AMOS 2 - Nanduk Ngget Tul Pidnak Wene

Moap

¹ Nagawan Indo-nen yosolar-e: ”Moap woragwi nab-e pempa meya nak kwat tenak worali-o. Iri bem-e, ndemeret an-nen angin worak enpem pimin-o. It-nen-e kwiye lag-et Erom nagawan iri na yapma bidnak owak iri na pugwara kan puruk, mabe rak piga-o.

² Iri kwariga bem-e an-nen o Moap ebem kanduk mberak pil mbuwamu, o Keriot kerep pak leget min anggul pem o ereba na min kan-nen nuruk, lak tak puwa-o. Wim nggogolat kek kok lek kagolat, terompet ene pu rak pogolat, wim nggogolat enne sa nggwa mbogolat ereya na bem-et Moap nab-e wat ma-o.

³ Moap iri me tena woraso nagawan min at eyabu wanugwi ap yok nggok oboksa min indimin-o” luk yij-o.

Yewura

⁴ Nagawan Indo-nen yosolar-e: ”Yewura nab-e pempa meya nak kwat tenak worali-o. Iri bem-e an-nen mondok angin worak enpem mberak pimin-o. It iri-ge an-nen mul indidnak wene-ge no mende nggal tak puruk, an-nen ’Iri nggal kwarurag-o’ luk enpem pidnak wene-ge kwid togolar-e, nin mbal pem nagawan onmborak-nen erembel wanugwi ereba na-nen enmberam lasola, inndi kabak tak pij-o.

⁵ Iri kwariga bem an-nen Yewura iri me kanduk pil mbuwamu, Yerusalem kerep pak leget anggul pem o ereba na-ge kan-nen nuruk lak tak puwa-o” luk yij-o.

Mbal Pem Nagawan-nen Isarael nap enpem angin worak mberak purak yidnak wene 2:6–3:2

⁶ Nagawan Indo-nen yosolar-e: ”Isarael nab-e pempa meya nak kwat tenak worali-o. Iri bem-e an-nen-e ndemeret angin worak enpem mberak pimin-o. Nde, it-nen-e ap mot mot yugwi nap-nen ap enpem luru wanidnak ereba na nde tuguruk uwi yagurak meya ala-ge, it enpe nde ap ndegel unpuwakluk onnggo yatli-o. Iri nggal-et ap insilobulo lak nap-nen na uwang luru wanidnak uwi yagurak meya ala, unuwok sum misik ondok min onggo mondok marik pugwi ndak ndak wanidnak pem-et nde, it enpe ap ndegel unpuwakluk onnggo wanili-o.

⁷ It-nen-e ap enmawi lak, at-nen kwarurak enmawi lak ereba na lel mberel inpili-o. Insilobulo lak nab-e pelek pelek wirik onpogolat kwatli-o. Ineidtak-nen na irit, enmbararak-nen na irit, ndegel onposo kwe misik iri na imin nak nene yogolar-e, an nunu marak iri na-ge emben to rak pili-o.

⁸ Nagawan Indo erembel wanugwi sa oboksa ereba na me nene yogolar-e, ap insilobulo lak nap-nen it enarengge luru wok unduruk, tuguruk uwi yakola-nen wok undurak puruk insilobulo lak nap unsum wanidnak ereba na min-et yirik nene yili-o. It-nen-e it enarengge wanidnak pem it ereba na enarengge anggut amburu iri-ge Mbal Pem Nagawan ama-nen nonggolat kwatli-o.

⁹ Nilirak wa-e. Kir-e iri kwatli-t nde, an-e kit kenabuwa-nen Amori nap e nggabina nggal mot ereba na min e lom nggal enmawi worak ereba na min-e mondok lak tak unpukmu-o.

¹⁰ An-e kir-e Mesira-nen lesa wok kunpuruk, nembaga nggwe ndegel kunpuruk mborosolar-e, olengen-e empat pulu irit worakmu-o. Iri kwasa kinmin lobok yosolar-e, Amori nap unuwi nggweyag-e kit kunuwi nggweyak kwat makluk wok kundukmu-o.

¹¹ An-nen-e kit kinlirak ereba ennggendumu ereb-e an nene lomboksa yugwi nap tak inpigi-o. Nde, kit kennggendumu ap sujwe ereb-e an namanggim nak lenak wolmomtak Nasit nap irit lenak inpigi-o. Isarael nap wa-e. Iri-ge nenesiget yigi-a? Yu-ge ndemeret Nagawan Indo an-nen yusu-o.

¹² Alat nde, kit-nen-e an namanggim nak lenak woragwi nap Nasit nap ereba na inndi nden kaso anggut yi mak ondogolat, nde, it-nen-e ’Irit kwarimin-o’ luk owak mbaridnak ereba na kwid tili-o. Iri-nen kit-nen-e an nene lomboksa yugwi nab-e an-nen enpem pidnak wene ereba na ’Ap yak undurag-e lag-o’ luk imiri mbatli-o.

¹³ Nde, yawo-ge kir-e an-nen nggweyak min yumaga keya kinpimin-o. Iri kwat konposola, nggweyak koma-nen nggandum kwarat waruk mborosolat, ene nggirit mak mbusu iri na nggal yane worogolat nggwa yugub-o.

¹⁴ Unuwok nggarim worak-nen na mengga pong kujwa bug-er-o. Enmawi worak nap-nen na enmawi lag-et ma-o. Ap san ombo-nen na at ondomok agap ndaguwa bug-er-o.

¹⁵ Ap inggi mbuk lembe-nen na pak tuwa bug-er-o. Pong kaso nap-nen na kwiye-nen ndag-et nak pong kujwa bug-er-o. Kura wam ombol pem mboroso nap-nen na mengga mburuwa bug-er-o.

¹⁶ Nde, iri tarem-e mondok ap san wari kwiye kagwi buk-nen na kwiye-nen esan keya buruk, kwiye mburuwa-o. Wene yu-ge Nagawan Indo an-nen yigi-o” luk yij-o.