AYUP 5 - Nanduk Ngget Tul Pidnak Wene

¹ Ayup wa-e. Kene nggoksa yi-o. Onggo mbi yuwa, lak? Yongga kuruwaklug-e, aid nab-e ta nggal nggi yugun-o?

² Ap wid nak-nen perak inndi abi kalok yogolat iri-nen ndowaga wat yugwi-o.

³ An-e ap wid eneyaso. Yik eneyasolar-e, tugup lak nggal-et eneyaso-t nde, an-nen-e ereya na-net it woragwi ondoro-ge imbiri lamut tak onposo-o.

⁴ Iri rak onposola, it inlirak na mondok inmiri yugwi bug-o. Ap enpem wene mbenarugwi sa nen enpem wene mbarogola na ap mbi it enambigit yugwi bug-o.

⁵ Nde, ap wid ereba na eneyapmu nen mbaridnak mende-ge nere woragwi nap-nen nuruk lak tak pugwi-o. Nggandum mbato isile worak enggendumu-t nde, nere woragwi nap-nen-e leraben nuruk, lak tak pugwi-o. Silobulo ukwe-nen inndi eberek yidnak nap-nen-e wid ereba enarengge mende-ge mondok ukwe-t yugwi-o.

⁶ Meya kwarugwi iri-ge o yu-nen-e kwarak poso bug-o. Anggun panggun tak onposo mende iri-ge nggweyak arem nak-nen-e nam yoso bug-o.

⁷ Mondok lag-o! Kan amare-ge kan iri na arem-net lasu iri na nggal-et ap ondomok-net lak tak unpurak mende-ge waga enpem pil lobok yugwi-o.

⁸ An-nen nde kat worasu yu nggal kwasa woralar-e, Mbal Pem Nagawan eram nggi yeleb-o. ”An-e yu nggal kwasa worasu-o” luk Mbal Pem Nagawan yak teleb-o

⁹ Mbal Pem Nagawan-nen kwaroso iri-ge mondok kwiye worak mende me, nit-nen iri nggal-o luk nenaru yurag-e meya-o. At-nen kwiye worak kwaroso iri-ge wonarurag-e meya, lak yoso buk nen yusu-o.

¹⁰ At-nen-e talme nggweyakma yu me mberak pil mbuwasola, yabu amburu rak poso-o.

¹¹ Mbal Pem Nagawan-e ap labok tak iri na-ge kek tak onposolat, inndi puru bera woragwi nab-e enalen worak tak onposolat kwaroso-nen yusu-o.

^12-13 Inndi tenggerak nap-nen: ”Iri nggal kwaruwog-o” luk yidnak ereba na-ge ebe lak tak posolat, ir-e inndi tenggerak elem iri na-net enmberam laso rak poso-o.

¹⁴ Lenggesilmu-t nde, ndamuksa lumugumu rak onposoma, kubu-nen kwarugwi nggal ininggi yabak ndabak nugwi-o.

¹⁵ Alat nde, Mbal Pem Nagawan-nen inmiri yosolar-e, enarengge lak nab-e wat yidnag-et nde, inmiri yoso-o. Indi teberak nab-e anggun panggun tak unpugwi sa-nen inmiri yoso-o.

¹⁶ Mbal Pem Nagawan-e enarengge lak nap enmanggim na inndi ebem mbung mbung tak wolmomtak mende wok ondoso-o. Mot mot kwarugwi buk nab-e Mbal Pem Nagawan-nen enemnde tu nggelak poso-o.

¹⁷ Nde, Mbal Pem Nagawan nen nggomo korosola-ge, kalen nak kudtag-o. ”Iri kwarigenma-o” luk met kobosola-ge, ”Ngge-o?” luk keya burak pug-o.

¹⁸ Mbal Pem Nagawan iri-ge at-nen andi bandi rak unpurug-e, at-nen ki rak onposo-net yusu-o. At inggi-nen undurug-e, inggi iri na-net ki rak onposo-o.

¹⁹ Lak tak onposo mende-nen kebem mbosola-ge, pempa kimiri yosolat wolma-o.

²⁰ Nogoro-nen wat yugun naru, at-nen kilusu kundik puwa-o. Nde, wim pem-e kabo emndam-nen kimiri yuwa-o.

²¹ Kobok pogola-t nde, kimiri yuwa-o. Angin worak mende kebem mbosola-ge, kwiye lag-et wolmomtag-o.

²² Lak tak onposo mende min nere min kebem mbosola-ge, mondok momak puruk woralat, kalen nak ko renak woragun-o. Yi mende ndi mende eyak worak-nen nde kebem mbud yosola-ge, kwiye kudtak pug-o.

²³ Yabu kat-nen nggweyak yalugun sa-ge kerep lak wolma-o. Yi mende ndi mende erengen kege isilepma worak-nen-e kebem mbud ma bug-o.

²⁴ Kar-e kama yamuksa-t woragun-o. Kat-nen nde kolomba wam lombonosoloma na misik mbi lak yigit lak ndigirik irit kagun-o.

²⁵ Kat-nen wigarag-e tusuangge nggal kwarat wonarurak puk ma-o.

²⁶ Nggandum mbato ogwere yosoma, mbarugwi tarem-net mbatli iri na nggal-et kar-e kebem kol pol tak irit worasoma kindi worag-et yugun-o.

²⁷ Ayup wa e. Wene ereba-ge nir-e ndemeret kwara mbenarigerig-e, ndemeret ala karuk, kar-e ”Ndemerer-o” luk kulurag-o.