AYUP 31 - Nanduk Ngget Tul Pidnak Wene

Tuguruk Ayup-nen yosolar-e: ”An meya kwarigi bem-nen nebem mbusu-ge lag-o ”yidnak wene 31:1-40

¹ An-nen mondok watsa owak mbarosolar-e: ”Kweyap ndugum yik eneyasolar-e, mondok nindi-nen nok inpimin pug-o” luk owak mbarigi-o.

² Mbal Pem Nagawan-nen-e nit ninmin-e no nde kwaroso-o? Nit nggweyakma nap-nen kwarugwi onggo posolar-e, ngge kwasa onggo-ge poso-o?

³ Lak tak onposo mende min imbiri lamut elem min-e at-nen-e mondok ndemeret meya kwarugwi nap enpem-e pil lobok yoso-o.

⁴ Mbal Pem Nagawan-e mondok ndemeret an-nen kwaroso-ge mondok aru worasu-o. An-nen nuwok pil lasu-ge mondok kasu-o.

⁵ An-nen mondok owak mbarusu-o: An-e lugud tak mondok kwaroso bug-o. An-e ap enmberam na mondok laso bug-er-o.

⁶ Mbal Pem Nagawan-nen an-e ndemeret angin ndak wurugwi mende konak pem-et ndak wat nubuwag-o. Iri kwaruwarig-e, ndemeret an-e meya yoso buk irit niyujwa-o.

⁷ An-nen nde ndemeret tula mot mot mburugwi iri na worala, lugud tak nggwe mborosola, nindi-nen meya kwarugwi elem ereba na ambigit mborosolat, an ninggi meya ngin ala-ge,

⁸ an-nen uwi pil kagi mende-ge ap nin-nen nonggolat, an-nen yagidnak oboksa kona lak tak pogolat kwaruwag-o.

⁹ An-nen nde nenggamirak onkwe nindi enpem puruk, tumende ombol nggwe lumuluk abage mbaroso ala-ge,

¹⁰ an nogwe-ge nin nap amanggim sagosolat, nin nap-nen imin nene yosolat mag-o.

¹¹ Meya mbilaro ngin iri nggal nde an-nen nde kwaroso-nen-e iri-ge onggo angin worag-e il pem-et nebem purag-o.

¹² Meya kwarugwi iri nde nigi yoso buk kanduk nen lak tak onposo iri nggal-nen lak tak posolat nggal-nen-e an narengge mende oboksa abu nuruk lak tak peleb-o.

¹³ An ndegel noboso nap-nen nde: ”Kar-e iri nggal kwat nuburag-et nde-o” yosola nggal-nen-e an-e at ene-t kuluruk nindi mot mbek tak pem-et kwat ebeleb-o.

¹⁴ An nen nde ene kuligit lak yosolar-e, Nembal Pem Nagawan eram-e nggesa-nen wok yurag-o? Mbal Pem Nagawan-nen an-nen kwaroso iri na mbenarurak neram lobok yosola-ge, an-nen-e wene onggo-ge no yimin-o?

¹⁵ Nde, Mbal Pem Nagawan iri-net an ndak wat nobosolat, an ndegel nubugwi nap na ndak wat inpidnak-nen yusu-o.

¹⁶ An-e enlengenma lak nab-e yongga undurak nisili-o luk keya onposo bug-o. Kweyap togwe na indi kabak yidnak woragola, keya onposo bug-o.

¹⁷ An nde nunggwi mende ndak woralar-e, an-e li mul ineid lak iniya lak nere woragola, keya onposo bug-o.

¹⁸ An-e marik pem-net nggwel unpurug-e, an nuruk woralar-e, pem irit ndegel onposolat woraso-o.

¹⁹ An-nen enarengge lak-nen yurugwi sum onggo purak enlengenma lak eneyarug-e,

²⁰ an nondomok nolomba usu bem-nen yagidnak nembem sum-nen yirik onposo-o. Iri yosola, ir-e inndi min yeksa ”Wiwa-o” luk kek tak nubugwi-o.

