2 SEMUEL 19 - Nanduk Ngget Tul Pidnak Wene

Yoap-nen Ndaut-nen lugud tak kwaridnak imbiri paridnak wene 19:1-8a

¹ Ndaut nen Apsalom ubud-nen tabun puruk worasu iri na wene-ge Yoap yak tiga-o.

² Ndaut na-ge ambara ubud yip tusu iri na wene kologolar-e, ombol pem yidnak pem enalin enalen yurak iri na-t nde, ombol nggwe yiga iri na-ge san ombo oboksa-nen-e enpa lambosa nde labuk yil lobok yij-o.

³ Iri ala-ge, san ombo-nen wim silmu-nen kwiye mbiridnak pem innggiri-nen mburugwi nggal Ndaut-nen idnak san ombo ereba na-ge enpa lambosa enne lak lak tuguruk o silmu lobok yiga-o.

⁴ Nde, Nagawan Ndaut iri na-ge indi puru-nen sum erare lumurak puruk, yip nggwa tenak woralat-nen yosolar-e: ”Ije! Nambara-o! Nambara Apsalom-o! Nambara Apsalom-e lag-o!” luk yip tosolat woragij-o.

⁵ Nde, Yoap iri na Nagawan Ndaut eram mberarik-nen yak tosolar-e: ”Kat-nen idnak san ombo-net kat nde kambararak nde kararak nde kogwerak nde we inmin nene yoso kweyap nde oboksa kinmiri yiga-t nde, o yawo-ge kat-nen idnak san ombo-ge innggiri yaga enpem nggosa keya unpusu-o.

⁶ Nagawan kar-e kat insili rak kubugwi nab-e enabuwa kasolat, nde, kat kabuwa kagwi nab-e kisili rak onposolat kwarusu-o. Kat-nen idnak san ombo onowe min san ombo ereba oboksa min-e kat-nen-e ebe lak mende rak onposola, nam-et keyali-o. O yawo nde Apsalom nde uruk woralat, nit nde oboksa nendelep nggal-nen-e kar-e kalen nde yelep keyagi-o.

⁷ Nagawan kar-e ndak mburugundik kat-nen idnak san ombo ereba inndi yamuksa kondok tak inpi-o. Mondok Nagawan Indo owag-o. Nagawan kat nde mbutluk, kat-nen idnak san ombo ereba nde inmin wene mbarigit lak nde ala-ge, mondok ap misiger-o luk Nagawan kimin wolma bug-o. Yawo kubu yu-t ndibi ndi ma-o. Iri kwaruwa iri-ge kat kuruk worala lak tak unpurak mende kat kebem-e mboso-t nde, yawo yu bem-nen lak tak kuburak mende kebem mbuwa-ge mondok terak minik irit kebem mbuwa-o” luk yak tij-o.

^8a Iri yosoloma-ge, Nagawan Ndaut na-ge men luk mberarig-e, pak tu mende koroga iri me kore yij-o. Worala-ge, at imin nugwi nap-nen kuliganggal-e: ”Nagawan Ndaut na-ge o pak tu mende eralu worasu-o” yogola kulurug-e, at-nen idnak san ombo ereba na-ge at eram lobok yiga-o.

Ndaut iri na tuguruk Yerusalem mbiridnak wene 19:8b-18a

^8b Iri kwarogola-ge, Isarael nap san ombo ereba na-ge kwiye-nen enma lombok ndibi ndi yiga-o.

⁹ Iri yogolar-e, Isarael nap enlem oboksa ennggendumu neyak puk keyak puk mbiga-o. It-nen yak kerak mbogolar-e: ”Nagawan Ndaut-nen nir-e Pilisin nap ininggem-nen ninmiri yosolat, wim nap erep ininggem-nen na wisirik nonposolat kwarij-et nde, yawo Ndaut na-ge Apsalom aye-nen o yu keya buruk mberarik worasu-o.

¹⁰ Apsalom iri na-ge nit nennggendumu nagawan mendak pige-t nde, wim pem wiriga-o. Iri ala-ge noluk-nen ap misiger-o luk tet enmawi luk tuguruk Nagawan Ndaut iri na inggi waga pil lobok yili bug-o?” luk yiga-o.

¹¹ Nde, it-nen yidnak wene ereba na Ndaut-nen kulurug-e, Yewura nap ennggendumu enne kulugwi nap ereba na kin wok unpuwakluk tepan ombo Sandok min Abiyatat min yak ondosolar-e, yu nggal yak indij-o: ”Kit nanduk-net nagawan an-e ndegel nuburuk an woraso sa tuguruk nibil mbururag-et nde, noluk-nen kwatli bug-o?

¹² Kir-e an nambik nowe nowot mondok nimin panggarak-net nde, kar-e noluk-nen abok nggwe-nen nde an tuguruk nibil mbururak yili bug-o?” yak unduwakluk yak indij-o.

