2 SEMUEL 7 - Nanduk Ngget Tul Pidnak Wene

Natan-nen Ndaut yak tidnak wene 7:1-17

¹ At uwim nap-nen at sil iyujwa naru, Nagawan Indo-nen-e Nagawan Ndaut iri na-ge nggetlel puruk worasola, ar-e at woraso sa iri na me-t tugup lak woragij-o.

² Nde, Nagawan Ndaut-nen Mbal Pem Nagawan ene lomboksa yoso nap Natan yak tosolar-e: ”An-e nuwi-ge e Libanon-nen ngatluk lobok yidnak pem wiridnak wi konak arem-et worasu-t nde, urul pidnak wene labu mbarag-e sum-nen wiridnak wi o lije iri na arem nde worasu yu ki-o” luk yak tij-o.

³ Yosoloma, Natan-nen yosolar-e: ”Nagawan Indo-nen yongga korosola me, nagawan kat kindi-nen perasu-ge kwarurak nag-o” luk yak tij-o.

⁴ Alat nde, iri na tarem kubu Nagawan Indo-nen Natan yak tosolar-e:

⁵ ”Kar-e ndegel noboso nap Ndaut iri eram mburugundik, wene yu tak ti-o: ’An nuwi wururak nab-e kar-a?

⁶ Mondok nanduk an-nen Isarael nap Mesira-nen wisirik inpigi kuri-net yawo kuri-ge o misik arem-e mondok woragit lag-o. Alat nde, waring kasolar-e, an-e o lije sum wi arem nag-et woraso-o.

⁷ Nde, an-e Isarael nap inmin waring tenak woralar-e, an-nen Isarael nap ennggendumu enne kulugwi nap an-nen len inpigi ereba yak ondosolar-e: ’Kir-e noluk-nen e Libanon-nen ngaridnak pem namanggim o mbi witli bug-o? luk mbi yak ondoso bug-o.’

⁸ Iri bem-e Natan kat-nen an ndegel noboso nap Ndaut iri yak ti-o. An-e Nagawan Indo Nemawi Worak-nen at yak tosolar-e: ’An-nen kat len kibigi iri-ge kar-e nembaga ereba-nen lomba wam ndogorosoma, len kuburug-e, an nilirak enanggul pem nagawan mendak kubukmu-o.

⁹ An-e pempa kat kimin woralat, kat nusu sa-ge pempa kimin-et mburusu-o. Kat-nen kuwim nap inmin wim mbarosola-ge, an net ndegera lak tak inpigi-o. Ap nggok nggweyak ma yu me-nen enanggu onpok mburusu nggal an-net kanggu kobok worak tak pimin-o.

^10-11 Iri-nen an nilirak Isarael nab-e tuguruk sil eneyagit lak, kona yamuksa wolmakluk an-nen ondoro mbi lenak puruk, iri me-t wolmer-o yak indigi-o. Nde, it o yu me wok yogola-net an-nen-e it ennggendumu lit unpuruk nurak nap lenak unpukmu-o. Nde, ap wene kulugwi buk nap-nen-e enpem mbud tenak woraiga-o. Alat nde, abog-e iri nggal-e kwaruwa bug-o. Mondok owak mbarusu-o. Wim nap-nen-e mondok sil kiyujwa bug-o. Wene lak, yamuksa irit woragun-o. An-net kat-nen wigarag-e wok kirimin-o.

^12-13 Kat nde kindi worak luk wat yosola-ge, komborak endam-et yapma kubukmu, kat kambararak misig-e nagawan tak ibimin-o. At iri-nen-e an nuwi wuruwa-o. Nde, at-nen tenagidnak wi-ge an-nen tugup lak tak pumu, at-nen tenagidnak wi irit wolma-o. Worala-ge, at-nen wigarak mbi-nen nagawan irit woralat at-nen tenagidnak wi-ge pempa tena irit wolma-o.

¹⁴ Nde, an-e at eid kwat yimin-o. Nde, ar-e an nambara kwat ma-o. At-nen nde lugud tak kwarosola-ge, ineidtak-nen enmbararak undugwi nggal-et wirimin-o.

¹⁵ Alat nde, an-nen: Irit kwat kibimin-o luk urul pusu ndak ndag-et konak kwat obosolat woramin-o. Kat nagawan men yonokluk an-nen Saul nagawan woraso sa-nen wud tak ibigi iri nggal-et kat kambara kwat ibimin pug-o.

¹⁶ Kat-nen wigarag-e pempa wolma-o. Nde, an-nen-e kat-nen tenagidnak wi-ge pem irit wolmakluk tena woramin-o. Tena worala-ge, kat-nen wigarag-e pem irit nagawan irit wolma-o’ yij-o luk yak turag-o” luk Natan yak tij-o.

