ABAKUK 2 - Nanduk Ngget Tul Pidnak Wene

Mberen pem tak posolat Nagawan Indo-nen wene onggo Abakuk tak tidnak wene 2:1-4

¹ An-e an-nen nerengen-nen tu mbal tenak woraso sa o mot worak iri na bem lamindik, Nagawan Indo-nen an yak nuruwa ereba na towarak woralat, an-nen ujwa mbarosolat-nen yak tidnak ereba na wene onggo-ge ngge nggal yuwa-o luk, yik karok worasolat kwarimin-o.

² Nde, Nagawan Indo-nen onggo-ge yu nggal yak nirij-o: ”An-nen kat kimbiri bem nam tak pimin mende-ge ap-nen ndag-et nak wonaruwakluk, kat-nen mimi nggweyak-nen konidnak mbarugwi kerep iri na bem mbari-o.

³ An-nen nam tak pimin mende-ge awo worasu me, engga bem mbarurag-o. Alat nde, iri kwaruwa tarem-e yanem-et wok ma-o. An-nen kat kimbiri bem nam tak pigi mende-ge ndemeret kwar-et ma-o. Yik kagolar-e, woraruk-nen kwat ma-o luk perali-t nde, mondok karok nak wolmin-o! Iri kwarurak tarem-e wog-et ma-o. Nimik tak puwa bug-o.

⁴ Kenaru wolmer-o. Meya kwarugwi nab-e inmiri yuwa bug-o. Alat nde, Mbal Pem Nagawan indi-nen pidnak kwat tenak worasu nab-e at-nen tugup lak Mbal Pem Nagawan-nen yidnak yidnak kwat tenak worasu bem-et mondok urug-et wolma-o” luk yij-o.

Ap anggun panggun tak unpugwi nap imbiri lamut tak inpidnak wene 2:5-20

⁵ Silobulo iri-ge pempa ap enmberam laso-nen yusu-o. Ukwe ukwe nak yugwi nap iri-ge yamuksa woragit lak, inndi-nen nak kek tak perenak woragwi-nen yusu-o. Wat yugwi elem-nen nimbir-e yoso buk, ap enlem oboksa lungguk nak mberak enperenak woraso iri na nggal-nen yili-o.

⁶ Alat nde, it-nen urugwe nggwe rak inpidnak ereba na-nen pesel onpogolat, nden karuk wene bem yak ondogolar-e: ”Kir-e nit nap enarengge mengga wanidnak ereba na bem silobulo winde yili-o. Iri bem-e kir-e mondok kinmbiri lamut mer-o! Kir-e yi mende ndi mende ombo yuwakluk, kenarengge wok indidnak ereba na ’Ndag-et uwi yager-o’ luk kiri kere yili iri-ge mepme tarem-nen keya bugub-o?” luk yuwa-o.

⁷ Kit-nen ap ereb-e yemndak unpuruk woragolar-et nde, kinndi yebet kagit lak ma-ge kit kenpem namat worasu ereba-ge kit-nen-e ereba-ge ereb-e terak min-et nambena uwi yakub-o. Kit kunuwim nap lobok yogolar-e, kenngena pologolat, kinsilobulo-ge mengga wanuwa-o!

⁸ Kit-nen-e yi nap ndi nap kwarat enarengge ndunugwi-t nde, kit-nen ap kwarat eneyabi wirik pogolat, o kwarat min o siri kwarat min ereba woragwi nap min ereba na kit-nen kenlengen lamburak nak kwat onpogolat woraigep ereba na bem it ereba-nen mengga mbiridnak nap lom worogolar-e, kit na nden-et kunpuwa-o.

⁹ Kir-e anggun panggun mende min lak tak onposo mende min kit kenpem mbud ma naru, kit kunuwi konag-et wolmakluk abuwokma-nen ndogorogolar-e, kit kinsilepma bem-nen wanidnak mende ereba na bem-nen konkwela-ge ukwe lak yaga ndak yaga wok indili-o. Iri bem-e kir-e kinmbiri lamut mer-o!

