AYUP 3 - Nanduk Ngget Tul Pidnak Wene

Ayup-nen-e ”Noluk-nen-o?” luk yane worosolat Mbal Pem Nagawan yak tidnak wene 3:1-26

¹ Abok nggwe Ayup iri na ene yoso tel korosolar-e: ”Noluk-nen ndesa mbigi-o?” luk ndesa mbid iri na imbiri lamut tak pij-o. Iri yosolat-nen yosolar-e:

^2-3 Mbal Pem Nagawan wa-e. An ndesa mbigi tarem iri na min, kwat makluk neid-nen niya imin nene yid tarem kubu iri na min-e kat-nen imbiri lamut tak pi-o!

⁴ Mbal Pem Nagawan wa-e. Iri tarem iri-ge mom ki rak pi-o. Kat-nen yeptak worasu iri-ge korak pugunmu, iri tarem iri-ge meme yaga lak mag-o. Yaya-nen yaya rak puwakluk keya burak pug-o.

⁵ Iri tarem iri-ge miri tupsa mbeyok tak puruk, lumugumusa mom ndirik tak posolat, mom ki rak pi-o. Nggan nggan-nen muruk tak puruk, mo eyaya-nen eyaya rak puwa naru, nggetla keya bi-o.

⁶ Ndet yigi tarem iri-ge olengen min waneya min wonarogolat, an ndet yigi iri na yeberak woragolat, wonarogolat yuwa naru, mondok lak tak pi-o.

⁷ Nde, kubu iri tarem-e ndet yugwi buk tak posolat, enalin enalen yugwi elem mondok lak tak pi-o.

⁸ Kugwi ombo min Lewiatan yangunugwi enaru nap min wa-e. Tanggal iri na-ge owak mbatluk, imbiri lamut tak per-o.

⁹ O nda nda wonaru eyaya yugu-o. O kil posolat yaya makluk keya burak pug-o. At kubu iri-ge o ngget misik nda ma-o luk, we irit yik karok nak wolmag-o.

¹⁰ An-e anggun panggun kujwakluk, an niya-nen nderak nibid kubu iri-ge mondok imbiri lamut wolmag-o.

¹¹ Noluk-nen an-e niya arem-net wat yigit lak yigi-o? An-e ndesa mbosolat-net wat yek lag-et nde-o.

¹² Noluk-nen an-e niya-nen kamboksa abem tak nuburuk, kamo bem nibij-o?

¹³ Iri tarem-et an nde watlep nggal-nen-e abu wene lak sa nene yosolat woraleb-o.

¹⁴ Nagawan nagawan min enmawi worak min-nen nagawan unuwi nanduk woragwi ereba na tuguruk wiridnak ereba nggal me, nene yosolat woraleb-o.

¹⁵ An-e nagawan inlirak ereba na-nen it enma emas min perak min yebetsa pil ngguruk, nene yugwi ereba na nggal nene yeleb-o.

¹⁶ An-e li marik o eyaya kagit lag-et nggorak ndesa tarak nebelepma, wene lak woraleb-o.

¹⁷ Ap yapma inpil nggugwi sa arem ereba-ge meya kwarugwi nap-nen-e meya it-nen kwarugwi ereba na-ge kwarugwi bug-o. Iri-nen onggo wanurak pem yabu wanugwi nap-nen-e it enpabok lak yidnak ereba na-ge enpabok kwarugwi sa-o.

¹⁸ Nde, iri me-nen-e o kubu me inpil nggwidnak nap ereba na-ge it o kubu me inpidnak nap-nen lel mberel unpugwi ereba na nggal lel mberel inpigit lak, yamuksa woragwi sa-o.

¹⁹ Nde, iri me-ge ab-e kek tak na lak, teberak na lak, ndak ndak nak-nen yusu-o. Nde, iri me-nen-e onnggo pidnak nab-e wisirik woragwi-o.

²⁰ Noluk-nen ab-e anggun panggun kagolat wolmakluk keya unpusu-o? Noluk-nen yaya-ge indi puru bera woragwi nap wok undusu-o?

²¹ Ir-e silobulo-ge insili rak puruk, yapma unpurak irit indingen tak pili-o. Ir-e wat momtak towarak worali-t nde, ndag-et enpem lobok yusu bug-o.

²² It wat yosoma, yapma onposoma-net enalin enalen kagwi-o.

²³ Nde, it abok wolmomtak iri-ge Mbal Pem Nagawan-nen it enambigit kura bosolar-e, untula oboksa Mbal Pem Nagawan-nen nggelak puruk worasu-o.

²⁴ Nunggwi mende norak ondolma-ge, yane worosolat worasu-o. An-e pem irit yane nak wat tenak worasu-o.

²⁵ An-nen numud kasu ereba na-ge oboksa nebem mbusu-o. An-nen kwiye kaso ereba na-ge yemndak nubusu-o.

²⁶ An-e wene lak yamuksa worasu bug-o. An-e pempa andi bandi nak kerenak worasu-o.