2 TESALONIKA 3 - Nanduk Ngget Tul Pidnak Wene

Tepan yogolat, yabu wanogolat yurak wene 3:1-15

¹ Nde, nenggamirak wa-e. Nit nenmanggim tepan yogolar-e, Nagawan Indo owene na-ge kit kennggendumu-nen kwat yid na nggal-et ndag-et nak wigak yosola, kek tak puwakluk, tepan yogolat wolmer-o.

² Ap pidsa-nen inndi angin tubu yili-ge lak me, Mbal Pem Nagawan-nen-e nari wari rak pugwi nap min meya kwarugwi nap min ininggem-nen ninmiri yuwakluk, nenmanggim tepan yurag-o.

³ Alat nde, Nagawan Indo-ge mot mot nak kwaroso-nen yusu-o. At-nen-e amawi rak konposolat, Meya nak Kwaroso Nap na-n meya rak kunpuwa naru kontowarak worasolat ma-o.

⁴ Nde, nit-nen yak kindidnak wene-ge yawo na kwatli-o, nde, abok na iri nggal-et kwarogolat wolma-o luk Nagawan Indo ebem ala, ninndi-ge kit kenpem mbung mbung tak worali-o.

⁵ Nagawan Indo-nen kit kinndi ndemel konposolar-e, Mbal Pem Nagawan abuwa kagolat, Kerisut-nen mamak poso nggal mamak pugwi nap tak kunpuwag-o.

⁶ Nennggamirak wa-e. Nennggamirak perari worak nap min nit-nen kit yak kindidnak wene iri na-nen yidnak yidnak kwarugwi buk nap min it endam-nen nuruksa wolmer-o luk, nir-e Nagawan Indo Yesus Kerisut unu bem-et kiri keresa yak kindili-o.

⁷ Nit-nen kwarugwi nggal kit-nen kwarogolat wolmomtak iri-ge kir-e kenaru-o. Nir-e kit kinmin woragolar-e, perari min-e woragit lag-o.

⁸ Nir-e ap unmburu ndek tak siyag-et ter-o luk we ninggit lag-o. Are, kit kennggendumu ap misiger-o luk tet anggun panggun tak kunpul naru, nit nondomok-net kubu-nen lengge-nen yabu wanogolar-e, siri mbara wanogolat ninligak mboroso-o.

⁹ Iri kwarige iri-ge, yi mende ndi mende wok nundurak meya ala-nen kwarige-ge lag-o. Are, nit nenpage nggal kwarobokluk, mirik konpogolat-nen kwarige-o.

¹⁰ Nir-e kit kinmin woragolat-nen kiri keresa yak kondogolar-e: ”Yabu wanoso buk nab-e nunggwi mende mak turak pug-o” luk yak kindige nar-o.

¹¹ Iri yak kindili iri-ge, nit-nen kologolar-e, kit kennggendumu iri me-ge ap ereb-e perari lembe woragolat, yabu marig-et ter-o luk wanigit lak woragolar-e, ap nin onowene kambok tenak worali-o luk yogola kuluruk-nen yak kindili-o.

¹² Nit-nen iri kwatli nap enmanggim Nagawan Indo Yesus Kerisut unu bem-nen wene wosa pogolat, nggomo ondogolar-e, ir-e kondoksa woragolat-nen ondomok ininggi-nen yabu wanuruk, nunggwi mende nonggolat wolmag-o.

¹³ Alat nde, nennggamirak wa-e. Kir-e konak nak kwarogolat - wolmomtak iri-ge kenperari yurak pug-o.

¹⁴ Nit-nen mbaridnak engga yu-nen yidnak yidnak nak kwaroso buk nap mbi worala-ge, kit-nen ap iri na lombot uburuk, at inggiri kujwakluk mondok imin are kundurak pug-o.

¹⁵ Alat nde, at iri-ge kit kinmin sirid nap kwat inpidnak nggal kwat uburak pug-o. Are, kat kanggam-net yusu me, nggomo wururag-o.

Wa yak indidnak wene 3:16-18

¹⁶ Nit lambuk tak nonposo elem Nagawan Indo at-nen-e pempa yi mende ndi mende bem-e lambuksa woragwi elem wok kondosolat wolmag-o. Nagawan Indo-ge kit pidsa kinmin wolmag-o.

¹⁷ Paulus an-net wa yak kundusu-o. An nondomok ninggi-nen mbarigi-o. Nde, an-nen mbara wirik pidnak engga oboksa yenggerak puwakluk an nunu-ge yu nggal mbaroso-o.

¹⁸ Nit Nenagawan Indo Yesus Kerisut-nen we wok ondoso elem-e kit oboksa kinmin wolmag-o.