AYUP 38 - Nanduk Ngget Tul Pidnak Wene

Nagawan Indo-nen wene onggo Ayup yak tidnak wene 38:1–41:34

¹ Iri luk, e kemereya nggok misik arem-nen Nagawan Indo-nen Ayup imin wene yosolar-e, yu nggal yij-o:

² Kar-e ta nggal-nen kat kondomok kindi-n pidnak wene ebe lak iri bem-nen kwiye lag-et an-nen idnak nindi nggat nggat elem iri na yumndusu-o?

³ Kat nde kusi-nen-e yawo an neram lobok yugundik, an-nen kin wok kibimin wene yeba onggo yi-o.

⁴ O yu an-nen ndak worak pigi tarem-e kar-e woraigen, lak? Kat nde mondok karu-nen-e ndindera yak niri-o!

⁵ O nggweyak yu-ge ”Wigaktak nggog-e iri nggal-o” luk ta-nen ndak wosa pij-o? Are, o nggweyak yu o ndak worosolar-e, ta-nen kere mbung tak pij-o? Onggo yurag-e kar-e karu, lak?

⁶ O yogo woraso owag-e nggesa-nen tugup lak sindik worasu-o? O yu mabin kereb-e ta-nen tugup laksa posola-ge,

⁷ o nda nda wonaru ereba na lambuksa ndawi yogolat, aid arem woragwi ereba na enalen-nen enne lek kagolat yiga-o?

⁸ Nde, nggweyak yu erel arem-nen yi pilana mbo bil wasola-ge, yi koma wamid lesa labuk maklug-e, ta-nen wamid leramu-o?

⁹ Iri-ge an-net yi koma-ge nggan nggan-nen mbeyok tak pukmu-o. Mom ki rak pem-net nggitlik pukmu-o.

¹⁰ Yi koma mberarik lid tak pid kuri iri-ge an-net wat tak pukmu-o. Iri kwarosolar-e, mondok imid wosa wamid lerak pukmu-o.

¹¹ Iri rak puruk, an-nen yak tosolar-e: ”Kuri-ge yu-o. Kwidsa mbururak pug-o. Kat-nen nggweyerep nggwayerep lobok yosolar-e, kamawi-ge yu bem nak lid tak purag-o” luk yak tigi-o.

¹² Ayup wa-e. Kat worasolar-e, misik tarem-e kat-nen-e o nda makluk, ”Kil pi-o” yak tigen-a?

¹³ Are, kat-nen-e o nda nda yak tosolar-e: ”O nggweyak yu-ge kat-nen kinggi tena buruk, meya kwarugwi nab-e it kurak tak woragwi sa-nen pil yaga keya inpi-o” luk yak tigen-a?

¹⁴ Lop nok tak pugwi mende (cap) nggweyak yimbe min yurugwi sum min umuruk pogolat ebem lop nok tak pugwi nggal lengge yaya-nen-e ndobo min mbirik min-e mondok yaya rak posola, nam-et kali-o.

¹⁵ Nagawan Indo enaru buk nap enmanggim-e lengge yaya iri-nen-e kwara yaya rak onposolar-e, it-nen insilepma min yi kwatlik ndi kwatlik yurag-e tena unpusu-o.

¹⁶ Kar-e yi koma yiriwak pem nin sa ud me yi pilana pil luwaso sa-ge mbigenma, lak? Are, kar-e yi koma yiriwak ena ud pem-e waring kil nigenma, lak?

¹⁷ Wat luk ndok wiril mbugwi sa ndamuk mom ndirik iri na me tumende bem kerep pak tumende iri na-ge ap-nen-e mirik kibiga, lak?

¹⁸ Kar-e ”O yu-ge wigaktag-e iri nggal-o” luk yebet kasu, lak? Kat nde karu-nen-e ”Iri nggal-o” luk onggo yak niri-o.

¹⁹ Yaya lobok yusu erem min ndamuk iri erem min-e ”Iri me-nen lobok yusu-o” luk kar-e karu, lak?

