AID WENE YOSO NAP 9 - Nanduk Ngget Tul Pidnak Wene

Ap oboksa-nen unluk wolmomtak iri-ge misiget erep nak-nen yusu-o 9:1-12

¹ Ereba oboksa an-nen kwara yebet kagirig-e, konak woragwi min inndi nggat nggat worak woragwi min iri-ge Mbal Pem Nagawan nak-nen posolat, iri-nen ap insilepma onpogolat, inndi kundik woragolat kwarugwi iri-ge Mbal Pem Nagawan nak-nen poso-o. Abok-nen kwat momtak mende iri-ge ap misiger-o luk mbi-nen mondok enaru buk-nen yusu-o.

² Woragwi bem-e mot mot kwarugwi nap-nen na irit, inndi lak yidnak nap-nen na irit, konak nap-nen na irit, meya yugwi nap-nen na irit, marak nap-nen na irit, mondok emben to rak mende kwarugwi nap-nen na irit, wam wosa kan pugwi nap-nen na irit, pugwi buk nap-nen na irit, oboksa-nen enpem mboso iri-ge misiget erep nak irit enpem mboso-nen yusu-o. Ap imbiringgat worak iri-ge terak minik nin, nde, meya yugwi nab-e nin nggal-e lag-o. Owak mbaroso nap na, owak mbaroso buk nap na ndak ndak-net yusu-o.

³ Iri bem-e enpem mboso mende iri-ge misiget ereb-et oboksa enpem mboso-nen yusu-o. Iri kwaroso iri nak perak nde yi mende ndi mende ndak worak pidnak mende oboksa inndi abi kalak poso mende-nen yusu-o. Nde, woragolar-e, ki nap inndi-ge meya nak kobong tak worasu-o. It-nen yebet kagwi min-et inndi lak-nen yebet kagwi nak kobong tak worasu-o. Iri kwarak irit worakmu, mimo wat yugwi-o.

⁴ Alat nde, unluk woragwi elem iri na enarem kwat yidnak worala-ge, iri-ge mondok konak lombok-nen yusu-o. Singa na wat yij-et nde, yengge uruk iri perak alen pem worasu, kali bug-a?

⁵ Unluk worali nap-nen-e ”Nir-e war-et mul-o” luk enaru worasu-o. Nde, wat yidnak nab-e mondok enaru buk woragolat, it-nen onggo wanurak na lak, unnu min abu meme rak worasu-o.

⁶ It-nen enabuwa kagwi min insili rak unpugwi mende min ukwe ukwe yugwi min-e enpe wat yogolar-e, imin-et wat yugwi-o. It wat yogolar-e, ereba ereb-e mariget tet nggweyakma yu me-nen kwat yugwi mende-ge erep kambok tugwi bug-o.

⁷ Iri bem-e amere kenalen pem nonggolat, kijik kijak pem-et anggut amburu nonggolat kwarurag-o. Ereba kwarugwi ereba na-ge Mbal Pem Nagawan-nen-e umud neneyaso bug-o. Are, op kwatli-o luk nenperaso-o.

⁸ Kit kentare-ge kibi yek tak, konak nak wolmer-o.

⁹ Mbal Pem Nagawan-nen we luru nggweyakma wolmomtak wok kirid iri na bem nggweyakma ya woralar-e, kogwe kindi kundik iri na imin kona wolmomtag-o. Kat-nen kamawi lak yosolat kirigak mburusu onggo-ge iri nag-et me, pempa we luru ebe lak woralar-e, kalen min-et wolmomtag-o.

¹⁰ Kat abog-e ap watluk ndok wurugwi sa mburugun-o. Nde, iri me-ge yebet kagwi min yabu min enaru yugwi mende min inndi tenggerak woragwi min-e watluk ndok wurugwi sa-ge lak me, kat-nen yabu oboksa wanosolar-e, kamawi min-et wanosolat nak wolmomtag-o.

¹¹ Nggweyakma yu me-nen erep an-nen kasolar-e: Pong kagolat ndag-et nak pong kaso nab-e pempa ombol nggwe nak yoso bug-o. Wim nggogolar-e, enmawi worak san wari iri na nag-et pempa ombol nggwe yugwi bug-o. Inndi nggat nggat worak nab-e at-nen wanoso eyabu iri na nag-et pem wanosolat woraso bug-o. Inndi tenggerak nap-nen na pempa silobulo-ge kam tenak woragwi bug-o. Yi iminep ndi iminep enaru nap na ap oboksa-nen enaru yili bug-o. Alat nde, ap oboksa-nen yanem ereba nggal-e enpem mboso-nen yusu-o.

¹² Towe are bidnak arem ngonok yosolat, keyane na keyane wanugwi sum arem yat yosolat kwaroso nggal-et, peragit lak ma nggweyakma nab-e lak tak unpurak mende enpem lobok yurag-e mepme-nen lobok yuwa iri-ge kabak woragwi-o.