AYUP 40 - Nanduk Ngget Tul Pidnak Wene

^1-2 Mbal Pem Nagawan-nen yosolar-e: ”Ayup wa-e. Kar-e Mbal Pem Nagawan Namawi Worak an nebem kore yusu-a? Kar-e nggeyok yugun, lak? Are, eyag-et wurugun-a? luk yak tij-o.

Ayup-nen yidnak wene

^3-4 Yosoloma, Ayup-nen onggo yosolar-e: ”Nagawan Indo wa-e. An-e ap inndi lak-nen yugwi nggal-et yigi-o. An-e wene onggo-ge no nde yak kirimin-o? An-nen wene onggo yurag-e wene-ge mondok lag-o.

⁵ Ndemeret an-e wene-ge mondok kwarat wirik pukmu-o” luk yij-o.

⁶ Yosoloma, Nagawan Indo-nen e kemereya arem-nen tuguruk Ayup imin wene mbarij-o.

Nagawan Indo-nen yidnak wene

⁷ Iri luk, Nagawan Indo-nen Ayup yak tosolar-e: ”Kar-e ap kusi-nen-e an neram lobok yugundik, an-nen kin wok kibimin wene yeba oboksa onggo yi-o.

⁸ Kar-e an-nen lud tak nak kwaroso iri na-ge lak tak puruk, kat-nen-e mot mot kwaroso nggal kwarosolat, an-e meya kwaroso rak nubugun-a?

⁹ Kar-e kamawi-ge an namawi ndak ndak-nen yusu-a? Kat kene-ge an nene o nggu nggal yoso iri nggal yugun-a?

¹⁰ Kindi kek tak woraso min kunu worak woraso min ereba-ge kumuruk pi-o. Kek tak woraso min kanggu kobok mboroso min ereba-ge yutluk wolmin-o.

¹¹ It inndi kek tak ereba na yik eneyarug-e, kisilepma kwarat yosolat, it ereba-ge kerengenma nggal tak inpi-o.

¹² Inndi kek tak eneyarug-e, kat-nen mondok tebe rak unpurag-o! Nde, meya yugwi nab-e ondolma-net ndamera keya inpi-o.

¹³ It oboksa nggweyak arem yapma inpi-o. It iri-ge ap watluk mbugwi sa leget waga inpi-o.

¹⁴ Iri kwarosolar-e, kat kondomok kamawi bem-net ombol nggwe yosola-ge, an-net kat kerembel wanimin-o.

¹⁵ Kar-e sapi nggal nggok pare (Mbemot) mondok kwiye worak iri mbi kwara lombot pi-o. Iri-ge kat ndak worak kibigi nggal an-nen ndak worak pidnak mende-net yusu-o. Sapi min Lembu min nggal-et tusuangge-ge naso-o.

¹⁶ Alat nde, at ebe amawi min emengen amawi min kwiye worak iri kwara lombot pi-o!

¹⁷ At iri-ge iyuwag-e e nggal-et mendak poso-o. Awe emengen-e amawi worak tugup lak woraso-o.

¹⁸ Owag-e tembaga nggal nde, inggi ijog-e mbaja posid abare nggal amawi worak-nen yusu-o.

¹⁹ Urugup worak ndak worak pigi oboksa enggendumu-nen-e at iri nak perak terak minik wi yurak-nen yusu-o! Ndak worak ibid nap iri nak-nen perak aringlapmu rak purag-e ndak-nen yusu-o.

²⁰ Ndak worak pidnak mende erengen kege alen posolat keyari poso sa ndobo ndobo ereba na me-ge sapi nggal nggok pare iri na-nen norag-et tusuangge yak yoso-o.

²¹ At nene yosolar-e, egere isile worak ereba indipma-t nene yosolat, mboro ndumu yi mburu nggwe ereba na me kurak tak woraso-o.

²² Egere isile worak ereba na ugunmak-nen lumurak uburuk woraso-o. E kore yi eyak pem yak yidnak ereba na-nen indipma rak uburuk woraso-o.

²³ Yi Yareren iri-ge amawi kwarat mborosola-t nde, ar-e kwiye yoso bug-o. At anggul-e yi-nen yomndosola-t nde, ar-e tugup lak irit woraso-o.

²⁴ Ta nggal-nen kwiye lag-et at iri-ge erengen ngguru rak puruk, are buruk isilep ngonok tak puruk tenaguwa-o?” luk yak tij-o.