AMOS 3 - Nanduk Ngget Tul Pidnak Wene

¹ Nagawan Indo-nen lesa Mesira-nen wok kunpuruk lobok yid nap Isarael nap wa-e. Nagawan Indo-nen kenpem pidnak wene-ge kwara koler-o. Nagawan Indo-nen yosolar-e:

² ”Nggweyakma yu me-nen yi nap ndi nap oboksa ennggendumu-nen kit kenlem misiget yu nak perak an-nen kinmin kondosolat, lombot konposolat worasu-o. Iri-nen ndowaga kit-nen meya kwatli-ge meya nggog-et kwarogola karuk, ndemeret an-nen angin worak mondok kenpem pimin-o” luk yij-o.

Mbal Pem Nagawan ene lomboksa yugwi nap-nen kwarugwi 3:3-8

³ Mberen nap-nen ”Iniksa mburul-o” luk enmberek wene mbarigit lak-nen-e enmberek lambuksa mburugwi-a?

⁴ Nde, walma woraso singa ndakngge-nen-e at emena kagit lak-nen-e nggak yoso-a? Singa marik-nen-e at woraso sa-nen-e at emena mbi tenakit lak-nen-e ene ngol yoso-a?

⁵ Towe kere pigit lak-nen-e towe-ge kere ma ngonok yoso-a? Nde, sapna-ge ebe lak-nen-e mba yoso-a?

⁶ Nde, o siri nggok ma woragwi nap-nen-e wim worasola-nen ene rak pugwi mende (terompet) kulurug-et nde, kwiye lak woragwir-a? Nagawan Indo-nen pil lobok yigit lak ma-ge o siri misik ebem lak tak onposo mende mbumomtag-e ndag-er-a?

⁷ Nagawan Indo Mondok Kek tak iri na-nen-e at-nen kwarurak piridnak iri na-ge at ndegel ubugwi ene lomboksa yugwi nap ereba kirimbi yak indigit lak-nen-e mondok kwaroso bug-o.

⁸ Singa-nen urum ene ngol yosola-ge, ta-nen kwiye lak woraso? Nde, Nagawan Indo Mbal Pem Nagawan-nen wene yosola-ge, at-nen enpem pidnak wene ap yak indigit lak ta nggal-nen indiyabu nak wolma-o?

Samaria siri tud yurak wene 3:9–4:3

⁹ Wene yu-ge nagawan woragwi sa woragwi Mesira nap min Asndot nap min yak ender-o. Yak ondogolar-e: ”Ndobo Samaria eralu inggi inggi ereba bem ndok wutluk, nari wari nak kwat tenak woragolat, ap lel mberel tak onpogolat kwatli ereba lombot per-o” luk yak ender-o.

¹⁰ Nagawan Indo-nen yosolar-e: ”It ereba-nen-e nagawan woragwi sa, it woragwi sa ereba na me-ge ap lel mberel onpogolat, insilepma bem wanidnak silobulo ereba na yebet tak pili-o. Nde, it iri-ge mondok mot mor-e kwarugwi bug-o.

¹¹ Iri kwarugwi iri bem-nen it unuwi-ge wim nap-nen leget waburuk woragolat, it enmawi yugwi mende oboksa yigisa keya bogolat, it ondoro nagawan woragwi sa ereba na me woraso mende oboksa mberena wanogotla kwaruwa-o.

¹² Nde, Samaria nap iri-ge lomba wam ombo-nen olomba wam singa ndakngge-nen nasolat ijok mberen min eyanggo min mbarak nak wanoso nggal, Samaria woragwi nap yawo konak nak nene yugwi ondoro konak ereba na bem nene yogolat worali ereba-ge enpe mariget nak keya unpuwa-o” luk yij-o.

¹³ Nde, Nagawan Indo Mbal Pem Nagawan Mondok Amawi worak Kek tak iri na-nen yosolar-e: ”Yakup-nen wigarak iri-ge kwara lombot unpuruk, inndi wanuwakluk nggomo ender-o.

¹⁴ Isarael nap-nen meya kwat tenak woragwi iri bem an-nen Isarael nap angin worak enpem posolat tarem-e Mbetel iri me wam wosa kan pugwi ondoro ereba-ge lak tak pimin-o. Nde, wam kan pugwi ondoro ereba na-ge ambo erep pem erep pem ereba na kala keya bosolat, mbud tak pil lobok yimin-o.

¹⁵ Nde, toro wok yidnak tarem-nen toro aye woragwi o ereba na min kibi mbud yidnak tarem-nen embem aye nginmu nggugwi o ereba na min-e mondok yigisa lak tak pimin-o. Iri-nen o nggaja eyak pem-nen yik kudtak amanggim konidnak ereba na-ge tud tak posolat, o yok nggok ereba na oboksa yigisa lak ma-o.