AID WENE YOSO NAP 11 - Nanduk Ngget Tul Pidnak Wene

Inndi nggat nggat worak nap-nen kwarugwi wene 11:1-8

¹ Kat korol-e mbepme nggwe o nin sa ereba na uwi yabidnak nggal yabil mbiri-o. Abog-e ndemeret lesa-t wanugun-o.

² Korol erem wolosolar-e, nin me nan me ereba me posolat, kwarat tu nin tak nan tak kore yosolat kamawi kundurag-o. Nde, ap-nen-e enpem mboso mende enpem mbigit lak ma-net awo ma lid lud tak puruk woragwi-o.

³ Ninggi kigit nggwe, lak? Kware nggwe, lak? E nde mbud marig-e, e iri-ge mbud ma iri na me-t mbud tak woraso-o. Nde, o nggan nggan talme kobong tak mom ki yosolar-e, talme nggok mboso-o.

⁴ Ta-nen nde o wija lak yosolat, o kibi makluk yik karok wolma nab-e uwi na pil kujwa bug-o. Ebe na mbaruwa bug-o.

⁵ Mbal Pem Nagawan-nen yi mende ndi mende oboksa ndak wirij-e nggweyakma nap-nen-e at-nen kwarid ereba-ge iri nggal-o luk yebet kudtag-e meya-o. Iri nggal-et, iniyarak enarem-nen li marik kwat yogolat ininggi onowak kondosolat li kwat yili iri-ge nggweyakma nab-e kabak worali-o.

⁶ Kat-nen uwi pil kasolar-e, kuplila min-et kubu min-et pil kasolat wolmin-o. Ngge-nen nde konak mburuwa iri-ge nir-e nenaru buk me, nit-nen pil kul-e misik umbuk yosolat, misiget nak-nen mburuwa, lak? Are, mberensa-net mburuwa? Iri-ge nenaru bug-o.

⁷ Mo abinal-nen-e inndi alen tak onposo-o. Nde, enalen kagwi-ge mondok ijar-o.

⁸ Kat nde kuruk mot pem-et woralar-e, iri-ge ob-er-o luk kalen kasolat wolmin-o. Alat nde, yu kwara yebet kudtag-o. Kuruk mot pem-et nggweyakma yu me woragun-et nde, wat yugundik worasolar-e, terak minik mot pem-et woragun-o. Ereba oboksa-ge ebe lak wewesa nag-et me, iri ala-ge, tuguruk kindi-ge no bem wat tak puruk, mbung mbung tak woragun-o?

Ap sujwe nggomo indidnak wene 11:9–12:8

⁹ Ap sujwe wa-e. Kunsujwe woragolat-net kenalin kenalen yogolat wolmer-o. Kit kinndi-nen ukwe yidnak min kinndi pidnak min-nen yidnak yidnag-et kwarogolat wolmer-o. Alat nde, kwara kenaru wolmomtag-o. Mbal Pem Nagawan aid arem worasu iri-nen-e kit-nen kwarugup oboksa-ge mbenaruwa-o.

¹⁰ Kwiye min kunmud min iri-ge mbo ber-o. Sujwe woragolar-e, pem-e woragwi bug-o.