. Nabuwa kabuwa woragwi na nam tak pogolar-e, yongga yongga wolmer-o.

³ Konak Indi-nen misiget tak kinpidnak iri-ge, lambuk tak kinpidnak elem pem-et kwara tena wolmer-o.

⁴ Nde, Ebe na misiget, Konak Indi na misiget, kit kinndi-ge iri bem mbung mbung tak wolmakluk, wene mbo kinpid na misiget-nen yusu-o.

⁵ Nagawan Indo na misiget, ebem ninndi angin tubu yugwi na misiget, yi mat unpugwi na misiget,

⁶ ab-e ap oboksa Ineid Mbal Pem Nagawan na misiget-net yusu-o. At iri na-ge yi mende ndi mende pidsa ombol pem kek tak woraso Mbal Pem Nagawan yilik, yi mende ndi mende pidsa ebem woralik, yi mende ndi mende pidsa arem woralik yusu-o.

⁷ Alat nde, Mbal Pem Nagawan-nen nenariktak we wok nondosolar-e, Kerisut-nen wok nondoso mende ndak wosa iri na min ndak ndag-et wok nindij-o.

⁸ Iri bem-e, Mbal Pem Nagawan engga bem-nen yosolar-e: ”At teram eid me lasolar-e, kere kamarak woragwi nap wok unpuruk lagaij-o. At-nen-e we wok ondoso mende irit ki nap tembet indij-o” luk yij-o.

⁹ Nde, ”at lagaij-o” yid iri-ge ngge yosolat-nen yij-o? At lagit lak woralar-e, nanduk mbuwagarik, nggweyak yiriwak pem mbij-o.

¹⁰ Nde, mbuwagaid nap iri na-t mbal oboksa ombol nggwe terak menna lagaid iri-ge, yi mende ndi mende oboksa at-net ndak ndak tak peyekluk-nen lagaij-o.

¹¹ At iri-nen we wok ondoso mende tembet ondosolar-e: Ereb-e wirik inpidnak nap tak onposolat, ereb-e Mbal Pem Nagawan ene lomboksa yugwi nap tak onposolat, ereb-e aid wene yak indil waring kagwi nap tak onposolat, ereb-e aid wene yugwi nap min mul undugwi nap min tak onposolat yij-o.

¹² Iri rak inpid iri-ge, marak nap oboksa-ge aid wene na ndegel puwakluk, Kerisut ebe na o wiridnak nggal wuruwakluk, lid lud tak onposolat-nen yij-o.

¹³ Iri bem-e, nit pidsa lambuk luk, ninndi angin tubu yidnak pem-nen na, Mbal Pem Nagawan Ambara nenaru yurak pem-nen na, misiget nak irit mul-o. Nir-e ninndi worak luk, irit tit irit tit Kerisut iminep mbarak nggal nit na iminep mbal yul-o.

¹⁴ Iri nggal yulndig-e, nir-e li marik nggal, yi ombolwak pem abung abung waring kagwi nap nggal, ennesiget yugwi nap-nen mul undugwi wene obube nggal iri-nen puk eneyagwi nap nggal yul-e lag-o. Ennesiget yugwi nap-nen enmberel puruk, ap kabak tak unpugwi-o.

¹⁵ Alat nde, ap enabuwa kagwi elem pem nir-e ndemeret wene puksa tena woragolar-e, yi mende ndi mende bem nir-e Kerisut na ebem iminep mbal mog-o. Nde, anggul-e at-nen yusu-o.

¹⁶ Nde, Kerisut na ebem-nen-e at ebe iri na inggi ijok oboksa ariktag-et nde, ndak ndak sa kondosolar-e, il iri na-ge owak erep min kwen yosolat, ebe oboksa yindip kwindipsa panggarusu-o. Iri alat-e, inggi ijok na oboksa enariktak eneyabu wanogolar-e, ebe na oboksa-ge irit tit, irit tit nggulok yosolar-e, ap enabuwa kagwi elem pem-et ondomok nggulok yusu-o.

