ABAKUK 1 - Nanduk Ngget Tul Pidnak Wene

Abakuk

¹ Wene yu-ge kwarurak wene Nagawan Indo-nen at ene lomboksa yoso nap Abakuk ebem wosa bidnak wene.

Mot mot kwarigit lak yogola, Abakuk indi abi kalok yosolat, nandug-et ujwa mbaridnak wene 1:2-4

² Nagawan Indo wa-e. An-e yongga noronokluk nggi yak kererenak worasu-t nde, kar-e mepme tarem-nen nene kuluruk, anggun panggun tak nunpugwi nap ininggem-nen ninmiri yugun-o?

³ Noluk-nen kar-e yi meya ndi meya ereba kasolat wolmakluk keya nubusu-o? Wene kwarat kwid togola-t nde, kat-nen-e yik karok nak lemberak wolmomtag-e ndag-er-a? Nin me nan me oboksa-nen lel mberel onpogolat, insilepma bem nari wari mbogolat yig nak nggogolat, kuri werep mberep mbogolat kwaril lobok yili-o.

⁴ Iri nggal kwarogolar-e, imiri mbarak pidnak wene ereba na-ge te rak pogolat, mot mot kwarugwi ereba na-ge nggok tak pigit lak yogolat kwatli-o. Meya kwarugwi nap-nen-e mot mot kwarugwi nap ereba na-ge tebek tak unpuruk, ir-et kek yili-o. Iri kwarogolar-e, mot mot kwarugwi ereba na-ge nden yaga nin tak pili-o.

Nagawan Indo-nen nandug-et ene erep nggaridnak wene 1:5-11

⁵ Iri luk, Nagawan Indo-nen at ilirak yak ondosolar-e: ”Enlem nin nap, kit kentalu inggi inggi worali nap ereba kwara lombot enper-o. Nde, kit-nen kwara lombot onpogolar-e, kit-nen-e: ’Ijar-o’ luk wi langgu mbarugub-o. Iri kwarugup iri-ge kit woragola ya tarem an-nen misik mende mbi kwarimin iri na obok nak nde yak kondogola-ge, kir-e ndemerer-o luk yebet kagup pug-o.

⁶ Enlem Mbabilonia nap insilepma worak-nen eneyak mbuk worak iri-ge an-nen-e it iri-ge ap enlem mondok enmawi worak tak irit unpusu-o. It iri-ge unuwi nggweyak pem-net obo nesa keya buruk lobok yogolar-e, ap enlem erep ereba na urugwe nggwe rak unpuwokluk yi wi ndi wi oboksa waring kali-o.

⁷ Nin me nan me it-nen nidnak sa-ge kwiye rak nak onpogolat, inndi kek tak pem imiri mbarak pidnak wene ereba na keya bogolat, it inndi-nen pidnak nak kwatli-o.

⁸ Masan tutul ijok nggarim-e kwarar-et nde, teberak nggal-nen yusu-o. Nde, it-nen idnak kura wam ijok nggarim-e kwarat-nen yusu-o. Serigala ndakngge nere bem isilepma-ge kwiye worag-et nde, it unkura isilepma-ge mondok kwiye worak terak minik-net yusu-o. Nde, ensan ombo kura wam pem korelug-e, o erepma-net lobok yili-o. Lobok yogolar-e, towe ijamu-nen at naso mende tenageyekluk lobok yoso nggal-et lobok yili-o.

⁹ Nde, ensan ombo ereba-nen enpem mbud yili-ge enpage-ge insilepma bem kwat unpuwokluk enpem mbud yili me, ap oboksa-nen it lobok yili ereba na kagolar-e, kwiye-nen ye le mbili-o. Nde, it-nen tenaga unuwokma rak inpidnak nab-e mondok kwarat, wonarurak pug-er-o.

¹⁰ Nde, it-nen-e nagawan nagawan ereba na pesel onpogolat, ap yabu winde kek tak ereba na nda ondogolat yili-o. Nde, kerep pak leget wiridnak ereba na-ge enlengenma nggal tak puruk, nggweyak yala pil laruk, nggogolar-e, o siri ereba na-ge mengga wanili-o.

¹¹ Wanurug-e, it ondomok enmawi erembel wanugwi ereba na-ge o wija nggal ndag-et nak mbitli-o” luk yij-o.

Abakuk indi abi kalok yosolat, mberen pem ujwa mbaridnak wene 1:12-17

¹² Nagawan Indo wa-e. Kar-e nanduk-net woraso Mbal Pem Nagawan-net yusu-o. Kar-e an Nembal Pem Nagawan mondok marak, pem irit woralik nalik woraso-nen yusu-o. Nagawan Indo kar-e Nenmbal Pem Nagawan nggetlel nuburuk woraso-nen yusu-o. Nde, Mbabilonia nap iri-ge kat-nen lenak unpuruk, nit angin worak nenpem puwakluk kat-nen enmawi worak tak inpigen-o.

¹³ Alat nde, kar-e meya yugwi nap insilepma worak ereba-t nde, kar-e nggesa-nen mamak puruk, yik eneyarok nak worasu-o? Kar-e mondok marak yu-t nde, it-nen meya kwatli ereba yik eneyarok wolmomtag-e ndag-er-a? Nde, kat-nen lugud tak kwarugwi ereba yik eneyarug-e, kar-e sok wururak nde kwat yusu bug-a? Iri ala-ge, noluk-nen kat kaye worak nap ereba na it wene tarugwi nap ereba na-nen yigisa keya onpogola-t nde, kar-e kindiyabu nak worasu-o?

¹⁴ Noluk-nen kat-nen-e ab-e yi koma arem woraso keyane min iri-nen nagweyak tena unpuruk woraso ombo lak ereba na min nggal kwarak unpusu-o?

¹⁵ Nde, Mbabilonia nap-nen-e mbong kere bem keyane nggiksa lit kagwi nggal ab-e nggiksa wok inpili-o. Nde, it ereba na-ge Mbabilonia nap-nen-e keyane wanugwi sum pem mberena yarak onpogolar-e, it-nen iri kwatli ereba na bem enalen nak ko yili-o.

¹⁶ Iri yogolar-e, it-nen ap wok unpugwi sum iri na kek tak pogolar-e, sum iri na bem-nen nunggwi mende kwarat wanogolat, yi mende ndi mende ndak tak onposola karuk, ap wok unpugwi sum iri na kek tak pogolar-e, wam wosa amanggim pili-o.

¹⁷ Nde, it iri-ge kabo lit karuk, pempa ap enlem ereba na enabuwa lak, enderenak wolmomtag-e ndag-er-a?