AMOS 6 - Nanduk Ngget Tul Pidnak Wene

Isarael nap yigisa keya inpidnak wene 6:1-14

¹ Kit kenalen pem Sion woragolat, kit konak yamuksa Samaria woragolat yili nab-e mondok kenabuwa-o! Kenlem Isarael nap kennggendumu kenne kulugwi nap, mondok kek tak worali nab-e kit kunuwokma woragwi Isarael nab-e yongga undurak pem-e kit kendam-et lobok yugwi nap kir-e mondok kenabuwa worag-o!

² Kir-e mburugupndik, o Kalne kagoluk, nok mburugupndik, o Amat siri nggok iri me mberer-o. Pilisin iri me o siri Nggat mberer-o. Kit kinndi arem-nen-e o siri Yewura min Isarael min-e meya rak puruk, o siri ereba nak konak tak pili-a? Kit-nen tenagidnak wi-ge marik tak puruk, it-nen tenagidnak wi-ge nggok tak pili-a?

³ Lak tak onposo tarem lobok yurak iri-ge yanem-er-e lag-o luk perali-t nde, kit-nen kwatli mende ereba-nen-e isilepma bem lel mberel kunpurak tarem iri na panggo rak pili-o.

⁴ Kit nene yugwi ondoro mondok konak pem nak mbinggirik woragolat, sapi uno min lomba usul uno min ereba na nak nggok saga nonggolat worali nab-e mondok kenabuwa worag-o!

⁵ Kir-e kenalen pem nde Ndaut-nen kwaroso nggal ndawi mbela ngarogolat, ndawi iri na-ge kecapi poba ene rak pogolat yili-o.

⁶ Kir-e anggut engen amburu embe kobong tak ereba na nonggolat, amburu emben konak onggo nggok pugwi ereba na kenpem ndarogolat kwatli-t nde, kir-e Isarael nap lak tak unpurak iri na bem kinndi puru luk, yip tili bug-o.

⁷ Iri kwatli iri bem-e mondok kit nandug-et mberena mbo unpugwi sa kinpil mburuwa-o. Iri kwaruwama, kit-nen nggok sakolat kenalen pugwi ereba na-ge lak ma-o.

⁸ Nagawan Indo Mbal Pem Nagawan Mondok Amawi worak, Kek tak iri na-nen ene amawi min enpem posolar-e: ”An-e it nagawan woragwi sa enalen pem mondok konak nak woragwi sa ereba-ge nindingen kasu bug-o. It unuwi siri iminepma iri min iri me woraso mende oboksa min an-nen-e kegera wim nap ininggem pimin-o” luk watsa yij-o.

⁹ Nde, ap enpe sepulu o misik arem kurak tak wolma-t mondok war-et ma-o.

¹⁰ Wat yidnak nap ereba na winde misik lobok yuwarik, ap wat yidnak ereba na wok unpuruk o ma-nen wurungsa mborosolat-nen ap misik o iri na arem wolma ereba yak ondosolar-e: ”Ap erep mbi kinmin worali, lak, ngge-o?” luk yak unduwa-o. Alat nde, ap ereba na-nen onggo yogolar-e: ”Lag-o!” yogola karuk, ap lugwinik waruk mburuwa iri na-nen yosolar-e: ”Kenne erep min yili-ge meyog-o! Yawo-ge nit-nen Nagawan Indo unu yurag-e meya-o” luk yuwa-o.

¹¹ Nagawan Indo-nen: ”Iri kwaruwag-o” luk yuwa tarem-e o nggok min marik min mondok yigisa keya buwa-o.

¹² Kerep mborok nggwe-ge kura wam-e pong kaso-a? Ap-nen-e nggweyak yalugwi mende sapi wam pem parik puruk yi koma-ge yalugwi-a? Lak irir-o. Alat nde, kir-e mot mot nak kwarugwi elem iri na-ge nden yaga ap lak tak unpurak ninggis mende nde kwarak pogolat, ndemeret lud tak kwarugwi iri na-ge lugud tak kwarugwi rak pigeb-o.

¹³ Kit-nen kenne amburu ndakolar-e: ”Nir-e o Londebat iri-ge urugwe nggwe rak pigerik, yawo-ge o Karenaim iri na mengga wanurak nenmawi-ge ndak-nen yusu-o” luk yili-o.

¹⁴ Nagawan Indo Mbal Pem Nagawan Mondok Kek tak, Amawi worak iri na-nen yosolar-e: ”Isarael nap wa-e. An-nen-e enlem nin nap san ombo kendam inpil lobok yumu, kit kunuwi bem mbud ma-o. Iri kwarogolar-e, Amat mburugwi tula abare abam nggwe (utara) kuri-nen watsa abare ena nggwe (selatan) Araba Mbirik iri na watsa irit yemndak kunpuruk, anggun panggun tak konpogolat wolma-o” luk yij-o.