¹⁷ Yosoloma, Natan-nen-e Nagawan Indo-nen Ndaut yak tuwakluk ebem pid ereba na ndindera Ndaut yak tij-o.

Ndaut-nen Mbal Pem Nagawan wiwa-o yak tosolat tepan yidnak wene 7:18-29

¹⁸ Yak tosoloma-ge, Ndaut na-ge Nagawan Indo uwi sum-nen wiridnak iri na me nggosolat koreluk-nen tepan yosolat-nen yosolar-e: ”Nagawan Indo Mondok Kek tak wa-e. An min an nama woragwi nap inmin-nen-e kat-nen konak nak kwat noboso mende ereba wanurag-e nit nggal-nen-e nggesa-nen wanurag-o?

¹⁹ Nagawan Indo Mondok Kek tak wa-e. Iri kwat nibigen-et nde, kat-nen urul posolar-e: ’Abok ereba woragolat-nen kat-nen wigarak-nen pempa nagawan wolma-o’ luk yigen iri perak terak minik nggok-nen yusu-o. Nagawan Indo Mondok Kek tak wa-e. An-e nggweyakma nab-et nde, mirik nibigen-o.

²⁰ Ndegel koboso nap an nowene-ge kar-e aba arem min ndindera karu me, an-nen-e no wene nde yak kirimin-o?

²¹ Kat kondomok kindi-nen: ’Irit kwareyeg-o’ peraruk, urul pigen pem-et ndegel koboso nap mul norosolar-e, kat-nen kwaroso mende kwiye worak ereba kwat nibigen-o.

²² Nagawan Indo Mbal Pem Nagawan wa-e. Kar-e ndemeret nggok lombok-nen yusu-o. Erep kat nggal mbi worasu bug-o. Mbal Pem Nagawan-e mondok kat karig-et nak-nen yusu-o luk iri wene-ge o nanduk ereba-net nenaru rak pidnak me, nir-e nenaru-o.

²³ Isarael nap nak perak nde kat-nen kondomok kilirak tak enpeyekluk anggun panggun tak unpugwi sa Mesira-nen wisirik inpigen iri nggal yi wi ndi wi oboksa ap enlem Isarael nap nggal mbi worali bug-o. Kat-nen kwat inpigen mende nggok ereba-nen ndowaga kat kanggu kobok yi wi ndi wi mburusu-o. Kat kilirak-nen ap enlem nin nap enpem kore yogola-ge, enpe min-et unkugwiwak min-et kat-nen maga wirik inpigen-o.

²⁴ Nde, Isarael nab-e pempa kat kondomok kilirak tak unpuruk, Nagawan Indo kar-e it Enmbal Pem Nagawan kwat yigen-o.

²⁵ Nagawan Indo Mbal Pem Nagawan wa-e. An min an-nen wigarak min nonowene-ge kat kemndam nggwe-nen urul pigen iri-ge pem irit wolmakluk kat-nen wat tak purak kindi kwat min-o. Kat-nen kwarurak urul pigen iri-ge mondok kwarurak kindi irit wolmag-o.

²⁶ Nin me nan me ap-nen kat kunu kek tak pogolat-nen yogolar-e: ’Nagawan Indo Amawi Worak iri-ge Isarael nap Enmbal Pem Nagawan iri nag-o’ luk yuwa-o. An-nen wigarak pem-nen ap misig-e Isarael nap enanggul pem nagawan men lug-e, tena unpuruk pem irit woralik nalik irit wolmag-o.

²⁷ Nagawan Indo Mondok Kamawi Worak Isarael nap Enmbal Pem Nagawan wa-e. Kat kondomok-nen yak norosolar-e: ’Kat-nen wigarak lolo ereba-nen-e misig-e an-nen Isarael nap ennggendumu nagawan tak pimin-o’ yigen iri bem-net an-e kwiye lag-et para tepan yu-ge yusu-o.

²⁸ Nagawan Indo Mondok Kek tak wa-e. Kar-e Mbal Pem Nagawan-net yusu-o. Kat-nen-e kat-nen urul pidnag-e ndak ndag-et kwaroso. Nde, konak wene irit kat-nen urul an yak nirigen-o.

²⁹ Iri bem-e pempa kat-nen unpud kaso iri na pem irit enaru yogolat wolmakluk, an-nen wigarak inmbiringgat tak unpurak mondok kindi-ge wat tak puruk wolmin-o luk kemengen mbarusu-o. Nagawan Indo Mondok Kek tak wa-e. Wene ereba oboksa kat-nen urul pigen pem-e an-nen wigarag-e pem irit kat-nen inmbiringgat tak onposolat wolmin-o” luk yij-o.