2 TESALONIKA 2 - Nanduk Ngget Tul Pidnak Wene

Nagawan Indo lobok yekluk yosola, nari wari mburak wene 2:1-12

¹ Nit Nenagawan Indo Yesus Kerisut lobok yurak wene min, nit at eram ndok worak nunpurak wene min ala-nen an-nen kiri keresa yak kundusu-o. Nenggamirak wa-e.

² Ap-nen yogolar-e: ”Lag-o. Nagawan Indo lobok yurak Tarem irit kwat agaij-o” luk yogola na, kirimbi yogola na, ”Irit yamu-o” luk nit-nen mbaridnak engga nggal yak kondogola na, kulurug-e, kir-e ndag-et nak wendet luk, kinndi pok yurak pug-o.

³ Ap-nen konmbol pem lujwakluk, ndeyak yurak pug-o. Iri Tarem awo wok yigit lak ma-ge, wene yu nggal-e mondog-et kwat ma-o. Ap kwarat-nen it inndi angin tubu yidnak na keya bogolat, kan mare arem wirik uburak lud tak pidnak Meya nak Kwaroso Nap iri na nam yosolat ma-o.

⁴ At iri-ge at ondomok kek yosolar-e, ap-nen erembel wanugwi mende pidsa min Mbal Pem Nagawan nggal lik kagwi min imin wim mbarak woralar-e, iri mende oboksa-ge at-nen urugwe nggwe rak puruk, Mbal Pem Nagawan ama kore lug-e, ”An-e Mbal Pem Nagawan-net yusu-o” luk yuwa-o.

⁵ An-e kit kinmin woralar-e, wene yu oboksa yak kondosolat woragi iri-ge kir-e yebet yebet tak worali bug-a?

⁶ Nde, yawo-ge at tena buruk woraso-ge kenaru-o. At nam yurak tarem ndak yosola-net Meya nak Kwaroso Nap iri nam ma-o.

⁷ Nde, meya nak kwarugwi mende iri-ge yawo na eyabu teberebe wanusu-t nde, at puk tak oboso na wabosola-ge,

⁸ iri tarem-e Meya nak Kwaroso Nap iri na nam yosola-ge, Nagawan Indo Yesus-nen at emende pu-nen at mondok worosolat, at lobok yosolat abinal-nen at iri lak tak puwa-o.

⁹ Meya nak Kwaroso Nap lobok yuwa iri-ge Sere amawi min eyabu wanosolar-e, kwiye worak mende nin tak nan tak kwarosolat, enesiger-et nde, yenggerak purak mende min wi yurak mende min kwarosolat,

¹⁰ meya nak kwarugwi mende bem lak tak unpurak nap onmbol pem lasolat ma-o. Nde, it lak tak unpuwa iri-ge, it-nen-e it inmiri yurak ndemeret wene iri na insili rak puruk, wanigit lak yidnak pem-nen kwat unpuwa-o.

¹¹ Iri bem-nen ir-e enesiget wene bem inndi angin tubu yuwakluk, Mbal Pem Nagawan-nen-e enesiget elem it enarem yabu wanuwak-nen endam pil lobok yusu-o.

¹² Iri-ge ndemeret wene bem inndi angin tubu yugwi buk nap, meya kwarugwi elem indingen tak pugwi nap oboksa enpem wene mbaruwa-o.

Inmiri yekluk len inpidnak wene 2:13-17

¹³ Nennggamirak Nagawan Indo-nen kenabuwa kaso wa-e. Kit kenpem ala, nir-e mondok pempa Mbal Pem Nagawan wa-o yak togolat wulmul-o. Tel kwiridnak kuri-net Mbal Pem Nagawan-nen kinmiri yekluk len konposolar-e, Konak Indi-nen mbek tak kinpidnak pem na, ndemeret wene bem kinndi angin tubu yigep pem na len kinpij-o.

¹⁴ Yu kwat kunpuwakluk-net nit-nen yak kindige aid wene bem Mbal Pem Nagawan-nen wene mbo kinpid na-ge, nit Nenagawan Indo Yesus Kerisut unu kek tak pidnak iri-ge at imin totno winde yobok-nen wene mbo kinpij-o.

¹⁵ Iri bem-e, nenggamirak wa-e. Kit mondok tugup lak woragolar-e, nit-nen mirik kinpidnak wene-ge nenne bem-nen yak kindidnak wene na irit, engga bem mbal kindidnak wene na irit, puksa tena wolmer-o.

¹⁶ Nit Nenagawan Indo Yesus Kerisut at-nen na, Nineid Mbal Pem Nagawan-nen na, nit nenabuwa karuk, we wok ondoso elem pem-nen wok nondosolar-e, lak yoso buk inndi yangonoso elem min inndi mbung mbung tak woragwi elem min wok nunduruk,

¹⁷ kit kinndi eyak worosolat, konak nak kwarogolat, konak wene nak yogolat yobokluk-nen amawi wok kondosolat mag-o.