2 SEMUEL 5 - Nanduk Ngget Tul Pidnak Wene

Ndaut-nen Isarael nap min Yewura nap min ennggendumu nagawan men yidnak wene 5:1-16

¹ Iri rak purug-e, Isarael nap ennggendumu enne kulugwi nap ereba na-ge Ndaut eram Eboron lobok yogolat-nen Ndaut yak togolar-e: ”Nir-e kat kemep minggirik-net yili-o.

² Nanduk-nen na irit, Saul-nen tena nunpuruk worala tarem-nen na irit, Isarael nap san ombo wim timbiril mborogola-ge, pempa kat-nen lit nunpuruk nosolat worasu iri nar-o. Iri-nen Nagawan Indo-nen kat yak korosolar-e: ’Kat-net an nilirak lit unpuruk nosolat, kar-et an nilirak ennggendumu nagawan men yugun-o’ luk yak kirid iri nar-o” luk yak tiga-o.

³ Yogoloma, Isarael nap ennggendumu enne kulugwi nap ereba Ndaut eram Eboron iri me lobok yogola-ge, Ndaut min it min-nen-e: ”Mondok kundig-et wulmul-o” luk, Nagawan Indo imbiri bem yak kerak mbiga-o. Iri lug-e Ndaut na-ge Isarael nap nagawan tak pogolat, anggul tenaiga-o.

⁴ Nde, Ndaut na-ge olengen tiga pulu (30) bem nagawan men luk, tena unpuruk woralar-e, olengen empat pulu (40) irit woragij-o.

⁵ Nde, Eboron-nen Yewura nap tena unpuruk woralar-e, olengen tuju setenga (7,5) woraruk, nde, Yerusalem-nen Isarael nap min Yewura nap min lambuksa tena unpuruk woralar-e, olengen-e tiga pulu tiga (33) irit woragij-o.

⁶ Nde, misik tarem-e Nagawan Ndaut na-ge at-nen idnak san ombo inmin-e Yerusalem nap inmin wim mbaruwokluk Yerusalem mbiriga-o. Nde, it o iri me woragwi Yebus nap iri-nen peragolar-e: ”Nde, Ndaut-nen-e Yerusalem worali nab-e urugwe nggwe rak nunpuwa bug-o” luk yebet kagolat-nen Ndaut yak togolar-e: ”Kat nggal-nen yu me nggumomtag-e meya-o. Ap enlengen ngguru min onowak yalanggok nugwi nap min net nde kar-e langgara wirik kubuwa-o” yak tiga-o.

^7-9 Yogoloma, Ndaut-nen at imin nugwi nap ereba na yak ondosolar-e: ”An-nen Yebus nap nisili rak unpuruk worasu yu nggal-e ap yu me-nen mbige Yebus nap kinsili rak unpuruk worali nap mbi worali, lak? Abu kinsili rak inpidnak me, mondok undugup, lak? Undurak nde ala-ge, yi uru bela pil mbiridnak nggwe nggugupndik, ya langgonak nugwi nap min enlengen ngguru min an-nen nisili rak unpusu ereba-ge mondok ender-o” yak indij-o. (Iri yidnak ala karuk, ap-nen yogolar-e: ”Ya langgonak nugwi nap min enlengen ngguru min-e Nagawan Indo ama-ge nggurak pug-o” luk yugwi-o.) Nde, Ndaut na-ge o kerep pak leget-nen wiridnak o Sion iri na-ge amawi bem-nen mengga wanuruk, unu yarosolar-e, ”Ndaut Uwi Siri-o” luk yarij-o. Nde, Ndaut nen o siri iri kerep pak leget ombol nggwe worosolar-e, mo luwaso ambigit (timur) nggwe nggweyak yala ndobo rak pidnak iri na bem-nen tel kworarik wiril mbirij-o.

¹⁰ Nagawan Indo Mbal Pem Nagawan Amawi Worak iri na-nen yongga worosola me, Ndaut na-ge amawi-t kondosolat woragij-o.

