AMOS 7 - Nanduk Ngget Tul Pidnak Wene

Nabi bem nggal Nagawan Indo-nen angin worak enpem purak kagaid wene Sil

¹ An-e Nagawan Indo Mondok Kek tak iri na-nen nabi bem nggal misik mirik nibij-o. Nabi nggal pem an-nen yik kaginggal-e, nagawan amanggim nggandum mbatluk, mbaridnak ereba na me nggeret arok miri lasola tarem-e Nagawan Indo-nen-e sil oro kwarat mondok ndak wosa posola kagi-o.

² Nde, sil oro ereba na-nen-e nggweyakma-nen yak yoso mende ereba na-ge mondok oboksa nasola kagi-o. Iri yosola karuk, an-nen yosolar-e: ”Nagawan Indo Mondok Kek tak wa-e. Kat kilirag-e it-nen meya yidnag-e kamberam tak pi-o! It iri-ge mondok marik, enmawi lak-nen yili-o. It nggal-e nggesa-nen unluk wolma-o?” luk yigi-o.

³ Yosolakmu, Nagawan Indo-nen at-nen kwarurak peragid iri na larok yosola-nen yosolar-e: ”Kat-nen kaigen iri-ge kwat ma-ge lag-o” luk yij-o.

Kanduk

⁴ Tugurug-et Nagawan Indo Mondok Kek tak iri na-nen nabi misik mirik nobosolar-e, an-nen yik kaginggal-e, Nagawan Indo-ge at ilirak iri na-ge it-nen kwarugwi onggo kanduk enpem mberak purak lid lud tak posolat kagi-o. Nde, kanduk iri-nen-e mondok yi koma nggweyak arem ereba na leraben waga nasolat, nggweyak min-et nayekluk yosola kagi-o.

⁵ Karuk, an-nen yosolar-e: ”Nagawan Indo Mbal Pem Nagawan wa-e. Kanduk iri-ge nigirik pi-o! Kilirag-e mondok marik, enmawi lak-nen yili-o. It nggal-e nggesa-nen unluk wolma-o?” luk yigi-o.

⁶ Iri yosolakmu, Nagawan Indo-nen at-nen kwarurak peragid iri na larok yosolat-nen yosolar-e: ”Yawo kaigen yu min-et kwat ma-ge lag-o” luk yij-o.

Ndak wurugwi kere mot ndung tak

⁷ Nagawan Indo-nen tuguruk nabi nggal misik mirik nobosolar-e, an-nen yik kaginggal-e, ar-e o kebet misik iri na eralu mendak kagi-o. Nde, kebet iri na worogolar-e, mot ndung makluk kere bem-nen ndak wosa wiridnak kebet iri na eralu inggem-e o kebet iri-ge mot ndung tag-et, lak? Are, wonok tag-a? luk ndak worosolat ndak wurugwi kere inggem tenaga kagi-o.

⁸ Nde, at-nen an yak norosolar-e: ”Amos wa-e. Kar-e no kasu-o?” yosoloma, an-nen onggo yosolar-e: ”Nagawan Indo wa-e. Ndak wurugwi kere iri bem-nen mot ndungsa ndak wururak iri kasu-o” luk yigi-o. Yosolakmu, Nagawan Indo-nen yosolar-e: ”An-e ndak wurugwi kere yu bem-nen an nilirak ndak wat onposoma-ge, ndung tag-e lak, wonok tak nggal-nen yili-o? luk mirik unpusu-o. An-nen nindi yimnigi iri-ge mondok nin tak pimin pug-o. Mondok angin worak enpem mberak pimin-o.

⁹ Isak-nen wigarak-nen an nerembel wanugwi ondoro ereba na-ge mondok yigisa lak ma-o. Isarael nap-nen an nerembel wanugwi sa marak ereba na-ge mijara langgu rak puwa-o. Nagawan Yerobeam-nen wigarag-e mondok an-nen lak tak inpimin-o” luk yij-o.

Amos min Amasia min onowene

¹⁰ Nde, Mbetel woraso tepan ombo Amasia iri na-nen wene yu Isarael nagawan Yerobeam eram pil mborosolar-e: ”Amos-nen-e ap oboksa nagawan kat kuruwakluk wene ngal undusu-o. At-nen ap enarem woragusu iri-nen ndowaga o yu-ge mondok meya ma-o.

¹¹ Nde, Amos-nen yosolar-e: ’Nagawan Yerobeam iri-ge wim pem wuruwa-o. Nde, Isarael nab-e it unuwi nggweyak keya buruk, mondok erepma ereba-t mberena mbo inpil mburuwa-o’ yusu-o” luk yij-o.

¹² Iri luk, Amasia-nen Amos yak tosolar-e: ”Awo ma-net yik kaso nap wa-e. Kar-e tuguruk kuwi Yewura nggweyak pem mbiri-o! Mburugundik, iri me-nen aid wene yak indi-o. It-nen nunggwi mende-ge wok korogolat wolmag-o!

¹³ Alat nde, Mbetel yu me-ge nagawan arig-et nak Nagawan Indo erembel wanoso-nen yusu-o. Nagawan yu me-nen tenagidnak wi woragwi-nen yidnak Mbal Pem Nagawan uwi-nen yusu me, kar-e Mbetel yu me-nen urul purak pug-o” luk yij-o.

¹⁴ Yosoloma, Amos-nen onggo yosolar-e: ”An-e Mbal Pem Nagawan ene lomboksa yoso nap na lak, Mbal Pem Nagawan ene lomboksa yoso nap-nen nderak na lag-o. Alat nde, an-e wam ndogoroso nap, e ara engen mbaroso nap-nen yusu-o.

¹⁵ Alat nde, Nagawan Indo-nen-e lesa at-nen yidnak wene Isarael nap yak unduwakluk wok nebamu-o.

¹⁶ Iri bem-e, Nagawan Indo-nen yak kurusu wene-ge kwara kuli-o. Kar-e an yak norosolar-e: ’Kat-nen enpem mbud yosolat aid wene yusu iri-ge keya burag-o’ yak nurusu iri bem

¹⁷ Nagawan Indo-nen kat Amasia yak korosolar-e: ’Kat kogwe-ge o siri tula ereba me terak ap nin inmin waring kaso kwat yosolat, kat kilirak na wim pem ondogolat, kat konggweyak na ap-nen tembesa wanogolat, kat kebe na Nagawan Indo enaru buk unuwi nggweyak pem ereba me wat yugun-o. Nde, Isarael wi woragwi nab-e ndemeret mberen unpuruk mburuwarik, mbo inpil mburugwi sa ereba me inpil mburuwa-o. Nde, iri-ge it woragwi sa keya buruk, nin sa-t inpil mburuwa-o’ yak kirij-o” luk yak tij-o.