AMOS 1 - Nanduk Ngget Tul Pidnak Wene

Amos

¹ Nde, Amos iri-ge o Tekoa iri me-nen lomba ndogoroso nap irit woragij-o. Nde, at Mbal Pem Nagawan ene lomboksa yoso nap kwat yij-e, Yewura nab-e nagawan Usia-nen tena unpuruk worala, nde, Isarael nab-e nagawan Yerobeam Yoas ambara iri na-nen tena unpuruk worala ereya tarem-nen Mbal Pem Nagawan ene lomboksa yoso nap kwat yij-o. Nde, o lele nggok wok yigit lak ma olengen mberen woragolar-e, Mbal Pem Nagawan-nen-e Isarael nap kwat unpurak wene irit Amos mirik ibij-o.

² Amos-nen yid wene-ge yu-o: ”Nagawan Indo-ge Sion ndobo bem-nen urum ene ngol yosolat, Yerusalem-nen ene o nggu nggal yosolat yusu-o. Tusuangge ereba na-ge mondok umbuk le yosolat, nde, tusuangge Karamel Ndobo bem ereba na-ge merek le yij-o” luk yij-o.

Mbal Pem Nagawan-nen ap Isarael nap entalu inggi inggi worali ereba na enpem angin worak mende purak wene 1:3–2:5 Siria

³ Nagawan Indo-nen yosolar-e: ”Ndamsik woragwi nab-e pempa-nen meya nak kwat tenak woragola karuk, an-nen-e mondok angin worak enpem pimin-o. It-nen Nggileat nap kwat onpogolar-e, kwiye worag-et lel mberel inpiga-o.

⁴ Iri bem-e, an-nen kanduk Nagawan Asael woraso sa mberak pil mbuwamu, Nagawan Mbenarat-nen idnak pak kerep leget min-et oboksa kan nuruk, lak tak puwa-o.

⁵ Ndamsik pak tumende na ndamera lak tak pimin-o. Nde, Awen Mbirik iri na me woragwi nab-e mondok pusa lak tak unpuruk, ondoro nak keya bimin-o. Mbeteren nagawan-e an-nen lak tak ibimin-o. Siria woragwi nap na kamat unpuruk, pendaga o Kit nggwe inpil mbirimin-o” luk yij-o.

Pilisin nap

⁶ Nagawan Indo-nen yosolar-e: ”Nggasa woragwi nab-e pempa meya nak kwat tenak worali-o. Iri bem-e ndemeret it iri-ge mondok angin worak enpem pimin-o. Nde, it-nen-e ap enlem misik mondok oboksa ap mumnggup manggim wolmakluk Erom nap enpem onnggo waniga-o.

⁷ Iri kwariga iri bem-e an-nen-e Nggasa iri me kerep pak leget ereba na oboksa kanduk pil mbuwamu, pak leget ereba na min pak anggul pem o ereba na min nuruk, lak tak puwa-o.

⁸ Nde, o siri Asndot min Askelon min tena woragwi nagawan-e an-nen mondok lak tak inpimin-o. Nde, o Ekoron siri-ge angin worak enpem puruk, nde, Pilisin nap erep oboksa-ge lak tak inpimin-o” luk yij-o.

Tirus

⁹ Nagawan Indo-nen yosolar-e: ”Tirus woragwi nab-e pempa meya nak kwat tenak worali-o. Iri bem-e mondok an-nen ndemeret angin worak enpem pimin-o. It-nen-e ap enlem misik oboksa mbo unpugwi sa mbo onpogolar-e, kegera Erom nap ininggem piga-o. Iri kwarogolar-e, kundik wolmomtag-o luk urul piga wene iri na-ge kwid tiga-o.

¹⁰ Iri kwariga bem-e an-nen-e o siri Tirus iri me pak leget ereba na bem kanduk mberak pil mbuwamu, kerep pak leget min pak anggul pem o ereba na min mondok nuruk, lak tak puwa-o” luk yij-o.

Erom

¹¹ Nagawan Indo-nen yosolar-e: ”Erom woragwi nab-e pempa meya nak kwat tenak worali-o. Iri bem-e it iri-ge an-nen mondok angin worak enpem pimin-o. It iri-nen-e enabuwa mbi kagit lag-et Isarael nap it enteb-et nde, inmin wim mbarogolat, insilepma enpem pogolat, insilepma-ge lak tak pigit lak, parugu irit woraiga-o.

¹² Iri bem-e an-nen o Teman siri bem kanduk mberak pil mbuwamu, o Mbosera kerep pak leget min pak anggul pem o ereba na min kan nuruk, lak tak puwa-o” luk yij-o.

Amon

¹³ Nagawan Indo-nen yosolar-e: ”It enlem Amon nab-e pempa meya nak kwat tenak worali-o. Iri bem-e, an-nen ndemeret angin worak enpem pimin-o. It-nen tenagidnak wi onggweyak nggok makluk, nggweyak wene wim nggogolar-e, it-nen-e Nggileat kweyap enabila ereba na-ge enmbe ngaril lobok yiga-o.

¹⁴ Iri kwariga bem-e, an-nen o Araba siri iri me kerep pak leget ereba na bem kanduk pil mbuwamu, kerep pak leget min pak anggul pem o ereba na min mondok nuruk, lak tak puwa-o. Iri tarem-e wim nggogolat kek kok kuluwa-o. Wim na nggog-et yosolat terak kani nggal paguruk mburuwa-o.

¹⁵ It-nen idnak nagawan min at eyabu wanugwi nap yok nggok ereba na min kamat unpuruk, mbo unpugwi sa wok unpuruk mburuwa-o. Nagawan Indo an-nen yusu-o” luk yij-o.