AYUP 14 - Nanduk Ngget Tul Pidnak Wene

Ayup-nen nggweyakma nab-e wewesa nunluk worali-o luk yane worosolat-nen yidnak wene 14:1-22

¹ Nggweyakma nab-e ndesa mbogolat-net ndeyak enmawi lak irit ndesa mbugwi-o. Unluk woragolat na poro bem-et woragolat, andi bandi nak woragwi-o.

² Engen isi nggal engen isi wosoksa peralug-e, tuguruk terabet yoso iri nggal-nen yusu-o. Pemsa woragwi bug-o. We enamorok nggal nak woraruk, lak yugwi-o.

³ Mbal Pem Nagawan wa-e. Kat-nen an nggal yik niyudtak iri-ge ob-er-a? Kat-nen-e kat-nen ap enpem wene konoso sa iri na me nebem wene mbenarurak nibil lobok yugun-a?

⁴ Meya kwarugwi nap-nen-e konak iminep mbarak mende mbi-ge mondok kwarugwi bug-o.

⁵ Ap unluk wolmomtag-e kat-nen: ”Olengen-e iri nggal wolma-o” luk wonarak pidnak worasu-o. Waneya na ”Iri nggal-et wolma-o” luk lud tak pidnak worasu-o. Kat-nen: ”Kir-e ereya bem nggal nak kunluk wolmomtag-o” luk kuri bidnak worasu-o. Iri bigen iri kwidsa ombol nggwe nggal unluk wolma bug-o.

⁶ Ar-e uruk worasolat, eyabu iri na iminep mbarak puwakluk sil kudtak pug-o. Ababok kwaruwakluk keya burag-o.

⁷ E ndarak posoma-ge, undugul-nen kwarurak iri-ge worasu-o. Ndarosoma-ge, undugul iri na-nen isit puluruk, laruk ondogwal wigaroso-o.

⁸ Emengen nggweyak arem ereba na-ge lebe luk, nggweyak kwat yosolat, undugul na lebe yosolat kwaridnag-et nde,

⁹ yi-nen piri rak posolar-e, isit iri na-ge mbutluk, ngget yagidnak nggal inggi angga poso-o.

¹⁰ Alat nde, ap wat yogolar-e, abu ondoro min lak yugwi-o. It wat lug-e, ngge me nde mburugwi-o?

¹¹ Yi yinggirik ondoro nak yoso nggal, yi eberek yoso nggal,

¹² iri nggal kwasa ap wat lug-e, unluk yugwi bug-o. Mbiringgik irit worasola, mbal lak ma-t nde, unluk ma bug-o. Mondok nene yidnak iri na-ge men yugwi bug o.

¹³ Ap watluk ndok wurugwi sa kura nibi-o. Nggetlel nuburuk irit worasoma, kat kisilepma lak mag-o. Kindi an yebet niyudtak lud tak pi-o.

¹⁴ Ap wat lug-e, tuguruk unluk yugwi-a? An-e andi bandi kerenak worasu yu-ge mepme-nen lak ma-o luk, kup nggal keyam nggal tag-et yik karok worasu-o.

¹⁵ Nde, kat-nen an wene mbo nobosola, an-nen wene onggo yimin-o. Kat-nen-e kat kinggi-nen ndak worak nibigen yu nabuwa kagun-o.

¹⁶ Iri lug-e, kat-nen-e an nuwok pil lamin oboksa yik neyarok woragun-o. Alat nde, an-nen meya kwaroso-ge wonat tenak woragun pug-o.

¹⁷ An-nen meya kwaroso-ge kamberam tak puruk, lak tak pugun-o. An-nen nanduk-nen meya kwaroso-ge kat-nen kora lak tak pugun-o.

¹⁸ Ndobo oboksa ndamera ngguru yosolar-e, nari wari sa labuk ma-o. Ndobo tumbu mendak tugup lak ereba na-ge ondolma-nen langgona nin me mburuwa-o.

¹⁹ Yi-nen kerep lel tenak mbot marik tak posolat, talme nggok mbosolat-nen nggweyag-e waruk mborosolat kwaroso iri nggal, kat-nen-e nggweyakma nap-nen inndi ebem wat tak puruk woragwi-ge yigisa lak tak poso-o.

²⁰ Kat-nen-e ab-e mondok abu abu irit urugwe nggwe rak onposo-o. Kat-nen wirik onposolat, entare-ge mondok nin tak onposo-o.

²¹ It inlirag-e ap kek tak nggok irit kwat yogola-t nde, it ineidtak-nen-e enaru buk woragwi-o. Nde, it inlirak nde enlengenma lak kwat yidnak na ineidtak na yak undugwi bug-o.

²² It ereba-ge enpe andi bandi kagwi iri na nak yebet kagwi-o. It ondomok inndi puru bera woragwi iri na nak yebet kagwi-o.