AYUP 1 - Nanduk Ngget Tul Pidnak Wene

Ayup Sere-nen Ayup indi ngaridnak wene 1:1-12

¹ Nde, o Us nggweyak pem iri me-ge ap misik woragij-o. Iri unu-ge Ayup. At iri-ge Mbal Pem Nagawan imin kundik worasolar-e, imin tugup lak irit woragij-o. Nde, ar-e konak nap woralat, indi nggat nggat worak, meya na marig-et tet kwaroso buk irit woragij-o.

² Nde, at ilirag-e ab-e enpe tuju, nde, kwami-ge kenan irit inmin woragij-o.

³ Nde, ereb-e at-nen onnggo pidnak ndegel ubugwi nab-e kwarat woraiga-o. Nde, olomba wam-e 7.000, nde, unta wam-e 3.000, nde, esapi wam-e 1.000, nde, egelerai wam-e 500, nde, nggaruksa yosolar-e, o siri mo luwaso (timur) nggwe worali ereba ennggendumu-nen-e at yu nak aringgi arengge kwarat woragij-o.

⁴ Nde, Ayup ambararak tuju ereya na-nen pem kwarugwi-ge misik tarem-e at misik ama-nen nggok saguruk, iri nggal-et misik tarem-e at misik ama-nen nggok saguruk kwarugwi-o. Iri kwasa sakolar-e, intidtak kenan ereya na-ge ”Yi min nunggwi mende min lambuksa misik mu norag-o” luk yonggo unpugwi-o.

⁵ Nde, sagurug-e, sagidnak ereba na irit wosa Ayub-e kubu kabu men yosolar-e, ilirak meya yidnak ereba na Mbal Pem Nagawan-nen amberam tak puwakluk pempa at ilirak ereba na enmanggim lombok wam wosa kan posolat woragij-o. Nde, iri kwaroso iri-ge Ayup-nen perasolar-e: ”It inndi-nen mboroksa-ge kwarigit lag-et nde, it-nen meya mbi kwarogolat, Mbal Pem Nagawan pesel pidnak worasu, lak?” luk-nen enmanggim wam wosa kan posolat woragij-o.

⁶ Nde, misik tarem-e aid arem woragwi ereba na Mbal Pem Nagawan eram ndok worogola-ge, at Sere na inmin-et wok yij-o.

⁷ Wok yosola, Nagawan Indo-nen Sere iri na yak tosolar-e: ”Kar-e ngge me-nen lobok yigen-o?” luk kin wanosola, at-nen onggo yosolar-e: ”Nab-o. An-e nggeret nak ponok ponok yeba waring kasolat, nggweyak urugwe ombol yeba kambuk tak posolat woragirig-o” luk yak tij-o.

⁸ Yosoloma, Nagawan Indo-nen kin wok obosolar-e: ”Kar-e an ndegel noboso nap Ayup-nen worasu abage iri-ge kwara kaigen, lak? Yi wi ndi wi oboksa-nen mbi at Ayup iri nggal indi tugup lak, konak iri nggal mbi worali bug-o. At iri-ge an nak kek tak nobosolat, meya mbi mondok kwarusu bug-o” luk yak tij-o.

⁹ Alat nde, Sere iri na-nen onggo yosolar-e: ”Kat-nen wok tusu ereba bem-nen kat kek tak kubusu-o.

¹⁰ At iri-ge ogwela min ilirak min aringgi arengge min ereba-ge kat-nen pempa nggetlel unpuruk worasu-o. At-nen kwaroso iri-ge kat-nen imbiringgat tak posolat, owam na kat-nen kwarat tak posola, o iri me yebet yurak ndak irit wok tusu-o.

¹¹ Alat nde, kat-nen at arengge mende ereba oboksa nde wanosola-ge, wanosola ereya na-net kar-e imbiri lamut tak kubuwa-o!” luk yak tij-o.

¹² Yosoloma, Nagawan Indo-nen Sere iri na yak tosolar-e: ”Iri ala-ge, ob-o. At arengge mende ereba oboksa kat-nen-e kindi-nen pidnak ereba kwari-o. Alat nde, at ebe perak marig-et tet andi bandi rak purak pug-o” yosoloma, Sere iri na-ge Nagawan Indo eram-nen mbirij-o.

Ayup ilirak min owam min lak tak pidnak wene 1:13-22

¹³ Siyak woraruk misik tarem-e Ayup ilirak ereba na-ge onowe manggiya iri na ama nggwigarik, nunggwi mende nggok saiga-o.

^14-15 Nde, mimo ap misik wene waruk Ayup eram ndag-et nak pong kil lobok yosolat-nen yosolar-e: ”Nombo wa-e. Seba nap lobok yogolar-e, kelerai wam-e korok ereba na tusuangge tarosola, nir-e sapi wam ereba na bem-nen nggweyak yalukmu, nenpem mbud yogolar-e, ndegel kubugwi nab-e oboksa mondok ondogolat, nde, wam ereba na-ge mengga waniga-o. Nde, ndegel koboso nap an nak perak mengga mbirigirik, wene waruk keram lobok yigi yur-o” luk yak tij-o.

¹⁶ Nde, at iri na wene ereba na yosoma-ge, ndegel oboso nap misik lobok yosolat-nen yosolar-e: ”Nombo-o. Kolomba wam ereba na min lomba yik karok woragwi nap ereba na min-e obinel yebek yosolar-e, oboksa endamu-o. An nak nuruk-nen wene waruk keram lobok yigi yur-o” luk yak tij-o.

¹⁷ Nde, ap iri na wene iri na awo worok tak pigit lak yil-et mborosoma-ge, ndegel oboso nap misik lobok yosolat-nen yosolar-e: ”Ap nden unpugwi Kasndim nap kere kenan puruk ngguwagolar-e, unta wam ereba na mengga wanogolat, ndegel kubugwi nap ereba na-ge oboksa indiga-o. Iri yogola, an narig-et nak mengga lobok yigirik, wene waruk lobok yusu yur-o” luk yij-o.

¹⁸ Nde, at iri na awo wene ereba na yak tosolat worasoma-ge, ndegel oboso nap misik wene waruk lobok yosolat-nen yosolar-e: ”Nombo-o. Kat kilirak ereba na-ge onowe manggiya iri na ama nunggwi mende nggok sagukmu,

¹⁹ mimo o wija nggok nembaga nggwe-nen puk karuk lobok yosolar-e, o unggut manda inditwak ereya na wat kasolar-e, o iri na tud yosolar-e, kat kilirak oboksa o min tebera worak enpamu, an nak nuruk-nen wene waruk keram lobok yigi yur-o” luk yij-o.

²⁰ Yosoloma, Ayup na men yosolar-e, indi abi kalok yosolar-e, usum ndela bela keya buruk, anggulsu pena keya buruk, erare nggwe tud luk-nen

²¹ yosolar-e: ”An ndet yosolar-e, ngenwa-t ndesa mbukmu-o. Wat yosolat na we ngenwa irit wat yimin-o. Nagawan Indo at-net wok niridnak me, wanosolat na at-net wanij-o. Iri ala, at unu nak kek tak wolmag-o!” luk yij-o.

²² Ayup iri-ge anggun panggun mende iri nggal ebem mbij-et nde, meya mbi yigit lak, Mbal Pem Nagawan na obok pigit lak irit woragij-o.