AYUP 4 - Nanduk Ngget Tul Pidnak Wene

Nandug-et anggamirak-nen yak tiga wene 4:1–14:22 Elipas-nen yak tidnak wene 4:1–5:27

^1-2 Iri lug-e Elipas-nen wene yekluk-nen yosolar-e: Ayup wa-e. An wene yosola-ge, ob-er-o luk peragun, lak? An-e we yeba-t nene lak wolmomtag-e meya-o.

³ Nde, kat-nen ap kwarat mirik onposolat woralar-e, inndi araga araga ala-ge, kat-nen inndi uwi yabosolat woraigen-o.

⁴ Kat-nen yoso bem ap indi uwi yagosolar-e, kapsa mbidnak nap min ndeyak woragwi nap min indi momak pugwi buk nap min-e enmawi rak posolat woraso-o.

⁵ Alat nde, yawo-ge kat iri kwaroso iri na-t kebem mbud yosola, wendet yosolat kindi kabak yusu-o.

⁶ Kar-e tugup lak Mbal Pem Nagawan imin kundik worasolat, meya kwarigit lak worasu na-ge lag-a? Iri kwaroso ala-ge, kat-nen-e tugup lak, kindi kabak yigit lak woraleb-o.

⁷ Kwara yebet ki-o. Ab-e meya kwarugwi buk mbi lak tak onposo mende angin worak yeba nggal-e enpem mboso-a?

⁸ An-nen kaso ge meya yabu wanugwi nap min meya uwi pil kagwi nap min-e ebe na meya-t mbarugwi-o.

⁹ Nde, Mbal Pem Nagawan-e emnde pu nak-nen lak tak onposolat, isilepma-nen ondoro rak onposo-o.

¹⁰ Nde, meya yugwi nab-e singa ndakngge nggal enne nggak-nen unlumne ngol arem nili-o. Alat nde, singa ereba emnde-ge Mbal Pem Nagawan-nen amnak posolat, eneyak yenggara keya busu-o.

¹¹ It iri-ge singa ndakngge nere-nen wat yosolat, amarik liring tak poso nggal kwasa wat yili-o.

¹² Nde, misik tarem-e wene mbi kuraga yak norogolat nggumuksa neyanggoma pogola, kuligi-o.

¹³ Iri yosola, iri na-nen ndowaga an-e nggiringgendumu nabi meya karuk-nen kwarugwi nggal kwara nene yigit lak yigi-o.

¹⁴ Karug-e, an-e wendet yosolar-e, kwiye-nen yugup tugup irit mbigi-o.

¹⁵ Kimamo pubusa-nen nerare bem siyak pu yosola-ge, mondok numunggum kwarat yij-o.

¹⁶ Nde, iri na-ge mendak worasola kagi-o. Iri-ge kwara lombot obosoma-ge, an naru buk mende nde kagi-o. Iri lug-e, abu yi ene lak ndi ene lak iri na bem-e an-e ene misik kuligi-o.

¹⁷ Mbal Pem Nagawan erengen pem-e nggweyak ma nap-nen-e meya kwarugwi buk mbi worali-a? At ebe ndak worak pid iri na erengen pem-e meya kwarugwi buk ebem ambut lak mbi worali, lak?

¹⁸ Mbal Pem Nagawan-nen-e at ndegel ubugwi nap aid arem woragwi-t nde, ”Abu iminep mbarag-o” luk indi enpem pusu bug-o. Mondok aid nab-et nde, meya lugud tak kwarugwi eneyasu-o.

¹⁹ Nde, nggweyakma nap nggweyak-nen yumaga konidnak ereba enpem-e ndag-o luk indi enpem puwa perasu-a? It iri-ge ngginggiris nggal tebera lak tak unpurak ndak-net yusu-o.

²⁰ Ab-e kubu kabu nak unluk woraruk, keyama yigit lak ma-t wat yosoma-ge, inndi enpem mbung mbung tak woragwi bug-o.

²¹ Wat yogolar-e, enarengge mende min-et lak yoso-o. Wat yogolar-e, inndi nggat nggat lak irit wat yugwi-o.