2 TIMOTIUS 2 - Nanduk Ngget Tul Pidnak Wene

At na andi bandi kujwakluk yonggo ibidnak wene 2:1-13

¹ Nambara wa-e. Nir-e Kerisut Yesus imin misiget yogola, we wok ondoso elem wok nundusu iri na bem kamawisa wolmin-o.

² Ap kwarat inmbiri bem an-nen nggomo kirigi na-ge kat-nen na iri nggal-et mot mor-et kwarugwi nap enpem posola-ge, it-nen na iri nggal-et nin nap mul unduwaklug-e, yak ondosolat wolmin-o.

³ Kar-e Kerisut Yesus uwim tomboroso nap konak nap yosolar-e, kat na andi bandi-t kudtak ob-o.

⁴ Wim tomboroso nap-nen wim tomborosolar-e, at owe nagawan-nen at alen iyujwaklug-e, at ondomok owene-ge yebet kaso bug-o.

⁵ Keyari poso nap-nen keyari posolar-e, keyari pogolat-nen kwarugwi ndak ndag-et kwaridnak pem-net ombol nggwe yoso-o.

⁶ Yabu wanoso nap-nen yabu wanosolat irigak mbidnak pem-e ebe yidnag-e at-net nanduk mbaroso-o.

⁷ An-nen yusu wene yu-ge kwara yebet ki-o. Nagawan Indo-nen yi mende ndi mende karu yonok-nen indi pindong tak elem wok kuruwa-o.

⁸ Wene yu yeberak wolmin-o: An-nen yoso aid wene iri-ge Ndaud-nen wigarak nap Yesus Kerisut, wat yidnak nap ennggendumu-nen uruk yidnak nap owene-t yoso-o.

⁹ An-e aid wene yoso iri bem-net andi bandi kasolat, meya kwaroso nap nggal tak nuburuk, posid kere bem kamat niwidnak worasu-t nde, Mbal Pem Nagawan-nen yidnak wene perak kamarigit lag-o.

¹⁰ Iri bem-nen Mbal Pem Nagawan-nen len inpidnak nap enmanggim, it na irit inmiri yurak elem Kerisut Yesus ebem worasu iri min, pem-et wolmomtak abinal min wanuwakluk, kwarat lel mberel nobogola-t nde, neyak linggirik worasu-o.

¹¹ Wene yu-ge mondok ndemerer-o: ”Nir-e at imin wat yidnak nde ala-ge, at imin-et nunluk mul-o.

¹² Nde, nir-e neneyak linggirik nde wulmulndig-e, at imin nagawan wulmul-o. Nde, nit-nen nde at imin-e ’Naru bug-o’ luk yogola-ge, at-nen na nit ninmin-e ’Naru bug-er-o’ luk yuwa-o.

¹³ Nit nde mot mot kwarigit lak yogola-ge, ar-e mot mot nak kwaroso me, at ondomok eyubul purag-e meya-o.”

Enesiget wene mul undugwi nap-nen kabak tak unpuwa naru nggomo wiridnak wene 2:14-26

¹⁴ Wene yu-ge kweyap yeberak inpi-o. Mbal Pem Nagawan imbiri bem-et kene amawi min-et yak ondosolar-e: ”Yi wene ndi wene bem-e ngguno purak pug-o” luk yak indi-o. Iri kwarugwi iri-ge ebe lak wene kulili nap iri na inndi kabak tak unpurak wene-nen yusu-o.

¹⁵ Mbal Pem Nagawan-nen: ”An neyabu wanoso nap ndag-o” luk kuburujwaklug-e, kar-e ndemeret kamawi kondosolat wolmin-o. Nde iri-ge kat-nen yabu wanidnak na bem kinggiri kagun naru, ndemeret wene iri-ge mot mor-et mul ondosolat wolmin-o.

¹⁶ Nde, ebe lak meya wene iri-ge keya bi-o. Iri mende wene-nen-e ap meya elem nak ijak wat yoso-nen yusu-o.

¹⁷ It-nen mul undugwi wene iri-ge lak yoso buk ndigiril laso mbijap nggal-nen yusu-o. Nde, Imeneus min Piletus min iri na iri kwarugwi worali-o.

¹⁸ It iri-ge ndemeret wene na lugud tak pogola-nen mul ondogolar-e: ”Ap unluk momtak tarem-e abu kwat yamu-o” yogola-ge, ap erep inndi angin tubu yidnak na lak tak pili-o.

¹⁹ Alat nde, Mbal Pem Nagawan-nen pidnak o paro iri-ge mondok tugup lak, sil kudtak puk-nen yusu-o. Nde, paro iri bem-e wene yu mbarak worasu-o: ”Nagawan Indo-nen-e at arengge rak inpidnak nap iri-ge ar-e aru-o” luk ” ’An-e Nagawan Indo arengge-nen yusu-o’ luk yoso nab-e at-nen meya kwaroso iri-ge keya buwag-o.”

²⁰ O nggulok arem-e piring min togolwak min kwarat worasu-o. Ereb-e emas min perak min pem-nen konidnak nak worasu-ge lag-o. Are, e min nggweyak min pem-nen konidnak na worasur-o. Nde, ereb-e nggulok sakwi tarem-nen wanogolat, nde, ereb-e we tarem-nen wanugwi-o.

²¹ Ta-nen nde at meya yidnak keya buruk, at ondomok mat korasu nab-e nggok sakwi tarem-nen wanugwi piring nggal kwat ma-o. Piring iri ombo-nen arengge indi kundik woraso kwat luk, konak mende pidsa kwarurak lid lud tak pidnak piring nggal kwat ma-o.

²² Ap sugwe-nen ukwe ukwe yugwi mende iri keya buruk, it inndi mbek tak pem-net Nagawan Indo emengen mbarugwi nap inmin-et kwarosolar-e, lud tak nak kwarugwi mende min inndi angin tubu yugwi elem min ap enabuwa kagwi elem min lambuksa woragwi elem min nak langgal luk mbiri-o.

²³ Alat nde, ebe lak nil kil tak wene iri-ge erep tenagurak pug-o. Nde, wene iri-ge ngguno pugwi elem-nen yusu-o luk kar-e karu-o.

²⁴ Nagawan Indo ndegel poso nap-nen-e ngguno purag-e meya-o. Ap pidsa inmin-e yeget ndeget yosolat, ap mul ondoso aru nap yosolat, mamak poso nap yosolat,

²⁵ wene eyak wurugwi nab-e indi yangonak pem-net tu mirik onposolat mag-o. Iri kwarosola-ge, Mbal Pem Nagawan-nen it inndi kondok yurak tarem wok ondosola, kondok yogolat, ndemeret wene na enaru yogolat nde ma-o.

²⁶ Iri nggal kwarogolar-e, it inndi wok yosolar-e, Sere indi-n pidnak kwaruwakluk, at egere ma ngonok tak inpidnak na me-nen nggogora mburuwa-o.