Ap enpage ngget kwat yurak wene 4:17-32

¹⁷ Iri bem-e, an-e wene yu yak kondosolar-e, Nagawan Indo unu bem nene amawi min-et yak kundusu-o: Kir-e tuguruk Mbal Pem Nagawan enaru buk nap-nen kwarugwi mende kwatli-ge meyog-o. It inndi-n perali mende-ge ebe lak mende-net yusu-o.

¹⁸ It inndi na ndamuk, ir-e enaru buk woragolat, inndi tulubuk kerep nggal woragwi iri-nen ndowaga ir-e Mbal Pem Nagawan imin kundik woragit lak, nuruk tak woragwi-o

¹⁹ It inndi yebet kagwi elem na lak yidnak me, ”Meya mende nak kwarogolat wolmog-o” luk yogolat, yi meya ndi meya kwarogolar-e, it na it-net mamak pigit lak kwatli nag-o.

²⁰ Alat nde, kir-e Kerisut kenaru yogolar-e, iri nggal kwarugwi-ge kenaru yigir-e lag-o.

²¹ Nde, kir-e ndemeret at owene kuligep me, ndemeret wene iri-ge Yesus ebem worasu iri na-t mul kindiga-o.

²² Iri bem-e, kir-e nanduk-nen kwarogolat woragwi kenpage iri na mondok keya ber-o. Nanduk-nen kwarugwi kenpage iri-ge at-nen ukwe ukwe yoso bem-e at na at-net kabak tak obosolat, meya yik korasu-o.

²³ Kit kinndi arem-nen yebet kagwi iri-ge mondok ngget tak puwag-o.

²⁴ Kenpage ngget mende irit waner-o. Kenpage ngget mende iri-ge Mbal Pem Nagawan abage nggal irit ndak worak pidnak me, ndemeret wene bem-nen-e lud tak nak kwarogolat, marak woragwi nam yoso-o.

²⁵ Nit pidsa-ge Kerisut inggi ijok kwat yidnak me, kennesiget wene yugwi iri-ge keya buruk, lud tak wene nak kennggamirak inmin-e yak kerak mbogolat wolmer-o.

²⁶ Kinsilepma yogolar-et nde, meya perak nde kwaru bug-o. Kit kinsilepma iri parugu woragolat, mo woroksa mbugu-o.

²⁷ Kit meya rak kunpuwakluk Sere na amanggim ondoro terak waburak pug-o.

²⁸ Nde, yariya wanoso nab-e tuguruk yariya wanurak pug-o. Are, at ondomok inggi-nen yabu amawisa wanuruk, konak nak kwarosolar-e, insilobulo lak nap tembesa wok endeyekluk yabu wanosolat wolmag-o.

²⁹ Kit kenmende nggwe-nen meya wene wirik purak pug-o. Are, it-nen kuluruk, inndi yek tak purak wene nak yogola-ge, kit-nen yidnak wene kuluwa nap iri-ge inmbiringgat tak pugub-o.

³⁰ Nde, Mbal Pem Nagawan-nen idnak Konak Indi iri-ge indi puru rak purak pug-o. Mbal Pem Nagawan-nen-e ”At ilirak-nen yili-o” luk, yenggerak kunpuwakluk, Konak Indi kenpem posolat, ”Kit kinmiri yurak tarem-e ndemeret wok ma-o” luk Konak Indi ebem-nen urul yak kondosolat yij-o.

³¹ Wene nggutlugwi min insilepma-nen onmbol pem pak yurak puk kwarugwi min insilepma yugwi min ngguno nggugwi min ap onpok pugwi min keya bogolar-e, meya kwarugwi mende erep min-et keya ber-o.

³² Are, kit na kit-net nanggau kanggau yogolat, kinndi yanggorak wolmer-o. Mbal Pem Nagawan-nen Kerisut ebem kit meya yidnak amberam tak puruk urugom tak kinpid nggal, iri nggal-et kit na kit-net meya rak kinpidnak ala-ge, ”Ob-o. Ereba mag-o” luk yanggosa keya burag-o.