AMOS 4 - Nanduk Ngget Tul Pidnak Wene

¹ Mbasan woraso sapi wam nggal yok nggok enagil lobok yili kit Samaria kweyap konmok worak wa-e. Kit-nen-e it enmawi lak ereba na-ge lel mberel onpogolat, enarengge lak nap ereba na enarengge ondoro rak pogolat, kununtak inmin: ’Indi nden kaso yi nenmanggim lid lud tak per-o’ luk keresa yak ondogolat kwat tenak worali-o!

² Nagawan Indo Mondok Kek tak an-e Nagawan Indo marak-nen yusu-o. Kit oboksa keyane mbong kere eyak pem nggoksa lit kali iri na nggal eyak worak pem-nen mberena wok kunpuruk mburuwa-o luk urul yak kindigi iri nar-o.

³ Kit oboksa kerep pak leget kil kil korok korok iri na nggwe lit yaga lesa mbo kinpil mbutluk, Eremon ambigit nggwe mbo kinpil mburuwa-o. Nagawan Indo an-nen yigi-o” luk yij-o.

Isarael nap-nen eneyanggo lak yidnak wene 4:4-13

⁴ Nagawan Indo Mondok Kek tak iri na-nen yosolar-e: ”Isarael nap wa-e. Kir-e Nagawan Indo erembel wanugwi sa Mbetel iri me mburugupndik, meya kwarer-o! Nggilnggal mburugupndik, meya kinndi-nen pidnak nak kwarer-o! Pempa kuplila-ge wam wosa kan pogolat nak wolmer-o. Kit-nen yagidnak mende na mbarogolar-e, enggep lombok karetkwe-ge pempa waruk mborogolar-e, nandug-et waruk mbutlug-e, imbirig-e mberen nene luk, (hari yang ketiga) waruk mborogolat, iri nggal pempa kwat tenak wolmer-o!

⁵ Nde, oroti-ge wiwa-o yogolat pugwi iri na-ge an namanggim-et pogolat wolmer-o! Kit-nen amburu ndorogolar-e, ’Kat kamanggim pugwi mende-ge erep min-et nambena waruk lobok yige-o’ yogolat wolmer-o! Ndemeret kir-e ereba nggal perak kenalen pem kwat tenak worali-o!

⁶ An-net nogoro-ge kit woragwi sa kunuwi silmu oboksa mberak pil mbuwagi-t nde, kir-e keneyanggo watluk, tuguruk an neram lobok yigit lag-o.

⁷ Kit-nen yagidnak mende ereba na-ge talme lak me, meya yosola-t nde, an-net talme mberak pigit lak yigi-o. An-nen-e o siri misik me-ge talme mberak posolar-et nde, misik me-ge mberak pigit lak yosolat, yabu misig-e talme-nen piri rak posolat, nde, yabu misig-e talme lak-nen umbuk yosolat kwarak pigi-o.

⁸ Nde, o siri erep ereba me woragwi nab-e yi nere-nen enmawi lak yosola-ge, yi kore o siri nin me nin me mbiriga-t nde, yi-ge mondok marig-et me, it enmanggim-e lak yij-o. Iri nggal kwarogolar-et nde, kir-e keneyanggo lag-et an neram lobok yigit lak yigeb-o.

⁹ An-nen-e obube embem worak irit pu yaga pil lobok yukmu, kit-nen yagidnak mende umbuk tak pij-o. Nde, keneyabu anggut yabu min e ara ari min saitun ari min oboksa sil-nen nuruk lak tak pij-o. Iri nggal-et kwat konposola-t nde, kir-e tuguruk an neram lobok yigit lak yigeb-o.

¹⁰ An-nen-e Mesira nap enpem pil lobok yigi kugwi iri na nggal perek perek mboroso kugwi kenpem pil lobok yigi-o. Nde, kit kennggendumu ap sujwe-ge wim abi bem onposolat, kit-nen idnak kura wam ereba na-ge wim nap ininggem pigi-o. Nde, kit woragwi sa-ge ap onowak yidnak emben worak ereba na yebet tak pumu, emben-nen kenabirumu urud ndo yij-o. Iri nggal-et kwat konposola-t nde, kir-e tuguruk an neram lobok yigit lak yigeb-o

¹¹ Kit kennggendumu ereb-e Sorom min Nggomora min lak tak inpigi iri na nggal lak tak kinpigi-o. Iri kwarosolat, erep keya kinpidnak iri-ge kan nasoma, kisirik pugwi nggal, kisirik kinpidnak nggal-nen yusu-o. Iri nggal-et kwat kinpidnag-et nde, tuguruk nden karuk an neram lobok yigit lak yigeb-o.

¹² Iri bem-e Isarael nap wa-e. An-nen angin worak mondok kenpem pimin-o. Iri ala-ge, an-nen angin worak kenpem pil lobok yimin iri abuwok mondok lid lud tak pogolat wolmer-o” luk yij-o.

¹³ Mbal Pem Nagawan-net ndobo min o wija min ndak wirij-o. At-nen kwarurak indi-nen pidnag-e ki nap inmbiri bem nam tak poso-o. At-net lengge min kubu min kwarak pamu-o. Ar-e ndobo anggul pem waring kasu-o. Nde, at unu-ge Nagawan Indo Mbal Pem Nagawan Mondok Amawi worak irir-o!