AMOS 5 - Nanduk Ngget Tul Pidnak Wene

”Tuguruk kondok yer-o” luk wene mbo inpidnak wene 5:1-27

¹ Isarael nap wa-e. Kwara koler-o. An-e kit kenabuwa-nen kenpem yip lilan wanosolat, yip lilan ndawi mbi wanimin-o:

² Kweyap ndugum Isarael iri-ge mondok abu wosa mbud yij-o! Tugurug-e mondok men ma bug-o! At ondomok onggweyak pem-et keya ibiga-o. Ap erep-nen mbi yongga wosa mendak ibigit lag-o.

³ Nagawan Indo Mondok Kek tak iri na-nen yosolar-e: ”Isarael uwi o siri misik me-nen san ombo enpe seribu irit wim tumburuwakluk wirik inpiga-t nde, enpe seratus nak tuguruk lobok yiga-o. Nde, o siri misik-nen-e ap enpe seratus inpil mbiriga-t nde, tugurug-e sepulu nak lobok yiga-o” luk yij-o.

⁴ Nagawan Indo-nen Isarael nap yak ondosolar-e: ”Kir-e kunlug-et worabokluk, tuguruk an neram lobok yer-o.

⁵ An nerembel wanuwoklug-e, Mbereseba-ge mbururak pug-o. Mbetel iri-ge lak ma-nen yusu-o. Nggilnggal woragwi nab-e wim kugun pem wok unpuruk mburuwarik, mbo inpil mburugwi sa inpil mburuwa me, Nggilnggal iri me na mbururak pug-er-o” luk yij-o.

⁶ Kir-e Nagawan Indo eram mberer-o. Iri yogola-ge, kunlug-et woragub-o. Kit-nen nde Nagawan Indo eram mbirigit lak yogola-ge, ar-e kan mare nggal puk kuruk lobok yosolar-e, Isarael nab-e pak konposola-ge, Mbetel nap-nen-e ap misiger-o luk mbi-nen kan iri-ge nugururag-e meya-o.

⁷ Mot mot kwarugwi ereba na lugud tak pogolat, ap enmberam laruk enarengge winde yogolat kwatli nab-e mondok kenabuwa-o!

⁸ Wonaru teram abu woraso, wonaru Mbelantik min Karitika min ereba-ge Nagawan Indo-nen kwarak pamu-o. At-nen-e ndamuk iri na-net lengge kwarak posolat, lengge na-net kubu kwarak posolat, yi koma yi iri na-t waga nggweyak worak nggwe kiril kasolat kwaroso-o. Nde, ereba kwarid nap unu-ge Nagawan Indo-o.

⁹ At-nen enmawi worak o tena woragwi nap ereba na lak tak onposolar-e, it-nen engen arem-o luk inndi wat tak puruk woragwi sa min-et lak tak pij-o.

¹⁰ Kir-e lugud tak kwarugwi nap met inpili ereba na kinsili rak onpogolat, ap enpem wene mbenarugwi sa-nen ndemeret nak yugwi nap ereba na kinsili rak inpili-o.

¹¹ Kir-e insilobulo lak nap ereba na lel mberel onpogolat, ennggandum mbato-ge mengga wanili-o. Iri kwatli bem-e o konak kit-nen wirigep ereba na arem-e woragup pug-o. Iri-nen kit-nen yaigep anggut ereba engen amburu-ge mondok nunggup pug-o.

¹² Kit-nen mondok meya kwarat kwatli min kit-nen kwarat lugud tak kwatli mim ereba-ge an-e naru-o. Kit-nen konak nap ereba na lel mberel onpogolat, kir-e onggo wok kondosoma, insilobulo lak nab-e keya onposoma, ap enpem wene mbarugwi sa-nen lugud tak kwat inpili-o.

¹³ Kit-nen iri kwatli iri bem-e meya iri nggal kwarugwi tarem me, indi nggat nggat worak nab-e indiyabu nak wolmomtak iri-ge ndag-o.

¹⁴ Kit kunlug-et wolmoklug-e meya-ge kwat tenak wolmomtak pug-o. Are, konak kwarurag-et kenmawi kondogolat wolmer-o. Iri kwarogola-ge, kit-nen yili ndak ndag-et Nagawan Indo Mbal Pem Nagawan Mondok Amawi worak iri na-ge ndemeret kit kennggendumu wolma-o.