²¹ ”An-nen kwarimin iri-ge ombol nggwe-t yimin-o” peraruk-nen nde, li mul ineid lak iniya lak ereba na enmberam laso ala-ge,

²² nerabitwak mberen ya-ge yetla keya buruk, arik tak puwag-o.

²³ Mbal Pem Nagawan-nen an nebem kwarat wene mbaruwa iri na kwiye-nen an-nen-e iri nggal-e mondok kwatlep pug-o.

²⁴ An-e nindi-ge narengge mende bem wat tak puruk woraso bug-o.

²⁵ An-e narengge mende bem-e nindi kek tak woraso bug-o.

²⁶ An-e molengen yaya worak yemberak pil waso iri min waneya yaya konak yemberak pusu ereba min mondok mariget tet erembel wanoso bug-o.

²⁷ Iri kwarosolar-e, an nindi-ge mariget tet waga ebem na poso buk, kek tak obosolat tebek yoso buk-nen yusu-o.

²⁸ Mbal Pem Nagawan Amawi Worak iri na-t nde, ”Worasu bug-o” yidnak me, meya iri nggal kwaridnag-e mondok lak tak unpurag-o.

²⁹ An nuwim nap andi bandi kagola-ge, an-e ob-er-o luk nalen kaso bug-o. An nuwim nap lak tak onposo mende enpem mbidnak pem-e nindi yik yek yoso bug-o.

³⁰ An-e ”Nuwim nap wat mag-o” luk, tepan-e yoso bug-o. Meya nggal-e an-e mondok kwaroso bug-o.

³¹ An neyabu wanugwi nab-e enaru-o. Ap sal an neram lobok yidnak iri-ge an-e wok nak onposo-o.

³² Ap sal-e an nama lobok yogola-ge, keya onposoma, mbepme nene yugwi bug-o. An nama-ge ”Nggumer-o” luk tu-ge kuwarak nak woraso-o.

³³ Ap ereb-e it meya yidnag-e kura bugwi-o. Alat nde, an-e it-nen kwatli ereba nggal an meya yidnag-e kura boso bug-o.

³⁴ Kwaridnak pem ap oboksa-nen onpok pugwi bem-e an-e numud kaso bug-o. Ap-nen pesel unpugwi na an-e yebet kaso bug-o. An-e pesel nubuwa-o luk kwiye nak-nen mbepme lagit lak, mondok ma nak woraso bug-o.

³⁵ An-nen yusu wene yu-ge kulurak nab-e lag-a? Mondok owak mbarusu-o. An-nen yusu yeba-ge mondok ndemeret yusu-o. Nagawan Indo Amawi Worak iri-nen na an-nen yusu yeba-ge onggo yuwag-o. An nuwim nap-nen an nobok ”Iri kwaramu-o” luk pidnak nde engga bem mbaridnak nggal-nen-e an-nen karug-e,

³⁶ engga iri na-ge an-e nalen min-et waga nendakmbe bem peleb-o. Purug-e, nagawan-nen pugwi topi nggal nanggul pem peleb-o.

³⁷ An-nen kwarosolat woraidnak ereba na-ge oboksa Mbal Pem Nagawan yak teleb-o. At eram wok yosolar-e, nalen min-et nerare yek tak pem-et wok yeleb-o.

³⁸ An nde yabu wanoso nggweyak yu na nde ndemeret nggweyak ombo iri na inggem mengga yariya wanimindik-nen nde,

³⁹ yagimindik nasolat nde, yagidnak nap ereba na nde nere-t woragola, logak indimin nde ala-ge,

⁴⁰ an neyapmu-ge jelai mbato min nggandum mbato min nde yak yugu-o. Are, egere isile worak min tusuangge min nde yak mag-o. Ayup-nen yid wene-ge irir-o.