ABAKUK 3 - Nanduk Ngget Tul Pidnak Wene

Abakuk-nen tepan yidnak 3:1-19

¹ Mbal Pem Nagawan ene lomboksa yoso nap Abakuk-nen tepan yidnak wene-ge yu-o:

² Nagawan Indo wa-e. Kat-nen kwaroso wene-ge kuligi-o. Kolosolar-e, an narem-e kwiye wok yij-o. Nde, kat-nen kwiye worak kwarigen iri-ge tuguruk nit worali tarem ya kwari-o. Kar-e kisilepma yosolar-et nde, nenabuwa yi-o.

³ Mbal Pem Nagawan-e Mondok Marak kar-e Teman nggwe min ndobo worak Paran nggwe min-nen lobok yusu-o. Nde, mbal-e kat-nen kek tak woraso-nen muruk tak worasu-o. Nde, nggweyakma yu me-ge kat kerembel wanugwi elem-nen kobong tak worasu-o.

⁴ Kat keyaya abinal worak min-e lobok yusu-o. Kat keyaya kwiye worag-e kinggiyapma-nen mburusu-o. Nde, kat kamawi-ge kinggiyapma iri me-t kura bigen-o.

⁵ Kat-nen-e kugwi elem-e kat kabuwok noso rak posolat, nde, wat yugwi elem-e kat kimbirik noso rak posolat kwaroso-o.

⁶ Kat-nen nde ndong yosola-ge, nggweyag-e lele yusu-o. Nde, kerengen yik eneyasola-ge, ap enlem oboksa-nen wendet yogolat, kot kot yili-o. Ndobo mondok pem-nen woraso-t nde, mondok ngarep parep mbusu-o. Nde, ndobo ereba na bem-e kar-e o nanduk ereba-nen waring kaso-net yusu-o.

⁷ Nde, an-nen yik kasolar-e, Kusan woragwi nab-e kwiye elem enpem mbosolat, nde, Mirian nab-e kwiye-nen lele yogolat, kagi-o.

⁸ Nagawan Indo wa-e. Kar-e yi koma ala kisilepma yusu-a? Yi-nen kar-e kisilepma rak pusu-a? Kat-nen kilirak ombol nggwe rak enpeyeklug-e, nggan nggan-e wim tumburugwi kura min wim koma min nggal tak puruk, ebem kore yigen-o.

⁹ Kar-e kesan-e mondok lid lud tak puruk woralat, kamare-ge kunarak mondok mbising kudtak nak woralat kwarigen-o. Iri rak purug-e, nggweyag-e kat-nen ngara yi kwarak pigen-o.

¹⁰ Nde, kat yik keyarug-e, ndobo ereba na-ge lele yosolat, nde, talme-ge nggilara mberak pil mbuwaidnak nggal mbal pem-nen mbuwasolat, nde, yi nggweyak arem-e ene lu nggu mbosolat, yi koma na nggetlep petlep lobok yosolar-e, ene sabok mbabok mborosolat kwarij-o.

¹¹ Kat kamare abinal-e ndag-et nak abinal nggwerek luk mborosolat, kuwuru abinal yerek nggwerek mborosolat, iri yosola-ge, mo min waneya min-e ondolma-t tugup lak nak yosolat kwarij-o.

¹² Kar-e kisilepma min nggweyak urugwe ombol koborosolat, ap enlem oboksa kisilepma bem kuwok liri rak onposolat kwarigen-o.

¹³ Kar-e kat kilirak wisirik unpurak mborosolat, kat-nen lenak pidnak nagawan imiri yosolat kwareyekluk mborosolat worasu-o. Kat-nen-e meya yugwi nap tu lit eneyaso nab-e wosa mbud tak ibigen-o. At imbirik nugwi nab-e kat-nen pusa lak tak inpigen-o.

¹⁴ Wim nap kere ereba-ge o wija amawi nggal-et nit ndibi ndi rak nenpeyekluk lobok yukmu, it-nen idnak san ombo onowe iri na-ge kat kamare-nen mbiringin tak pigen-o. Nde, mbik mbok ap enarengge lak nab-e lel mberel onpogolat, enalen kagolat, nda tili nggal-et ir-e enalen pem-et nda tili-o.

¹⁵ Kat-nen idnak kura bem-nen yi koma eragup loro worak langgurak ereba na yomndosolat kuwok liri rak pigen-o.

¹⁶ Iri kwarigen wene kulurug-e, an-e lele yosolat, nindi min ndirij-o. Iri yosolar-e, mondok namawi lak, ndeyak irit yigi-o. Nowak uruna lasolar-e, kwara kondoksa mburusu bug-o. An-e an nimin wim mbarugwi nap ereba na Mbal Pem Nagawan-nen angin worak mberak puwa iri na-t yik karok nindiyabu worasu-o.

¹⁷ E ara na engen pigit lak yosolat, anggut ari na engen pigit lak yosolat, saitun engen mbarugwi tarem wok yidnag-et nde, ebe kwara mbarugwi na lak yosolat, nggandum mbato yapmu yagidnak na kwara pigit lak yosolat, lomba wam ereba na oboksa wat yosolat, wam uwi ereba na ondoro nak yosolat ma-t nde,

¹⁸ Nagawan Indo kar-e an nimiri yoso Nembal Pem Nagawan me, an-e pempa nalen nak kasolat woramin-o.

¹⁹ Nagawan Indo Mondok Kek tak kat-nen-e amawi wok nurusu-o. Iri yosolar-e, urusa ijok amawi nggal amawi rak posola, an ndobo worak nggwe nosola-ge, an konag-et nuwakluk kat-nen ndegel nuburuk nusu-o.