2 TIMOTIUS 1 - Nanduk Ngget Tul Pidnak Wene

Wa yak tidnak wene 1:1-2

¹ Kerisut Yesus ebem unlug-et wolmomtak aru pidnak wene yak unduwakluk, Mbal Pem Nagawan indi-n pidnak pem Kerisut Yesus-nen idnak wirik nibidnak nap Paulus an-nen-e

² kabuwa worak nambara Timotius kamanggim mbarusu-o. Nineid Mbal Pem Nagawan min nit Nenagawan Indo Kerisut Yesus min-nen-e we wok ondoso elem min ap unpud kagwi elem min yamuksa woragwi elem min wok kuruwag-o.

Mbal Pem Nagawan wiwa-o yak tidnak wene min tugup lak wolmakluk nggomo wiridnak wene min 1:3-18

³ Nanduk nonmborak-nen Mbal Pem Nagawan ndegel ibiga na nggal-et an-e yebet kaso nindi mbek tak pem-et ndegel oboso Mbal Pem Nagawan iri na wa yak toso-o. Kubu-nen na, lengge-nen na, an-e pempa kamanggim tepan yoso-o.

⁴ An-e yip tigen iri na nindi yeberak woralat me, nindi mondok yamuk makluk, kat kiyudtag-e mondok nindingen-o.

⁵ Kat ndemeret kwara kindi angin tubu yigen na an yebet yebet tak worasu-o. Nde, kat kowo Lois min kiya Eunike min inndi angin tubu yiga iri na ereb-et kat na iri nggal-et kindi angin tubu yidnak worasu-o luk an-e mondok naru-o.

⁶ Iri bem-e, an ninggi tena kobosola, Mbal Pem Nagawan-nen we wok ondoso wok kirid iri na uruk tak ponokluk yeberak kubusu-o.

⁷ Nde, Mbal Pem Nagawan-nen-e kwiye yurak indi wok nundusu-ge lag-o. Are, Konak Indi-nen-e nenmawi rak posolat, ap enabuwa kagwi rak nonposolat, nondomok mamak puruk wolmomtak elem wok nondosolat, yusu-o.

⁸ Iri bem-e, nit Nenagawan Indo-nen yidnak wene ap yak ondosolar-e, kinggiri yurak pug-o. Nde, at ebem-nen an o kubu me nibil nggwidnak me, an nebem-nen na kinggiri yurak pug-o. Are, Mbal Pem Nagawan-nen amawi wok korosola, aid wene bem lel mberel kobogola, andi kasolat wolmomtag-e ob-er-o.

⁹ Mbal Pem Nagawan-nen-e nit ninmiri yosolat, at-nen idnak nap makluk wene mbo nonposolat kwarid iri-ge nit-nen kwaridnak pem-e lag-o. Alat nde, at indi-n peraruk, at-nen we wok ondoso bem-net kwat ninpij-o. Nde, we wok ondoso elem iri-ge o awo ndak wirigit lak ma-net Kerisut Yesus ebem wok nindij-o.

¹⁰ Alat nde, at-nen we wok ondoso elem iri-ge Ninmiri Yoso Nap Kerisut Yesus na lobok yid iri-nen nam tak pij-o. Nde, Kerisut-nen-e wat yugwi elem na lak tak puruk, aid wene bem-nen unlug-et woralik nalik momtak elem na nam tak pij-o.

¹¹ Aid wene yu tumburuwakluk, an-e yil noso nap, wirik nibidnak nap, mul ondoso nap iri rak nibij-o.

¹² Iri bem-nen an-e andi bandi yeba nggal kasu-t nde, ninggiri lag-et worasu-o. Nde, iri-ge an-nen ebem nindi angin tubu yigi nap iri-ge an-e naru-o. Nde, an wok niridnak mende iri-ge at iri-nen-e mondok ndak irit yik karok worasoma, Nagawan Indo lobok yurak Tarem wog-et ma-o luk naru-o.

¹³ An-nen ndemeret wene mul kirigi iri na-nen yidnak yidnak kwara kwarosolat wolmin-o. Nde, Kerisut Yesus imin kundik worasu me, kindi angin tubu yidnak worasolat, ap enabuwa kasolat wolmin-o.

¹⁴ Nit nenarem worasu Konak Indi amawi bem-nen kat kebem pidnak konak mende iri-ge kwara parugu wolmin-o.

¹⁵ O Asia woragwi nap pidsa an keya nuburuk ndi yogolar-e, ap Pigelus min Eremogenes min na irit keya nuburuk mbiriga wene kar-e karu nar-o.

¹⁶ Pempa an nindi kondok tak posolat woraidnak me, Nagawan Indo-nen-e Onesiporus ama woragwi nap inmin-e unpud kasolat wolmag-o. An-e o kubu me worasu yu bem-e Onesiporus na inggiri kagit lag-o.

¹⁷ Alat nde, Onesiporus na-ge Oroma wok yosolat-net an nogore nid nid neyagaij-er-o.

¹⁸ Onesiporus-nen-e o Epesus-nen an kwarat yongga nirid wene-ge kar-e karu nar-o. Iri kwarid pem-e, woroksiyem ap enpem wene mbaruwa Tarem-nen-e Nagawan Indo-nen at ubud kujwag-o.