¹⁵ Meya kwarugwi elem iri-ge kinsili rak puruk, konak kwarugwi elem irit nggok tak pogolat wolmer-o. Iri kwarogolar-e, mot mot kwarugwi elem iri nggok tak pogolat wolmer-o. Erep-nen-e Nagawan Indo-nen-e enlem Isarael nap marig-et keya inpidnak ereba-ge enabuwa yuwa-t nde ma-o.

¹⁶ Nagawan Indo Mbal Pem Nagawan Mondok Amawi worak iri na-nen yosolar-e: ”O siri tula tula ereba-ge ab-e inndi puru-nen yip togolat yane wuruwa-o. It yabu wanugwi nap min-et ap wat yidnak ereba na unpud yip tuwakluk onggo wok indidnak ereba na inmin ap wat yidnak iri na ubud yip tuwakluk wene mbo unpuwa-o.

¹⁷ An lobok yimindik, kit angin worak kenpem pimin ereba na bem ap oboksa-nen it eneyabu anggut yapmu ereba na me-nen yip togolat wolma-o. Nagawan Indo an-nen yusu-o” luk yij-o.

¹⁸ Kit Nagawan Indo-nen idnak tarem iri na kindingen kali nab-e mondok ndemeret kenabuwa worag-o! Iri ala-ge, no manggim-nen Nagawan Indo-nen idnak tarem iri kindingen tak pili-o? Nde, iri tarem-e kit kenmanggim-e yaya-ge lag-o, mondok ndamuk irit kwat ma-o.

¹⁹ Nde, iri tarem-nen kwat ma-ge ap singa emndam-nen mengga mborosoma-t nde, mberuang imin lid pid yidnak nggal-nen yusu-o! Are, ap misik ama wok yosolat, o kebet pem inggi watsa worasoma, waro eyak-nen yilik onposo nggal-nen yusu-o!

²⁰ Nagawan Indo-nen idnak tarem iri-ge ndamuk elem pil lobok yurak tarem-nen yusuo. Yaya elem pil lobok yurag-e lag-o. Iri tarem-e yaya-ge lak, mom ki irit ma-o.

²¹ Nagawan Indo-nen yosolar-e: ”An-nen kit-nen yebet kagolat nggok sakwi ereba yik kudtag-e mondok nisili rak puruk, sok wururak nde yusu-o!

²² Kit-nen an namanggim kan purak mende min an namanggim purak nggandum mbato min waruk lobok yili-ge an-nen-e mondok wanimin pug-o. Kit-nen konowam mondok nggok omok worak an nimin kondogolat namanggim pugub-et nde, an-e mondok wanimin pug-er-o.

²³ Kit kenndawi ap eneyanggoru nak alu nggwe rak pili iri-ge keya ber-o. Kit-nen ndawi kecapi poba bem yili iri-ge an-nen kulurag-e mondok nimbir-o.

²⁴ Kwarurag-e, mot mot kwarugwi elem nak nggok tak pogolat, lud tak nak kwarugwi elem-e yi eberek yigit lak mborosolat nak woraso nggal kwarogolat nak wolmomtag-o.

²⁵ Isarael nap wa-e. An-nen nembaga nggwe lit kunpuruk lobok yosolat, olengen empat pulu woralar-e, kit kinmin-e: ’An namanggim pugwi mende pogolat, wam wosa namanggim per-o’ luk yak kindigit lag-o.

²⁶ Alat nde, kit-nen-e ’Nit-nen idnak nagawan-e yur-o’ luk erembel wanugwi Sakut min kit-nen kek tak pugwi wonaru Kewan min ereba na nak erembel wanili bem-e kit-nen kugwiwak ndak wirigep ereba-ge kondomok-nen kud turuk mburugub-o.

²⁷ Misik tarem-e an-nen Ndamsik nggal-e lak. Are, mondok erepma nin sa ereba me mbo kinpil mbirimin-o. Nagawan Indo an nunu Mbal Pem Nagawan Mondok Amawi worak an-nen yusu-o” luk yij-o.