3 YOANES 1 - Nanduk Ngget Tul Pidnak Wene

Wa yid wene 1-4

¹ Nindi kundik nanggam Nggaius wa-e. Ogore yidnak nap an-nen ndemeret kabuwa kasu-o luk engga yu mbal kurusu-o.

² Nanggam nindi kundik wa-e. Kat kindi angin tubu yigen konag-et tena worasu nggal, kat kebe na andi bandi lak, konak nak woranokluk an-e kamanggim tepan yoso-o.

³ Nde, nenggamirak erep lobok yigarik, kat kimin yogolar-e: ”Lag-o. At iri-ge ndemeret wene nak wanusu-o” luk yogola kulurug-e, an nalin nalen kwarat kagi-o. Nde, kar-e pempa lud tak nak kwarosolat worasu-o.

⁴ Nde, nin mende bem an-e nalen marig-et kaso-t nde, an nilirag-e ndemeret lud tak nak kwarogolat worali-o luk yogola kulurug-e, nalen kwarat kasu-o.

Nggaius erembel wanidnak wene 5-8

⁵ Nanggam nindi kundik wa-e. Kat-nen nenggamirak aid wene wanidnak nap yongga ondosolar-e, kat karu buk nab-et nde, kwara mot mor-et yongga ondoso-o.

⁶ Nde, kat-nen it enabuwa kaidnak wene-ge it-nen-e yu me woragwi Yesus ebem lambuk tak inpidnak nap na yak indiga-o. It-nen tu mbitli iri-ge konag-et mburuwakluk, kat-nen yongga ondosolar-e, Mbal Pem Nagawan alen tak pugwi mende bem yongga indi-o.

⁷ Nde, nennggamirak iri mbitli iri-ge Kerisut eyabu wanurak pem mbitli-o. Nde, it iri-ge inndi angin tubu yigit lak nap ininggem-nen silobulo mbi wanili bug-o.

⁸ Iri bem-e, nit Kerisut nap-nen-e nennggamirak Kerisut nap iri-ge ndemeret yabu wanili iri-ge totno wanidnak nggal-e mondok yongga undurag-o.

Ndioterepes min Ndemeterius min inmin yid wene 9-12

⁹ An-nen-e lambuk tak inpidnak nap na enmanggim engga poro-t mbarigi-t nde, it ennggendumu an-net nagawan teyeg-o luk peraso nap Ndioterepes na-nen-e an nene kuligit lak yij-o.

¹⁰ Iri bem-e, an lobok yimindig-e, at-nen kwaroso iri wene at-nen meya wene yak nondosolat, enesiget wene nenpem posolat yoso pidsa-ge yimin-o. Nde, iri kwaroso ereya bem na-ge ebem teyok yusu bug-o. Are, nennggamirak Kerisut nap lobok yogola-ge, ar-e wok inpigit lak yoso iri nag-e lag-o. Are, it wok unpurak yidnak nap na mbawi worak posolat, ap enpe-ge lambuk tak inpidnak nap ennggendumu-nen nggegera wirik onposo-o.

¹¹ Nanggam nindi kundik wa-e. Meya kwarugwi na kat-nen nde mul mul meya kwarurak pug-o. Are, konak nak kwarugwi irit nde mul mul kwarurag-o. Konak nak kwarugwi nab-e Mbal Pem Nagawan ilirak-nen yili-o. Nde, meya nak kwarugwi nab-e Mbal Pem Nagawan kagwi buk nap-net yili-o.

¹² Ap pidsa-nen Ndemeterius iri-ge erembel wanili-o. Ndemeret wene-nen na irit at erembel wanusu-o. Nde, nit-nen na irit, at erembel wanili-o. Nde, nit-nen erembel wanili iri-ge ndemeret lombog-o luk karu nar-o.

Worok tak posolat wa yid wene 13-15

¹³ An-nen yak kururak wene-ge kwarat worasu-t nde, engga bem nak mbarurag-e nimbir-o.

¹⁴ Yanem nggal-et totno lambuk luk, wene mbarul-o luk perasu-o.

¹⁵ Kindi yek tag-et wolmin-o. Kenggamirak yu me-nen-e wa yak kiriga-o. Nde, an-nen nenggamirak wa yak indigi iri-ge enarik tak lombok wa-o yak kindij-o luk yak indi-o.