AYUP 19 - Nanduk Ngget Tul Pidnak Wene

Ayup-nen yebet kasolar-e: ”Mbal Pem Nagawan-e an nambigir-et yusu-o” luk yebet kaidnak wene 19:1-29

^1-2 Alat nde, Ayup-nen onggo yosolar-e: ”Noluk-nen kir-e an nindi ngal pal kali-o? Kir-e kenne-nen numburugwi ngari rak pili-o.

³ Kir-e pem kundugu kandugu kinnggiri lag-et kenlengenma nggal tak nobogolat, lel mberel nibili-o.

⁴ An-nen nde ndemeret meya kwaridnak nde ala-ge, iri-ge kit kenpem-e lag-o. An nondomok nebem-net yusu-o.

⁵ Kit kinndi-nen-e: ’At yu nak meya yoso-o. Nde, nir-e konak nab-o’ luk perali-o. An-nen anggun panggun kasu yu-ge ’Meya kwarid-nen ndowaga ebem mbij-o’ luk yili-o.

⁶ Kir-e kwara kenaru mer-o. An-e Mbal Pem Nagawan-nen andi bandi rak nubusu-o. At esabu arem ngonoksa yilik nebarik worasu-o.

⁷ Ar-e isilepma min kwat nobosola, an-e imin eyak wurusu-o. Alat nde, ap misiger-o luk mbi-nen an-e lombot nibili bug-o. ’Mot mor-et kwat nuburag-et nde-o’ luk nene nggoksa yidnag-et nde, nene kulili bug-o.

⁸ An-nen mbururak tula-ge kerep leget-nen mbeyok tak pidnak me, an-nen kwid turuk mbururag-e meya yusu-o. Nurula marik ereba na at-nen ndamuksa mom ki rak pusu-o.

⁹ At-nen-e narengge mende oboksa mengga wanij-o. An nunu-ge meya rak pij-o.

¹⁰ At-nen-e tula ponok ponok-nen nebem mbud yosolat, ap-nen yagidnak mende emengen kona keya buruk, ereba-t keya bosoma terabet yoso nggal, an-nen ninndi ebem wat tak puruk woraso mende oboksa erem konak pamu-o.

¹¹ Mbal Pem Nagawan-nen-e an-e wim nap nggal tak nuburuk, an nebem-e isilepma kwiye worak nubusu-o.

¹² Nde, at-nen idnak san ombo-ge mondok pak turak puk irit lobok yogolar-e, nebem mbud yogolar-e, an nurula nggologolat, an nuwi lije lop lop witli-o.

¹³ Mbal Pem Nagawan-nen an nowe nowor-e enarem wanosola, ir-e an neram worali bug-o. An nimin kundik nap-net nde, nin nap nggal yik neyali-o.

¹⁴ An nelem nap-net nde, oboksa an naye ndigitli-o. An nenggamirak-nen na inndi-ge an nebem-e worali bug-o.

¹⁵ An ndegel nubugwi kweyap-nen na an-nen onnggo pigi onmbo na-t nde, ’At iri-ge ta-o?’ luk nde meme rak nibili-o. It-nen-e an-e ap sal nggal nde yik neyali-o.

¹⁶ An-nen-e ndegel noboso nap wene mbo ibidnag-et nde, wene onggo-ge yoso bug-o. Nene ndamak pem-et indi yanggunidnag-et nde, nene koloso bug-er-o.

¹⁷ An nogwe-nen na nemnde age emben karug-e, sok wereyekluk yoso-o. An nowe nowot neyabi minggirik-net nde, neram panggosa wagwi bug-o.

¹⁸ An nde tula mborosola-ge, li marik-nen-e enlengenma nggal tak nibili-o. Nde, an nde mendak worasola-ge, nda nitli-o.

¹⁹ Nenggamirak an nimin panggarak-net nde, an yik neyarug-e, unmunggum nak pil neyali-o. An nen nindi kundik ereba na-net nde keya nak nibili-o.

²⁰ An-e abu nirisewak min li luk woralar-e, mondok wat momtak pem nindisep worok yekluk irit worasu-o.

²¹ Mbal Pem Nagawan inggi-net nurusu me, nenggamirak wa-e. Nabuwa yer-o!

²² An-e Mbal Pem Nagawan-net kundugu kandugu anggun panggun tak nubusu-t nde, kit-nen na noluk-nen at-nen kwarusu nggal-et kwat nibili-o? Kir-e an andi bandi rak nibili-t nde, kenpem-e lasu buk, lak?

²³ An-nen yusu wene-ge meme ma naru, obok yeberak wolmomtak pem engga bem mbal mag-a!

²⁴ Are, iri mbarogolar-e, kora labuk ma naru, pem kona wolmaklug-e, mbesi bem-nen kerep pem mbal mag-o.

²⁵ Aid arem-e an nambigit yurak nab-e worasur-o luk naru worasu-o. Abog-e an yongga nururak pem-e lobok yuwar-o.

²⁶ An naboro-ge ud-nen abu lak tak puwa-t nde, an nde nuruk-nen-e nerengen-e Mbal Pem Nagawan kamin-er-o.

²⁷ An nondomok nerengen-net kamin-o. Mbal Pem Nagawan iri-ge an nanggam kwat ma-o. Kit-nen yak nitli ereba-nen ndowaga an nindi abi kala keya bili-o.

²⁸ Kit-nen yogolar-e: ’Nir-e nggerak puruk andi bandi rak pul-o?’ Kir-e erem kwaruwokluk tu kore yili-o.

²⁹ Mbal Pem Nagawan-e isilepma-nen meya yugwi nab-e angin worak enpem poso me, yawo-ge at eyalawi iri-ge kwiye ker-o. Nde, iri kwaruwa iri-ge Mbal Pem Nagawan-e ap enpem-e wene-t mbaroso-nen yusu-o luk kenaru makluk-nen kwaruwa-o” luk yij-o.