AMOS 8 - Nanduk Ngget Tul Pidnak Wene

Nabi bem nggal mul sum arem engen yarak kaidnak wene 8:1-3

¹ Nagawan Indo Mondok Kek tak iri na-nen nabi bem nggal misik mirik nibij-o. Mirik nobosola, an-nen yik kaginggal-e mul sum misik arem-e engen mondok ogwere nak yarak irit kagi-o.

² Nagawan Indo-nen an kin wok nobosolar-e: ”Amos wa-e. Kar-e no kasu-o?” yosoloma, an-nen onggo yosolar-e: ”Mul sum misik arem engen ogwere yidnak nak yarak iri kasu-o” luk yak tigi-o. Yosolakmu, Nagawan Indo-nen yosolar-e: ”An nilirak Isarael nap kwat unpurak tarem-e abu luk keya bij-o. An-e it kwat unpurak peragi iri-ge mondok nin tak pimin pug-o. Mondok ndemeret angin worag-e enpem-et mberak pimin-o.

³ Nde, iri tarem-e nagawan woraso sa-nen ndawi yugwi ereba na-ge yip lilan ndawi nde kwat ma-o. Nin me nan me ereba me-ge ap worak mbik mbok mbo inpidnak nak liring arem mburuwa-o” luk yij-o.

Isarael nap angin worak enpem purak wene 8:4-14

⁴ O yu me woragwi insilobulo lak nap lel mberel onpogolat lak tak inpili nap wa-e. Kwara koler-o!

⁵ Nde, kit kondomok-nen yik koragolar-e: ”A! Nggok sakwi tarem-e mot pem-et worasu yu-ge mepme tarem-nen lak ma-o? Nir-e nenggandum mbato onggo wanugwi tuguruk tel kuruwom-a! Nde, we woragwi tarem yu-ge mepme-nen lak ma-o? Nir-e onggo wanugwi tuguruk tel kuruwom-a! Nit-nen onggo wanogolar-e, mariger-et nde, onggo kek tak pogolat, ndak wosa wok undugwi mende bem angin-e enmberam laga ndak wosa wok ondogolat kwaruwom-o.

⁶ Nggandum mbato meya yidnak ereba na-ge nir-e onggo keksa wene wurul-o. Nde, insilobulo lak nap-nen namat wanogolar-e, onggo-ge unuwok sum misiget onggo pugwi ndak ndag-et marik wanidnag-et nde, uwi yaburak meya ala, ndegel nunpurak nap tak unpuwog-o” luk yili-o.

⁷ Iri yogola, Nagawan Indo Isarael nap Enmbal Pem Nagawan-nen owak mbarosolar-e: ”An-e it-nen mondok meya kwatli yeba-ge mondok meme rak pimin pug-o.

⁸ Nggweyak min lele yosolat, ap oboksa-nen unmud-nen yane worogolat, o oboksa-nen ye le mbogolat, Yi Nil-nen kwaroso nggal-et nden penden mbuwa-o.

⁹ An-nen mo lenggesilmu-t nde, mo wusa mberak posolat, lengge-t nde, o ndamuk tak purak tarem-e awo wok ma-o. Yu-ge Nagawan Indo Mondok Kek tak an-nen yusu-o.

¹⁰ Kit-nen kenalen pem nggok sakwi tarem-e an-nen tabun puruk woragwi rak posolat, kit-nen kenalen pem ndawi yugwi ereba na-ge yip tugwi nde kwarak pimin-o. Kinndi puru bem worali-o luk yenggerak puwakluk an-nen-e kit kenanggulsu labena keya buruk, karung sum yirik kinpimin-o. Kir-e inlirak misiget nderak iri na wat yosoma, ineid iniya-nen la iri na ubud yip tili iri na nggal yip tugub-o. Iri kwat kinpimin tarem-e kwarat kinndi puru pera rak perenak iri-net lak ma-o” luk yij-o.

¹¹ Nagawan Indo Mondok Kek tak iri na-nen yosolar-e: ”O yu bem nogoro pil lobok yimin tarem-e wog-et ma-o. Ab-e nere-ge yuwa-t nde, nunggwi mende nere-ge lag-o. Ab-e yi nere yuwa-t nde, yi nere-ge lag-o. Alat nde, an-nen yidnak wene nere nde nunggwi mende nere nggal, yi nere nggal irit kagolat wolma-o.

¹² An-nen yidnak wene kore waring kagolar-e, abare abam (utara) nggwe-nen abare ena (selatan) nggwe mborogolat, mo luwaso (timur) nggwe-nen mo mboso (barat) nggwe mborogolat kwaruwa-t nde, an-nen yidnak wene-ge mondok kuluwa bug-o.

¹³ Nde, iri tarem-e sujwe ndugum enpem mbenak konag-et nde, yi nere-nen ndowaga inkiris paga mbud ma-o.

¹⁴ Nde, ap Samaria unkugwiwak iri na unu bem owak mbarogolat-nen yogolar-e: ’Enlem Ndan min Mbereseba min unkugwiwak owag-o’ yuwa nab-e ma-ge mondok men-e ma bug-o” luk yij-o.