AMOS 9 - Nanduk Ngget Tul Pidnak Wene

Nagawan Indo-nen angin worak enpem purak iri na nabi nggal pem kagaid wene 9:1-10

¹ Nde, an-nen yik kaginggal-e Nagawan Indo-ge Nagawan Indo amanggim wam wosa kan pugwi ondoro iri na eralu mendak kagi-o. Nde, at-nen-e wene yu nebem pij-o. At-nen yosolar-e: ”An nuwi iri me panggo ereba na oboksa lele yuwakluk, an nuwi iri owak ereba na eraret oboksa mondok amawisa lel kil lobok yurag-o. Owak ereba-ge ap enanggul pem-et worak unpuwakluk mbud tak pil lobok yurag-o. Nde, erep unluk wolma ereba na-ge wim pem-nen indimin-o. Ap misiger-o luk mondok mengga mburuwa bug-o. Misiger-o luk na agap nggarik mburuwa bug-o.

² Nde, it iri-ge ap watluk mbugwi sa kapsa mbuwa-t nde, an ninggi-ge inmbirig-et lit iniyil mbimin-o. It mbal pem lujwa na mbal pem-net lesa inpil mbuwamin-o.

³ Ir-e Karamel Ndobo anggul pem kurak yuwa-t nde, an-e onkore-t yimindik, tenat inpimin-o. Yi koma erabun arem ereba kurak yil mbuwa-t nde, yi koma arem woraso nanggu iri na yak tumu, eyak yilig-et unpuwa-o.

⁴ Nde, it nde wim nap-nen kugun pem wok unpuruk mborogola-ge, unduwakluk wim nap enarem yabu wanimin-o. An nindi-ge lak tak unpurak iri nak wat tak pidnak me, mondok yongga indimin pug-o” luk yij-o.

⁵ Nagawan Indo Mondok Kek tak, Amawi worak iri na nen o yu sil kasola, o yu lele yosolat, o yu ebem woragwi nap oboksa-ge unmud-nen yip tuwa-o. Yi Nil-nen ebe kobong luk, leyok luk kwaroso nggal o yu-ge laruk mburuk kwat tenak wolma-o.

⁶ Nagawan Indo-nen-e mondok mbal pem teram abu me-ge at uwi wurusu-o. Nggweyak ombol pem-e mbal nggal nenasa keya busu-o. Yi koma yi-ge nggweyak worak nggwe kiril kasu-o. Nde, ereba oboksa kwarusu iri unu-ge Nagawan Indo-o!

⁷ Nagawan Indo-nen yosolar-e: ”Isarael nap wa-e. An-nen kit kwara yebet keneyasu iri na nggal-et Sundan nab-e kwara yebet eneyasu-o. Nde, it Mesira-nen wok kunpuruk lobok yigi iri nggal-et Pilisin nab-e o Kereta-nen wok unpuruk lobok yosolat, nde, Siria nab-e o Kiri-nen wok unpuruk lobok yosolat yigi-o.

⁸ Nagawan Indo Mondok Kek tak an-e Isarael nap-nen tenagidnak wi meya nak kwat tenak worali yu kwara limbit lombot onposolat worasu-o. Nagawan Indo an-nen yusu-o. An-nen-e Isarael nab-e mondok nggweyakma yu me-nen pusa lak tak inpimin-o. Alat nde, Yakup-nen wigarag-e mondok oboksa-t lak tak inpimin pug-o.

⁹ An-nen ’Iri kwarurag-o’ luk wene wirik pumu, nggandum mbato ebe min abapno min lunugwi nggal, pil kagwi mende bem-nen Isarael nab-e pil kujwa-o. It ennggendumu ebe lak mende ereba na oboksa lena keya bosolar-e, it ereba na-ge nin nap ennggendumu naruk karuk tak inpimin-o.

¹⁰ Nde, an nilirak ereba na ennggendumu worali meya yugwi nap ereba na-nen yogolar-e: ’Mbal Pem Nagawan-nen-e lak tak onposo mende-ge nit nenpem mbumakluk keya nunpuwa bug-o’ yili-t nde, it iri-ge ndemeret wim pem-nen unduwa-o” luk yij-o.

Isarael iri me nanduk-nen woragwi nggal tuguruk ondolma rak purak yidnak wene 9:11-15

¹¹ Nagawan Indo-nen yosolar-e: ”Ndaut-nen tenagidnak wi iri na-ge an-nen tuguruk nanduk woraso nggal ondolma rak purak tarem-e wog-et ma-o. Nde, yawo-ge at-nen tenagidnak wi iri na-ge o tud yidnak nggal tud tak worasu-o. Alat nde, an-nen-e o iri na worosolat, kebet tuguruk konimin-o. Konumu-ge, o iri-ge nanduk worasu iri na nggal-et ondolma rak pimin-o.

¹² Nde, Isarael nap-nen-e o Erom nggweyak siyak wanigit lak woraso ereya min ap enlem oboksa nandug-e an narengge woragwi ereba na min-et Isarael nap-nen urugwe nggwe rak unpuruk wolma-o. An-e Nagawan Indo-nen yigi-o. Wene iri-ge an-net kwarimin-o” luk yij-o.

¹³ Nagawan Indo-nen yosolar-e: ”Nggandum mbato ndag-et nak mborosolat, ebe mbarogolat na pempa kundugu kandugu mbal tenak nak woragolat, anggut ari na ndag-et nak mborosolar-e, wigak yosolar-e, ab-e pempa anggut engen amburu-ge pempa amburu mbelel tenak nak woragolat, anggut amburu ndobo ereba na bem-nen yik sik mborosolat, ndobo amun ereba na bem-nen urusu kundik mbururak tarem-e wog-et ma-o.

¹⁴ An-nen nilirak Isarael nap kwarak onposolar-e, yi mende ndi mende bem nanduk-nen woragwi nggal tak onposola, it-nen-e it unuwi siri tud yil lobok yid ereba na-ge tuguruk wiril lobok lug-e, iri me-t woragolat, anggut yabu wanogolat, anggut uwi yagidnak ereba na engen amburu nonggolat, uwi yakolat, yagidnak ereba na ebe nonggolat kwat tenak wolma-o.

¹⁵ An-nen-e nilirag-e an-nen nggweyak wok indigi sa iri na me-t koreyak inpimin-o. Iri yumu, it iri-ge iri me-nen tuguruk kona wirik unpuwa bug-o. An-e Nagawan Indo it Enmbal Pem Nagawan-nen yusu-o” luk yij-o.