¹¹ Iri kwarosola-ge, Titus Nagawan Iram iri na-nen-e at-nen idnak nab-e Ndaut eram wirik inpij-o. Wirik onposolar-e, Ndaut woraso sa at wolmomtak o wururak pem e Libanon woraso min o wurugwi nap min kerep konugwi nap min-et wirik inpij-o.

¹² Iri bem-nen Ndaut-nen perasolar-e: ”Nagawan Indo-net an-e Isarael nap enanggul pem nagawan tugup lak tak nobosolat, an-nen tenagidnak wi-ge Nagawan Indo ilirak Isarael nap enmanggim amawi rak posolat kwarusu-o” luk yebet kagaij-o.

¹³ Nde, Ndaut na Eboron keya buruk, Yerusalem winde yosolar-e, ogwerak erep min-et wanosolat, ndegel unpugwi kweyap min-et wanosolat, iri kwarosolar-e, ambararak ararak erep min-et ndet inpij-o.

¹⁴ Nde, ambararak Yerusalem woralat-nen ndet inpij-e: Seyamua min Sobap min Natan min Salomo min

¹⁵ Yebat min Elisua min Nebek min Yapia min

¹⁶ Elisama min Elyara min Elipelet min irit ndet inpij-o.

Pilisin nap urugwe nggwe rak inpidnak wene 5:17-25

¹⁷ Nde, Pilisin nap-nen kuliganggal-e: ”Ndaut na-ge Isarael nap ennggendumu nagawan tak pikma worasu-o” yogola kulurug-e, Ndaut tenagurak lobok yiga-t nde, Ndaut-nen wene iri na kulurug-e, pak arem mbirij-o.

¹⁸ Nde, Pilisin nab-e Eperaim Mbirikmu mbirigarik, iri me winde yiga-o.

¹⁹ Nde, iri woragola-ge, Ndaut-nen Nagawan Indo kin wanosolar-e: ”An-e Pilisin nap iri-ge enpem-et kore yimin, lak? Iri yosola, kat-nen an-et ombol nggwe rak nubugun, lak?” yosoloma, Nagawan Indo-nen onggo yosolar-e: ”Enpem kore yi-o. An-nen kar-e ombol nggwe rak kibimin-o” luk yak tij-o.

²⁰ Yosoloma, Ndaut na-ge Mbaal-Perasim mberarik, Pilisin nap san ombo yeba na-ge urugwe nggwe rak inpij-o. Iri rak unpuruk, Ndaut-nen yosolar-e: ”Yi ebe wasolat egere lak tak pusu iri na nggal nuwim nap pak puruk woragwi iri na-ge lak tak pij-o” yidnak ala karuk, iri na me unu yarogolar-e, Mbaal-Perasim yariga-o.

²¹ Nde, Pilisin nap ereba na-ge kwiye-nen mborogolar-e, it-nen unkugwiwak ndak worak puruk erembel wanugwi ereba na-ge inndi yeberak lak keya buruk mbirikma, Ndaut min at imin nugwi nap min-nen waniga-o.

²² Ereya na-t mariget worarug-e, Pilisin nab-e lobok yogolat Erepaim Mbirikmu iri na me tuguruk winde yiga-o.

²³ Iri yogola-ge, Ndaut-nen-e Nagawan Indo-nen wene mirik ubuwakluk at eram nggi yij-o. Iri yosola, Nagawan Indo-nen onggo yosolar-e: ”It ondosolar-e, yu nggwe-nen-e enpem kore yurak pug-o. Onmbol nggwe mburugundik, onmbol nggwe e murubei worak ereba nggwe-nen enpem kore yurag-o.

²⁴ Kolosoma nde, e ereba usuwaret pem-nen nde ap mabunuruk mborogolat unuwok ene mbirip nggal nde kulurug-e, iri-ge kat kabuwog-et Pilisin nab-et urugwe nggwe rak onposolat-nen kwarimin me, iri kuluruk-net enpem kore yil mbururag-o” luk yij-o.

²⁵ Yosoloma, Ndaut na-ge Nagawan Indo-nen yak tid iri na-t kwarosolar-e, o Nggeba kuri-nen Nggeset kuri irit Pilisin nap ereba na-ge ondosolat maga wirik inpij-o.