AYUP 42 - Nanduk Ngget Tul Pidnak Wene

Ayup-nen wene onggo Nagawan Indo yak tidnak wene 42:1-6

^1-2 Ayup-nen wene onggo Nagawan Indo yak tosolar-e: ”Nagawan Indo wa-e. Kar-e mondok kamawi worak-nen yusu-o. Kat-nen yi kwatlik ndi kwatlik yurak iri-ge mondok ndak nak-nen yusu-o.

³ Kat-nen an kin wok nobosolar-e: ’Kar-e mondok karu buk-net nde, an nindi nggat nggat elem pem-nen nggaruk tak pidnak wene iri-ge yumndusu-a?’ luk yak nirigen-o. Yak nirigen iri-ge ndemeret an-nen yebet kagit lak mende-t nde yukmu-o. Nde, kwiye worak wene an nondomok na naru buk wene-t nde, an-e yukmu-o.

⁴ Kat-nen yak norosolar-e: ’An wene yosola-ge, kwara kuluruk, an-nen kin wok kobosola-ge, kwara onggo yurag-o’ yak nirigen-o.

⁵ Nanduk kat kowene-ge ap-nen yogola nak koloso-o. Alat nde, yawo-ge nentare mboma lambuk luk, kar-e kwara naru yusu-o.

⁶ Iri kwarosolar-e, an-nen yigi wene ereba na yebet kasolar-e, ’Niri nera-nen yigi-o’ luk ninggiri-nen o liri bem, mabe bem yeba koreyak worasu-o” luk yij-o.

Worok tak posolat-nen yidnak wene 42:7-17

⁷ Nagawan Indo-nen wene ereba na ndegera Ayup yak turuk, Nagawan Indo-nen Elipas yak tosolar-e: ”An-e kat min kenggamirak mberen min mondok nisilepma kenpem pusu-o. An ndegel noboso nap Ayup iri-nen-e kit-nen yigep iri nggal-e yigit lag-et nde, kir-e an nowene-ge mondok ndemeret mot mor-e yigit lag-o.

⁸ Iri yigepndik me, nde, yawo-ge kusi nak sapi-ge tuju, lomba ge tuju waruk Ayup eram mburugupndik, wam ereba-ge kit meya yidnak pem kondomok kenmanggim wosa kan per-o. Kan pogola-ge, Ayup-nen-e kit kenmanggim tepan yuwa-o. Nde, Ayup-nen tepan yuwa iri-ge an-nen e kolosolar-e, kir-e onggo angin worak kenpem purag-et nde, an-nen-e kinnggiri rak pimin pug-o. Kir-e an nowene-ge ndemeret mot mor-e yigit lak yigepma-o. Nde, Ayup-nen perak ndemeret mot mor-et yamu-o” luk yak tij-o.

⁹ Nde, Nagawan Indo-nen wene iri na Elipas min Mbilndat min Sopat min-nen-e Nagawan Indo-nen yak indid ereba na-t kwarogola-ge, Ayup-nen tepan yosola-ge, Nagawan Indo-nen-e kulij-o.

¹⁰ Nde, Ayup-nen anggamirak kenan iri na enmanggim tepan yij-o. Iri luk ombol nggwe Nagawan Indo-nen tuguruk Ayup iri na yi mende ndi mende ombo rak posola-ge, at aringgi arengge-ge nanduk ereba na nggal nag-et mberen pem nambena irit wok tij-o.

¹¹ Nde, Ayup iri na owerak min iridtak min oboksa min at enggamirak nanduk-nen kundik woragwi min lobok yigarik, lambuksa at ama-nen nggok irit saiga-o. Nagawan Indo-nen angin worak mende oboksa Ayup ebem pil lobok yidnak iri na bem it min-et inndi puru bera yuruk, at indi yangguniga-o. It oboksa-nen-e ondomoktak-nen uang min emas-nen konidnak inggi bem purak sinsin min Ayup wok tiga-o.

¹² Nde, Ayup iri na worala-ge, kwarat kobongsa irit imbiringgat tak posolat woragij-o. Nde, Ayup anggun panggun ebem mbigit lak ma-ge iri nggal-e imbiringgat tak pigit lag-et nde, yawo-nen wok tosolar-e, lomba wam-e 14.000, nde, unta-ge 6.000, nde, sapi-ge 2.000, nde, kelerai-ge 1.000 irit Ayup-e ombo yij-o.

¹³ Nde, ilirak ndagosolar-e, ab-e enpe tuju, nde, kwami-ge enpe tiga irit ndet inpij-o.

¹⁴ Nde, ara manggiya iri na unu-ge Yemima yarij-o. Nde, imbirik iri na unu-ge Kesia, nde, lapkwe iri na unu-ge Kerenapuk irit yarij-o.

¹⁵ Yi wi ndi wi oboksa-nen kweyap ndugum-e Ayup ararak kigirik ereya nggal mbi mondok woragit lag-o. It ereya na-ge intidtak ereya na inmin-et Ayup imining angge-ge ndak ndaksa winde rak inpij-o.

¹⁶ Iri luk, Ayup iri na uruk woralar-e, olengen-e seratus empat pulu (140) irit woragij-o. Iri nggal woralat me, ilirak-nen ndagidnak min it-nen ndagidnak min eneyagaij-o.

¹⁷ Iri kwasa woraruk, Ayup iri na-ge abu indi worak luk irit wat yij-o.