AID WENE YOSO NAP 3 - Nanduk Ngget Tul Pidnak Wene

Aid Wene Yoso Nap-nen Yidnak Wene Yi mende ndi mende oboksa kwat yurak tarem-e worasu nag-o 3:1-15

¹ Yi mende ndi mende nggweyakma yu me-nen kwat yusu-ge Mbal Pem Nagawan-nen ”Kwat mag-o” yidnak tarem-et kwat yusu-o.

² Mbal Pem Nagawan-net wat tak posolar-e, ndesa mburak tarem min wat momtak tarem min yagurak tarem min ndagurak tarem min

³ undurak tarem min ki rak unpurak tarem min mijarurak tarem min o wururak tarem min wat tak pusu-o.

⁴ Mbal Pem Nagawan-net wat tak posolar-e, yip turak tarem min nda turak tarem min tabun purak tarem min kot kudtak tarem min

⁵ kerep mbo burak tarem min kerep ndok wururak tarem min paluk undurak tarem min mamak puruk nggonok indigit lak keya burak tarem min wat tak pusu-o.

⁶ Mbal Pem Nagawan-net wat tak posolar-e, kudtak tarem min kagit lak tarem min ndok wosa purak tarem min ondoro rak purak tarem min

⁷ ndelak purak tarem min panggarurak tarem min enne lak wolmomtak tarem min enne yurak tarem min wat tak pusu-o.

⁸ Mbal Pem Nagawan-net wat tak posolar-e, enabuwa yurak tarem min insili rak purak tarem min wim ngarurak tarem min lambuk yurak tarem min wat tak pusu-o.

⁹ Nit-nen kwarogolat ninligak mbusu mende-ge ebe-ge no mende wanugwi-o?

¹⁰ Mbal Pem Nagawan-nen angin worag-et nenpem pid iri-ge an-e naru-o.

¹¹ Yi mende ndi mende ereba kwat yurak tarem-e at-net: ”Iri tarem-net kwat mag-o” luk wat tak pusu-o. At-nen-e abok-nen wolmomtak ereba na nenaru yurak pem ukwe peragwi irit wok nendamu-t nde, at-nen tel kwiridnak kuri-nen kwaril kwaril worok tak pid kuri ereba na nit-nen yebet kudtag-e meya yusu-o.

¹² Nit nenambigir-e nit mot pem nunluk woragolar-e, nenalin nenalen pem woragolat momtak iri ombol pem ap misik worasu-ge lag-o luk an-e naru-o.

¹³ Nit oboksa-nen nunggwi mende nonggolat, yi nonggolat, nit-nen yabu wanogolat ninligak mbidnak iri na norak iri-ge ob-o. Yanem ereba-ge Mbal Pem Nagawan-nen we wok ondoso mende-net yusu-o.

¹⁴ Mbal Pem Nagawan-nen kwasa pidnak mende ereba oboksa-ge pem irit wolma-o luk an-e naru worasu-o. Nde, nggweyakma nap-nen-e siyak nambena pogolat, siyak lak tak pogolat kwarurag-e meya-o. Nde, Mbal Pem Nagawan-nen iri nggal kwarusu iri-ge nit-nen Mbal Pem Nagawan nak aye kagolat wolmakluk-nen kwarusu-o.

¹⁵ Yawo-nen kwat yusu-ge kwat yigit lak ma nanduk-nen kwat yidnag-et kwat yusu-o. Nde, abok-nen wolma ereba-ge mondok nanduk-net woragij-o. Mbal Pem Nagawan-nen wat tak posolar-e, nanduk-nen kwat yid iri na-t kwat mag-o luk wat tak poso-o.

Nggweyakma yu me-nen mot mot kwarugwi buk wene 3:16-22

¹⁶ Nggweyakma yu me-nen kwat yusu an-nen kasu ereb-e mot mot kwarogolat, konak nak kwarogolat yurak sa ereba na me-ge meya nde kwarogola, eneyasu-o.

¹⁷ An nindi arem-nen yebet kasolar-e: ”Yi wene ndi wene min yi kwatli ndi kwatli min ereba-ge Mbal Pem Nagawan-nen ’Iri mag-o’ luk yidnak tarem-et kwat yusu me, Mbal Pem Nagawan-nen enpem wene mbenarosolar-e, konak kwarugwi nap min-et meya kwarugwi nap min-et enpem wene mbenaruwa-o” luk peragi-o.

¹⁸ Iri ala, an nindi-nen yebet kasolar-e: ”Nit-nen woragwi-ge wam-nen woraso nggal-et woragwi-o luk mirik nonposolat-nen Mbal Pem Nagawan-nen ninndi ngarusu-o” luk yebet kagi-o.

¹⁹ Ab-et nde, ap-nen woragwi min wam-nen woraso min iri-ge misiget nak-nen yusu-o. Ap na irit, wam na irit wat yoso nak-nen yusu-o. Ap na irit, wam na irit, mberensa ndak worak pidnak mende-net yusu-o. Iri ala-ge, ap-nen woragwi-ge siyak terak minik nin nggal-e lag-o. Wam na irit, ap na irit woragwi bem-e mondok ebe lak mende-nen yusu-o.

²⁰ Wam na irit, ap na irit, misik me nak mbitli-o. Mberensa-t nggweyak-nen ndak worak-nen yusu-o. Mberensa-t tuguruk nggweyak kwat ma-o.

²¹ Watlug-e, ap indi-ge abam nggwe lasola, nde, wam indi-ge nggweyak arem nggosola, kwarusu, lak? Iri-ge nir-e nenaru bug-o.

²² Iri bem-e an-nen kasolar-e, ininggi-nen yabu wanidnak iri na ebe nonggolat, konak enalen pem woragolat-nen konak mbi kwat tenak wolmomtak ereb-e lak nde kasu-o. Nde, at watluk ombol nggwe-nen kwat ma mende-ge mondok aru bug-o.