²⁰ Ndamuk min yaya min kat-nen kuri wosa purag-e ndak, lak? Are, lobok yosoma, ”Tuguruk mbiri-o” yak turag-e ndak, lak?

²¹ Kat kebe na kindi worag-et me, kat na o yu ndak wirigi tarem-e kar-e woraigenma-t me, yanem iri-ge ndemeret kwarugun-er-o!

²² An-nen narengge mende ndugu ndugu min kerep talme min ndok wosa poso o ereba na-ge kar-e kil nigenma, lak?

²³ Nde, ereba ndok wosa poso ereba-ge anggun panggun woragolat tarem-nen wanosolat, wim nggogolat-nen wanosolat kwarurak pem-et ndok wosa pukmu-o.

²⁴ Kar-e molengen kona pil wasu erem-e karu, lak? O wija mo luwaso (timur) nggwe-nen lobok yoso iri-ge erem-e kar-e karu, lak?

²⁵ Talme nggok mbuwasolat, yi mbururak ondoro-ge ta-nen yalij-o? Obinel yosolat, o nggu yosolat yurak tula-ge ta-nen kwarak pij-o?

²⁶ Ta-nen nak talme-ge nembaga ereba mberak posolat, ap woragwi buk sa ereba mberak posolat kwarusu-o?

²⁷ O nggweyak lembe lerak yu-ge ta-nen piri rak posola, tusuangge arok poloso-o?

²⁸ Talme min lilangen min ereba eij-e ta-o?

²⁹ Yi kerep nggal logok tak min lilangen logok tak min ereba-ge nderak pid ija-ge ta-o?

³⁰ Ta-nen yi-ge kerep nggal kwarak posolat, yi koma ombol pem-e owak kwasa logoksa labuk yusu iri-ge ta-nen kwarak poso-o?

³¹ Wonaru lumbum tak Kartika ereba na kat-nen kamasa ut misiget purag-e ndag-a? Are, wonaru Mbelantik kamarak ereba na kat-nen wisirik purag-e ndag-a?

³² Wonaru lasolat mbosolat kwarusu iri-ge kat-nen tu mirik purag-e ndag-a? Wonaru Mbinduk nggok min marik min-e ”Kuntula-ge ya nggwe nak nurag-o” luk wat tag purag-e ndag-a?

³³ Mbal pem woraso ”Iri nggal kwarosolat wolmin-o” luk yidnak pem iri nggal kwarosolat worasu wene-ge kar-e karu, lak? Nde, iri wene-ge nggweyakma yu me-nen kwaruwakluk ndak pugun-a?

³⁴ Kar-e nggan nggan eram kene mbo bil lasolat-nen yak tosolar-e: ”Talme nggok nebem mberak pil mbuwasug-o” luk yak turag-e ndag-a?

³⁵ Kat-nen nde obinel iri na yak tosolar-e: ”Yebek yi-o” luk yak tosola-ge, lobok yosolar-e: ”Nab-o. Kat-nen yak nurugun iri-ge kwarimin-er-o” luk yak kuruwa?

³⁶ ”Yi Nil iri kobong yuwa-o” luk ta-nen towe ibis ereba-ge yak tosoma, aru yusu-o? ”Talme mbuma-o” lug-e ta-nen towe wam kusi-ge yak tusu-o?

³⁷ Indi nggat nggat worak pem nggan nggan wonaroso luk, nggan nggan iri na nden kaga keya bosola-ge, talme mberak poso-ge ta-o?

³⁸ Talme-nen nggweyak ababul ereba na-ge logom worak posolat, nggweyag-e logoksa labuk yoso-o.

^39-40 Singa ndakngge amanggim-e kat-nen at naso mende-ge langgaril mboroso, lak? Iri-nen amarik ereba na kerep yanggoma kura worasola na, uwima mbinggirik worasola na kat-nen imbitsa at naso mende mak toso, lak?

⁴¹ Towe ijamu nere-nen eyabi worak wat yidnak kore yebaluk nosola-ge, ta-nen at naso mende mak toso-o? Amarik ereba na-nen at naso mende an nebem nggi yosola-ge, ta-nen yongga woroso-o?