¹⁰ Alat nde, kit-nen kwarurak yebet kaigep wene iri-ge kit konkwela innggiri rak purak mende yebet kaigeb-o. Ap enlem kwarat lak tak onpogolar-e, kit kondomok nde lak yaga labuk yili-o.

¹¹ Iri-nen kerep pak leget wiridnak kerep-nen na kit kinmbiri lamut tak konposolat ene nggoksa yusu-o. O owak-nen na wene iri na anggungga bem onggo yusu-o.

¹² Kit-nen o siri iri na mendak pil lobok yogolar-e, o siri paro-ge meya kwarugwi elem pogolat, o iri na paro-ge ap wosa pogolat kwatli kir-e mondok kinmbiri lamut mer-o!

¹³ Yi nap ndi nap enlem kit-nen tenaga kunuwokma rak inpigep ereba na-ge mondok ebe lak anggun panggun kagolat pabok piga-o. Nde, it-nen yi mende ndi mende kwaridnak ereba na-ge kan-nen nuruk lak tak pij-o. Iri kwarid oboksa-ge Nagawan Indo Mondok Amawi worak iri na indi-n pidnak pem-et kwat yij-o.

¹⁴ Yi koma ereba-ge yi nak-nen kobong tak worasu nggal, iri nggal-et Nagawan Indo kek tak woraso obok enaru yugwi iri na-nen nggweyak ma yu me kobong ma-o.

¹⁵ Kir-e kit kendam woragwi nab-e pesel onpogolat, innggiri yaga keya inpigeb-o. Iri yogolar-e, ap inndi nden kaso yi nuruk landuluk landuluk nugwi kwarak inpigep me, kir-e mondok kinmbiri lamut mer-o!

¹⁶ Nde, yawo-ge kit kek tak kunpurak tarem-e lag-o. Alat nde, kit kinnggiri wosa keya kunpurak tarem-e wok yij-o. Nde, kit kentembel wanugwi iri na-ge nden yaga pesel kunpugwi nde kwat ma-o. Nagawan Indo-nen-e kit kenpem mberak purak angin worak kenanggo iri na-ge mondok mer-o luk lembesa kenpem puwa-o. Iri yuwama, kit-nen nonggolug-e, kinndi lak lak landuluk landuluk nugub-o.

¹⁷ Kir-e Libanon woraso e ndaruguwi-t nde, yawo-ge kit nde ndal kunpuwa-o. Kit-nen iri me woraso urugup worak ereba na worogolat woraigeb-et nde, yawo-ge urugup worak mende-nen na kir-e kwiye rak kunpuwa-o. Ereba kwat kunpuwa iri-ge kit-nen ap eneyabi wirik pogolat, kit-nen kinsilepma bem kenlengen lamburak nak o min o siri min ereba woragwi nap min lel mberel onpogolat woraigep iri na bem-net kwat kunpuwa-o.

^18-19 Kir-e mondok kinmbiri lamut mer-o! Kit-nen e telak mbi yak togolar-e: ”Kurak min-o!” yak togolat, nde, kerep nggok misik yak togolar-e: ”Men min-er-o” yak tili-o. Nde, ininggi-nen ndak wosa pidnak mende-nen-e wene mbi yak kondoso-a? Nde, ininggi-nen ndak wiridnak mende iri-ge emas min perak min-nen tap mbal mbal konidnag-et nde, urugup yoso buk-nen yusu-o. Kugwiwak ininggi-nen ndak wiridnak iri-ge no amanggim-o? Iri-ge ki nap ininggi-nen ndak wiridnak mende-nen yusu-o. Iri-nen yak kondosolar-e, ebe lak mende, enesiget nak yak kondoso-o. Kugwiwak ndak woroso nap iri-nen at inggi-nen ndak worak pidnak ene yoso buk iri na bem indi angin tubu yusu iri-ge we ebe lak ereba-t kwarusu-o.

²⁰ Nagawan Indo-ge at uwi marak iri na me-t worasu-o. Iri ala-ge, nggweyakma nap oboksa-nen enne laksa at indipma nak wolmomtag-o.