2 TIMOTIUS 4 - Nanduk Ngget Tul Pidnak Wene

Yabu wanuwakluk wene mbo kibid na-ge kwara wanosolat wolmin-o luk, yidnak wene 4:1-8

¹ Mbal Pem Nagawan imbiri bem min unluk worali nap min wat yidnak nap min enpem wene mbaruwa nap Kerisut Yesus imbiri bem min at lobok yuwa bem-nen na, at-nen tenagaidnak wi bem-nen na, an-e wene yu mondok kiri keresa yak kurusu-o:

² Aid wene yosolat wolmin-o. Aid wene yosolar-e, kologola na, kuligit lak ala na, it enpem-o luk kar-e lembesa yosolat nak wolmin-o. Ap kwara enaru rak posolat, it meya yidnak nam tak posolat, nggomo ondosolat, kindi mondok luruk puruk mul ondosolat wolmin-o.

³ Ap-nen-e ndemeret wene kulurak keya buruk, it-nen ukwe ukwe mende na langgal luk mborogolar-e, it kulurak indingen wene yak unduwakluk, nggomo undugwi nap kwarat lesa endam tak purak tarem-e mondok lobog-et yuwa-o.

⁴ It-nen-e ndemeret wene kulurag-e eneyanggo ngguluwa-t nde, wene lom kulurak pem-e eneyanggo paluruk nuwa-o.

⁵ Alat nde, kat perak nde yi mende ndi mende kwarosolar-e, kindi min-et kwara woralat, lel mberel kobogola, mamak puruk woralat, aid wene yoso nap-nen yabu wanoso nggal yabu wanosolat, Mbal Pem Nagawan-nen kebem pidnak yabu iri-ge kwara wanosolat wolmin-o.

⁶ Nde, an perak nde Mbal Pem Nagawan amanggim wosa pidnak nggal, an wat momtak tarem-e panggo yij-o.

⁷ An-e konak nak pong kil mbirigirik, kondok yil mburugwi sa wok yigi-o. Inndi angin tubu yugwi elem-e kwara parugu woragi-o.

⁸ Nde, yawo-nen-e ombol nggwe yidnak nap wok undurak wirik iri-ge an namanggim lid lud tak worasu-o. Mot mot nak enpem wene mbaroso Nagawan Indo-nen-e at lobok yuwa Tarem-nen wirik iri na wok nuruwa-o. Nde, an narig-et wok nuruwa-ge lag-o. Are, Nagawan Indo lobok yuwa-o luk inndi ebem mbung mbung tak woragwi nap oboksa na wok unduwa-o.

Paulus-nen at ondomok owene yidnak 4:9-18

⁹ Ndag-et nak at neram lobok yonok-nen mondok kamawi kwindi-o.

¹⁰ Nde, Ndemas na-ge nggweyak ma mende indingen tak puruk, an yumbuk neyaruk, Tesalonika mbirij-o. Kereskes na-ge Nggalatia mborosolat, Titus na-ge Ndalmatia mborosolat yiga-o.

¹¹ Lukas arig-et nimin worasu-o. An yabu wanosola, at-nen yongga nururag-e ndak me, Marakus iri kimin tak puruk, lobok yi-o.

¹² Tikikus iri-ge Epesus wirik pigi-o.

¹³ Kat lobok yosolar-e, o Teroas iri me Karapus ama keya bigi nembem sum na min engga tap na min nggok lombog-e wam aboro lerak pem mbaridnak engga penak na min wok niril lobok yi-o.

¹⁴ Posid konoso nap Aleksandet na-ge an kwarat meya rak nibij-o. Nagawan Indo-nen at-nen kwaridnak ndak ndag-et kwat ubuwa-o.

¹⁵ At iri-ge nit-nen yugwi wene-ge kwarat eyak woroso me, at imin-e kwara woragun na-e.

¹⁶ Nandug-et nagap ndageyekluk wene yigi tarem-e ap misiger-o luk tet an nimin yigit lag-o. Are, it pidsa keya nuburuk, ndi yiga-o. Iri kwariga iri-ge it enpem mbugu-o.

¹⁷ Alat nde, Nagawan Indo an nimin worala me, aid wene pidsa-ge an-nen ndak yak ondosola, it enlem nin nap oboksa kuluwaklug-e, amawi wok nirij-o. Iri nggal yosolar-e, singa ndakngge emendam-nen mengga keya nibij-o.

¹⁸ Nagawan Indo-nen-e an meya rak nuburak mende pidsa inggem-nen ming nuburuk, an nimiri yosolug-e, at-nen tenagaidnak wi aid arem iri me nibil ngguwa-o. At unu kek tak pem-et woralik nalik irit wolmag-o. Amen.

Wa yak indidnak wene 4:19-22

¹⁹ Periska min Akwila min Onesiporus ama woragwi nap min-e an-nen wiwa-o yak kindij-o luk yak indi-o.

²⁰ Nde, Erastus na-ge Korintus puk agaij-o. Nde, Teropimus na-ge kugi worak-nen Miletus keya bigi-o.

²¹ Kimamo yoso tarem wok yigit lak ma-net lobok yugun na-e. Ebulus min Pundes min Linus min Kelauria min nennggamirak erep oboksa-nen na wiwa-o yak kitli-o.

²² Nagawan Indo-ge kat kindi imin wolmag-o. Nde, Mbal Pem Nagawan-nen we wok ondoso elem-e kit pidsa kinmin wolmag-o.