2 SEMUEL 23 - Nanduk Ngget Tul Pidnak Wene

Mondok Ndaut-nen worok tak posolat wene nanu nggal yidnak wene 23:1-7

¹ Yakup Embal Pem Nagawan iri na-nen-e Isai ambara Ndaut na-ge lena nagawan mendak uburuk, ap nggok tak irit ibij-o. Iri rak ebamu at-nen Isarael nap enmanggim yi ndawi ndi ndawi ereba ngara mbarij-o. Ndaut-nen worok tak posolat wene nanu nggal yidnak wene-ge yu-o:

² Nagawan Indo Indi-nen an nemndam nggwe-nen wene yusu-o. At-nen yidnak wene-ge an nemnde bem worasu-o.

³ Yakup Embal Pem Nagawan-nen wene yij-o. Isarael nap inmiri yoso-nen an yak norosolar-e: ”Ap mot mot pem-et tena unpuruk worasu nagawan, lit unpuruk Mbal Pem Nagawan-nen yidnak yidnak kwaruwa nagawan iri-ge

⁴ o kibi bem-nen kuplila o kil posolat eyaya iri nggal-nen yusu-o. At iri-ge talme nuruk pok yosola, mo kere rak posolat tusuangge miri konak abinal nggorek tak pusu iri na nggal-nen yusu-o” yak nirij-o.

⁵ Iri nggal kwasa an-nen wigarag-e Mbal Pem Nagawan-nen-e inmbiringgat tak unpuwa-o. At-nen an nimin urul yak niridnak wene-ge nden kujwa bug-o. Yi wene ndi wene bem-e mondok ndak ndak nak kwaroso-o. An-nen ombol nggwe yigi-ge Mbal Pem Nagawan-nen kwara tena woralat, an nindi-nen ukwe pidnak ndak tak nobosolat wolma-o.

⁶ Alat nde, Nagawan Indo-nen yidnak kwatli buk nab-e isile worak mbo bidnak ininggi-nen tenakwi buk iri nggal-nen yusu-o.

⁷ Kagweyap ala na, posid tege ala na ininggem lak-nen-e ap misiger-o luk tet tena burag-e meya-o. Ap ereba-ge kanduk-nen nuruk lak tak unpuwa-o. 23:8–24:25 Engga yu worok tak posolar-e, Ndaut-nen idnak san wari kek tak unnu mbarak min Isarael nap min Yewura nap min wonat inpidnak wene min kugi nggok Isarael nap enpem mbosola-t nde, Ndaut-nen Nagawan Indo emengen mbarosola, Nagawan Indo-nen kugi iri na lak tak pid wene min irit mbarak worasu-o.