2 SEMUEL 6 - Nanduk Ngget Tul Pidnak Wene

Urul pidnak wene labu mbarak iri na Yerusalem pil mbiridnak wene 6:1-23

¹ Nde, misik tarem-e Ndaut-nen Isarael nap san wari ereba na pibi at eram ndok wuruwakluk wene mbo inpij-o. Nde, at eram ndok wiriga-ge enpe-ge tiga pulu ribu (30.000) irit ndok wiriga-o.

² Ndok wutlug-e, urul pidnak wene labu mbarak unu yarogolar-e, Nagawan Indo Mondok Amawi Worak aid nap ereya na bem koreyak woroso ondoro iri-ge o Mbaal-e Yewura nggweyak pem worasu iri na wil mbururak lit unpuruk mbirij-o.

³ Nde, urul pidnak wene labu mbarak iri na-ge Abinandap uwi ndobo bem iri na me worasoma mborogolar-e, waga nggweyak koma nggal ngget misik arem pil ngguruk waruk mborogolar-e, Abinandap ambararak mberen Usa min Akio min-e urul pidnak wene labu mbarak iri na waruk mborogola-ge, it mberen ereya-nen nduguluk mbiriga-o. Nde, mborogolar-e, Usa na-ge imin lembak lembak mborosola-t nde,

⁴ Akio iri na-ge nanduk abuwok nggwe mbirij-o.

⁵ Nde, Ndaut min Isarael nap oboksa min e urul pidnak wene labu mbarak iri na waruk mborogolar-e, enalen kwarat yogolat enne nggoksa ndawi bem-et kot kil Nagawan Indo kek tak pil pil mborogolar-e, ndawi yogolat-nen yugwi poba ereba na ene rak pogolat ndawi yil yil mbiriga-o.

⁶ Mborogolar-e, ap Nagon nggandum aboro mbilaroso sa iri na me wok yukmu-ge, sapi wam nggweyak koma nggal iri na lit kuruk mburusu iri na-ge ijok abis pijak yosola karug-e, urul pidnak wene labu mbarak iri na mbuwa naru, Usa na inggi-ge urul pidnak wene labu mbarak iri na tenabij-o.

⁷ Iri yosola-ge, Nagawan Indo Mbal Pem Nagawan isilepma-ge Usa ebem pij-o. Nde, iri-ge, Usa-nen kwarid iri-ge Nagawan Indo erengenma nggal tak posola karuk, isilepma ebem posolar-e, Usa na-ge urul pidnak wene labu mbarak iri na eram ereya na-net Nagawan Indo-nen abu wirij-o.

⁸ Iri yosola, iri na tarem-net iri na me unu yarogolar-e, Peres-Usa yariga-o. Nde, Usa wiridnak pem-e Ndaut-nen-e isilepma Nagawan Indo ibij-o.

⁹ Alat nde, Ndaut-nen Nagawan Indo aye kwarat karuk-nen yosolar-e: ”Urul pidnak wene labu mbarak yu-ge yawo-ge nggesa-nen waruk mbururag-o?” luk yij-o.

¹⁰ Iri lug-e, urul pidnak wene labu mbarak iri na-ge Yerusalem waruk mbururag-e isili yosolar-e, urul pidnak wene labu mbarak iri na-ge Nggat nap Obet-Erom iri na ama iri na me pij-o.

¹¹ Nde, urul pidnak wene labu mbarak iri na iri me woralar-e, waneya kenan iri woragij-o. Woralar-e, Nagawan Indo-nen-e ap Obet-Erom iri na-ge ogwela inmin imbiringgat tak onposolat woragij-o,

¹² Iri kwarosola, Ndaut nen kolosolar-e, Nagawan Indo-nen ap Obet-Erom min at arengge oboksa min imbiringgat tak ubusu wene iri na kulurug-e, mberarik, urul pidnak wene labu mbarak iri na-ge ap Obet-Erom iri na ama-nen waga Yerusalem pil mborogolar-e, enalin enalen pem-et nggok sagil sagil mbiriga-o.

¹³ Waruk mborogolar-e, ap urul pidnak wene labu mbarak waruk ereba na unuwok enam pem mbo bil lagola-ge, Ndaut-nen-e: ”Ndong mer-o” yak ondosoluk yarik, sapi kusi misik min sapi amarik omok worak tak pidnak min-e Nagawan Indo amanggim wosa kan pij-o.

¹⁴ Nde, Ndaut-nen-e Nagawan Indo kek tak posolat alin alen min-et kot kasolar-e, ar-e sum linen sum-nen yagidnak poro misig-et inggiri ketsa keya buruk, kot kil mborosolat woragij-o.

¹⁵ Iri nggal kwasa Ndaut min Isarael nap oboksa min-nen-e urul pidnak wene labu mbarak iri na-ge waga Yerusalem pil mborogolar-e, enalin enalen yogolat, kek kok pem-et posid poba ene min-et yil yil mbiriga-o.

¹⁶ Nde, urul pidnak wene labu mbarak iri na waruk mondok Yerusalem nggogolar-e, Ndaut na-ge Nagawan Indo kek tak posolat kot kasolat kud mboksa lalik mbilik kwarosola-ge, Saul ara Mikal-nen papalo tu nggwe yik karug-e, siyak yik kudtak isili yij-o.

¹⁷ Urul pidnak wene labu mbarak iri na-ge Ndaut-nen urul pidnak wene labu mbarak iri purak ondoro sum wi wiridnak iri na me-t pil nggwiga-o. Iri luk, Ndaut-nen-e wam wosa Nagawan Indo amanggim kan posolat, at imin kundurak pem wam wosa kan posolat irit kwarij-o.

¹⁸ Iri rak purug-e, Ndaut-nen-e Nagawan Indo Amawi Worak iri na unu bem Isarael nap oboksa imbiringgat tak unpuruk,

¹⁹ kwami-nen na irit, ap-nen na irit oboksa nunggwi mende tembet ondosolar-e, uno kan ngen pem wora mbarak min oroti mbarak min anggut engen lerak puruk-nen konidnak wora min wok indil lobok yij-o. Iri yamu-ge oboksa enmarak ndi yiga-o.

²⁰ Iri rak purug-e, Ndaut iri na-ge at woraso sa ogwela wa yak endeyekluk ama mbirij-o. Mborosoma-ge, Mikal iri na Ndaut eram wasolat-nen yosolar-e: ”Yawo-ge Isarael nap nagawan-e mondok kek yij-o. Ap inndi lak-nen kwarugwi nggal-et nagawan ndegel ubugwi nap-nen onnggo pidnak kwami ereba na inmbiri bem inggiri lag-et ngenwa woragij-o” luk yak tij-o.

²¹ Yosoloma, Ndaut-nen yosolar-e: ”Nagawan Indo-nen kat keid min owe owot min keya unpuruk, at ilirak Isarael nap lit unpuruk nuwakluk lenak nibid Nagawan Indo iri na abi wanosolat-net kot kagi-o. Iri bem-e, an-e Nagawan Indo irit abi wanosolat pem irit kot tenak woramin-o.

²² An-e yanem pesel nibigen ereba-ge mariger-et nde, kwarat pesel nuburak iri-ge ndak-nen yusu-o. Kat-nen kerengenma nggal tak nubusu-t nde, mumnggup manggim onnggo pidnak kweyap yanem kat-nen yigen ereba-nen-e kek tag-et nibili-o!” luk yak tij-o.

²³ Nde, Saul ara Mikal iri na-ge mondok pem irit la ndakit lak irit woragij-o.