AID WENE YOSO NAP 12 - Nanduk Ngget Tul Pidnak Wene

¹ Anggun panggun nak kagolat wolmomtak tarem olengen awo wok yigit lak ma kunsujwe woragolat ereya bem-net Ndak Worak Kinpid Nab-e kinndi yebet yebet tak wolmer-o. Nde, ereya tarem nde wok marig-e: ”An-e nalen pem-e mondok worasu bug-o” luk yugun-o.

² Nde, iri tarem wok yosolar-e, kenlengen kubulu yosoloma, mo eyaya min waneya eyaya min wonaru eyaya min-e yik kudtag-e lumugumu mbuwa-o. Nde, talme mberak poso nggan nggan mom ki rak iri na-ge kit kenpem kore yoso nggal pem irit kinmin wolma-o.

³ Iri tarem-e kinggi tugup lak kamawi bem kagap ndagoso iri na-ge lele ma-o. Kowak amawi worak nggwelsa noso-t nde, amawi lak luk, mamok mamok ma-o. Keyak nunggwi mende tarurak ebis ndigirik woragit lak yosolat, kerengen kubulu yosolat, yik kudtak lumugumu mbuwa-o.

⁴ Tula ombolwak pem enne nggu lek kujwa-t nde, kat keyanggoma-nen-e anggu ngga nak ma-o. Poba ene min nggandum mbato aboro wanugwi ene lu min-e keyanggoma-ge kulurak meya nggal ma-o. Nggaruksa na nene yugun pug-o. Towe ene-net nde, kuruk tak posolat, kuruk nak woragun-o.

⁵ Tula mborosolar-e, leberak nggwe lorag-e kabago yosolat, tula mborosolar-e, kwaluk mborosolat, kanggulsu-ge kegeren lasolat, kuwok na ndag-et mboksa pil lagit lak yugun-o. Kat kumbul mbul oboksa lak ma-o. Nir-e pem ndong tak wolmomtak sa mbitli-o. Nde, iri yogola-ge, tula tula ereba-ge yip togolat, tabun puruk wolma-o.

⁶ Posid kere perak-nen konidnag-e pok yosolat, wesera nggilara liring ma-o. Nde, emas-nen konidnak tal-e mbosolat, ndamera labuk ma-o. Yimbe para pil mburuk yi kenanggugwi kere-ge pok ma-o. Yimbe-ge ndamera liring ma-o.

⁷ Nit nenpe-ge tuguruk nggweyak kwat ma-o. Nit nunluk woragwi nindisep iri na-ge nindisep wok nindid Mbal Pem Nagawan eram-et tuguruk mburuwa-o.

⁸ Iri ala-ge an yeg-o. Ereba kwaruwa ereba oboksa ebe lak-nen yusu-o. Oboksa mondok we ebe lak mende-nen yusu-o.