AYUP 2 - Nanduk Ngget Tul Pidnak Wene

Tuguruk Sere-nen Ayup indi kagaid wene 2:1-10

¹ Misik tarem aid arem woragwi ereba na Nagawan Indo eram tuguruk ndok wiriga-o. Iri yogola-ge, Sere iri na min-et it inmin ndok wirij-o.

² Worala, Nagawan Indo-nen yak tosolar-e: ”Kar-e ngge me-nen lobok yigen-o?” yosoloma, at nen onggo yosolar-e: ”An-e nggweyak urugwe ombol yeba-t waring kil kil lobok yigi-o” luk yij-o.

³ Yosoloma, Nagawan Indo-nen kin wok obosolar-e: ”Kar-e ndegel noboso nap Ayup indi iri na-ge kwara abut mbarigen, lak? Nggweyakma wi yu-nen ap mbi indi konak, mondok tugup lak at nggal mbi mondok worali bug-o. Ar-e an nak nerembel wanosolat, mondok meya mbi kwarusu bug-o. Kat-nen-e erem lag-et nde, an-nen at meya rak peyekluk nemengen mbarigen-et nde, ar-e pempa tugup lak an nimin kundik worasu-o” luk yij-o.

⁴ Alat nde, Sere iri na-nen onggo yosolar-e: ”Indi min enpe ki wolmomtak min iri-ge mondok nggok-nen yusu-o. Alat nde, enarengge mende iri-ge nggog-e lag-o. Nggweyakma nab-e enarengge mende iri lak tak purak iri-ge ndag-et nde, mondok nggog-e enpe unluk wolmomtak iri nak nggog-o.

⁵ Kat-nen nde at ebe andi bandi rak posola-ge, iri-ge mondok ereya na-net imbiri lamut tak kubuwa-o” luk yij-o.

⁶ Yosoloma, Nagawan Indo-nen Sere iri na yak tosolar-e: ”Iri ala-ge, ob-o. Kat-nen kwat uburak perasu-ge kwat nak ibi-o. Alat nde mbigija-ge ebe iri perak wururak pug-o” luk yak tij-o.

⁷ Yosoloma, Sere iri na-ge Nagawan Indo eram-nen mborosolar-e, Ayup iri na ebem-e marigot ebem yela, ijok abis kuri-nen ereltel kuri irit woroksa yela keya bij-o.

⁸ Ayup iri na-ge iri kwarak eneyakngen mbo bidnak sa ereba na eralu koreyak nak woralar-e, piring telak pem aboro nggwat tenak woragij-o.

⁹ Worala, ogwe-nen at yak tosolar-e: ”Kar-e yu nggal kwasa woralar-et nde, tugup lak Mbal Pem Nagawan imin kundik woragun-a? Mondok Mbal Pem Nagawan imbiri lamut tak puruk wat min-o!” luk yak tij-o.

¹⁰ Yosoloma, Ayup-nen onggo yosolar-e: ”Kar-e inndi lak-nen yugwi nggal yusu-o. Nit-nen-e Mbal Pem Nagawan-nen konak mende wok nindidnak nak wanogolat, nde, meya wok nondosola-ge, keya burag-a?” luk yak tij-o. Nde, Ayup iri-ge andi bandi nggok ebem mbij-et nde, at-nen-e Mbal Pem Nagawan imin sirid mbarurak wene mbi mondok yak tigit lag-o.

Ayup anggamirak lobok yidnak wene 2:11-13

¹¹ Nde, angin worak mende Ayup ebem mbid ereba na wene-ge at anggamirak kenan nap ereya na-ge kuliga-o. Nde, kuliga nab-e: Teman nap Elipas min Sua nap Mbilndat min Nama nap Sopat min it iri-nen wene mbarogolug-e, Ayup indi yanggunurak kil lobok yiga-o.

¹² It kenan nap iri na-nen eram mborogolat-nen siyak erepma nggal-nen yik kaiganggal-e, Ayup abage-ge at abage nggal-e mondok kagit lak irit yiga-o. Iri ala karuk, ubud-nen yip sa nggwa mbogolat, unsum ndela keya bogolat, o liri kama teram nggwe mbo bil lagolat enanggul pem piga-o.

¹³ Iri kwarogolug-e, lengge tuju, kubu tuju irit Ayup eram nggweyak pem koreyak nak woraiga-o. It-nen yik kaiganggal-e, Ayup na-ge andi bandi kwiye worak irit worala karug-e, mondok enne mariget tet mondok wirik pigit lak irit woraiga-o.