AYUP 41 - Nanduk Ngget Tul Pidnak Wene

¹ Nagawan Indo-nen Ayup yak tosolar-e: ”Kar-e keyane wanugwi eyak pem nak-nen-e nanggu Lewiatan iri-ge uloksa ndak lit kagun-a? Kere bem nak-nen at ama-ge kerebara ndak yilik pugun-a?

² Kar-e kere-ge abirumbun ndak parugun-a? Are, ondokwak pem mbong eyag-e ndak kundugu puruk lit kagun-a?

³ Wisirik obonokluk ar-e ’Wisirik nibi-o’ luk kemengen mbaruwa, lak? Are, kat-nen abuwa kanokluk kat kemengen mbaruwa, lak?

⁴ Ar-e kat kimin indi misiget luk, ’An-e pempa kat ndegel kobosolat woramin-o’ luk urul yak kuruwa, lak?

⁵ At iri-ge ndegel kubugwi kweyap ereba na inndi alen tak posolat, yungunugwi towe kamarugwi nggal kat-nen at iri kamarugun-a?

⁶ Lewiatan iri-ge keyane kore yugwi nap-nen-e onggo wanurak pem wene wuruwama, onggo bidnak nap-nen-e tuguruk onggo wanuwokluk, mbara tembesa wanurag-e ndag-a?

⁷ Kat-nen-e at iri-ge wuru anggat kenan worak pem-nen kundugu obosolat, posid wuru bem mbisingsa anggulwak langsa keya bosolat kwarugun-a?

⁸ Misik pem nak kinggi abis pem perek tak puruk, tuguruk abog-e mondok perek tak pugun pug-o. Nde, yig nggugup iri na-ge meme rak pigit lak, kindi-ge pem yeberak nak irit woragun-o!

⁹ Ap ondomoktak-nen nde Lewiatan iri na kagolar-e, enmawi lak luk, enanggul nden yaga mbud ma-o

¹⁰ At iri nene yosoma nde, sil kagola-ge, isilepma yoso-o. Ap misiger-o luk at eram men yurag-e mondok meya-o.

¹¹ Ta-nen nggal at ebem mbud ma-t nde, uruk wolma-o? Nggweyakma yu me-nen-e at ebem ndak mbud yurak mbi mondok worasu bug-o.

¹² Nde, yawo-ge Lewiatan iri na ebem woraso inggi ijok amawi mbena yak kirimin-o. At iri-ge amawi na kwarat, ebe na mondok yogok tak-nen yusu-o.

¹³ Usum amberam sum iri-ge ap misiger-o luk mbi-nen tugwara keya burag-e mondok meya-o. Iri nen at eragun amawi worak yirik iri-ge mondok kundugu burak na meya-o.

¹⁴ Ta-nen nggal eyak mondok kwiye worak ereba na kura buruk, amnak puruk woraso emnde iri-ge pungguruwa-o?

¹⁵ At ombol-e kerep amawi worak panggara mendagidnak tagun nggal yeget keget-nen yusu-o.

¹⁶ Ebem aberal iri na panggarosolar-e, mondok ebem lebera panggaridnak me, kimamo nggurak tet meya-o.

¹⁷ Eragun iri na-ge panggara yumago me, panggara arik tak pil lobok yurag-e mondok nggesa nggal-o.

¹⁸ Nde, Lewiatan iri na nde siklak yosola-ge, eyaya yembak yosolar-e, erengen abinal-e mo kona pil wasolat abinal nggal.

¹⁹ Emndam nggwe-ge ndibele mbarep parep wasolar-e, tinggiringgi mbarep parep ndibi ndi yoso-o.

²⁰ Abiru nggwe-ge tirik kule nggal ndugunuruk laso-o.

²¹ Nde, indisep-nen-e kan pu yidnak nggal yosola, kan amare-ge emndam nggwe-nen waso-o.

²² Undugunwag-e mondok amawi worak me, oboksa-nen at eram wok yurag-e mondok kwiye nak yugwi-o.

²³ At aboro ge mondok mbeyok tak me, siyag-et tet urubulurak meya-o. Nde, at aboro-ge mbaja posid nggal me, tulurag-e meya-o.

²⁴ Indi-ge kwiye yoso buk, kerep nggal tugup lak, tumbu nggal tugup lak irit woraso-o.

²⁵ At nde men yosolar-e, ap enmawi worak-nen na enmawi-ge lak yoso-o. Kwiye kwarat yogolar-e, enmawi lak yoso-o.

²⁶ At mbal uburak yalawi na lag-o. Tege bem-nen na, san pem-nen na, posid wuru bem-nen na, at iri andi bandi rak uburag-e meya-o.

²⁷ At-nen-e posij-et nde, tusuangge nggal lum lum nde yik kasolat, tembaga-t nde, kom sari nggal yik kaso-o.

²⁸ At langgara wirik uburak mare mbi mondok worasu bug-o. Kerep waga lel kaidnag-et nde, tusuangge waga eram mbo bil mbiridnak nggal tak poso-o.

²⁹ At-nen mbut yik kasolar-e, tusuangge lerak nggal nde yik kaso-o. Posid tege bem-et kijaridnag-et nde, nda nde ondoso-o.

³⁰ At iri na embe nggwe aberal-e mbotol ndamerak nggal yere were-o. Nggweyak yalugwi nggal me, miril nde mbiyok tosola-ge, miril-e ngara labuk yoso-o.

³¹ At-nen yi koma nde saborosola-ge, yi koma-ge yi embem-nen usune yoso nggal kwaroso-o. Yi koma eragub-e sakwi togolwak arem amburu sabosoma, eragup luwaso nggal kwat yoso-o.

³² At mbiridnak ondoro nggwe-ge eyaya yoso-o. Yi koma erare-ge eragup loro nggal tak poso-o.

³³ Nggweyakma yu me-nen-e Lewiatan imin ndak wururak urugup worak mende misik mbi worasu bug-o. At iri-ge kwiye elem mondok aru bug-o.

³⁴ At iri-nen-e urugup worak mende aye kagwi-t nde, at-nen yik kasolar-e, mondok erengenma nggal tak nak poso-o. Urugup worak isilepma worak oboksa enggendumu-nen-e at Lewiatan yu nak mondok nagawan-nen yusu-o” luk Nagawan Indo-nen yij-o.