¹³ Yak unduruk, Ndaut-net Amasa yak tuwaklug-e, yu nggal yak indij-o: ”Kar-e an nimin-e nenpe misiget na-t nde, yawo kuri-nen kar-e Yoap ondolma an-nen idnak san ombo onowe mendak kibimin-o. Nde, an-nen nde iri kwat kibigit lak ala-ge, Mbal Pem Nagawan-nen nuruwag-o!” luk yak tuwakluk yak indij-o.

¹⁴ Iri nggal kwasa Ndaut-nen Yewura nap oboksa inndi wanosola-ge, it-nen-e nagawan min-et at-nen idnak eyabu wanugwi nap min-et lambuksa nagawan woraso sa Yerusalem lobok yuwakluk wene wosa Ndaut eram pil mbiriga-o.

¹⁵ Yogoloma, Ndaut na-ge mberarik Yi Yareren arem wok yosola-ge, Yewura nab-e at abuwok Nggilnggal wok yogolat, Yi Yareren mbarosola-ge, ndil laigarik, nduguluk yi mbara ndil waiga-o.

^16-17 Iri na tarem-et O Mbaurim woraso Mbenyamin nap Nggera ambara Simei iri na-ge Mbenyamin nap nak enpe seribu (1.000) inmin luk ndag-et ndag-et Ndaut abuwok lobok yiga-o. Iri nggal-et Saul ndegel oboso Siba na at ambararag-e lima belas min at ndegel ubugwi nab-e enpe dua pulu (20) min lit unpurug-e, Nagawan Ndaut iri na Yi Yareren arem wok yigit lak ma nandug-et wok yiga-o.

^18a Wok yogolar-e, nagawan ogwela ndegera inpil ndil wagolat, Ndaut-nen it-nen kwaruwakluk enpem pidnak ereba na kwarogolat irit kwariga-o.

Ndaut-nen Simei indingen tak pidnak wene 19:18b-23

^18b Nde, Nagawan Ndaut iri na yi mbatluk ndil layekluk yosoma ereya na-ge Simei na Nagawan Ndaut eralu erare nggwe tud luk-nen yosolar-e:

¹⁹ ”Nab-o. Nagawan wa-e. Kat Yerusalem keya buruk lobok yosola kwat kibigi iri na-ge mondok kindi yeberak worasolar-e: ’At yu-ge lugud tak kwaroso nab-o’ luk yebet neyasolat wolmomtak pug-o. An-nen kwarigi iri-ge mondok meme rak purag-o.

²⁰ An-e ndemeret meya-t kwarigi-o luk yebet kasu-o. Iri bem-e nit nenlem lombok abare abam (utara) nggwe worali ereba nennggendumu-nen-e an nandug-et kat kabuwok yawo lobok yigi-o” luk yak tij-o.

²¹ Iri yosola kulurug-e, Seruya ambara Abisai-nen yosolar-e: ”Simei yu-ge Nagawan Indo-nen lenak pidnak nagawan iri na imbiri lamut tak pidnak me, mondok wururag-o” luk yij-o.

²² Alat nde, Ndaut-nen Abisai min owe Yoap min yak ondosolar-e: ”Kir-e we kasa yeba lambinili na-ge meyog-o. Kir-e an anggun panggun tak nibili-o. Yawo-nen an-e Isarael nap enanggul pem min-et nagawan men yusu bem-e yawo tarem-e Isarael nab-e misiger-o luk tet mondok undurak pug-o” luk yak indij-o.

²³ Iri yosoluk Nagawan Ndaut-nen Simei imiri yosolat-nen owak mbarosolar-e: ”An-nen yak kurusu-o. Kat-nen kwarigen pem-e mondok kuruwa bug-o” luk yak tij-o.

Ndaut nen Mebiboset min-et indingen tak pidnak wene 19:24-30

²⁴ Nde, Mebiboset Saul ombo iri na Ndaut wok uburak lobok yij-o. Nde, at iri-ge mondok Ndaut Yerusalem keya bid kuri-nen at tuguruk urug-et wok yid kuri ereba woralar-e, ijok na maroso buk, ondoksu na mbaroso buk, usum na mondok maroso buk irit woragij-o.

²⁵ Mebiboset iri na Ndaut lobok yosola, wok uburak Yerusalem-nen lobok yosola-ge, Nagawan Ndaut-nen yak tosolar-e: ”Mebiboset wa-e. Noluk-nen iri tarem-e kar-e an nimin-e mbirigit lag-o?” luk yak tij-o.

²⁶ Yosoloma, at-nen onggo yosolar-e: ”Nagawan kek tak wa-e, Kar-e karu-o. An-e nowak meya iri nar-o. An-nen an ndegel noboso nap yak tosolar-e: ’An-nen ombol pem kore luk nagawan imbirik mbururak kelerai wam misik lud tak pi-o’ yigi-t nde, ar-e nombol pem lagaij-o.

²⁷ Iri yosolar-e, kat kimbiri bem an nobok nde pij-o. Alat nde, kar-e Nagawan Indo-nen idnak aid nap nggal me, kat-nen kwat nubugun nag-o.

²⁸ Nde, an neid owe owot oboksa-ge kat-nen mondok pendega lak tak nunpurag-e ndag-et nde, an-e kat-nen ’An nimin nunggwi mende-ge norag-o’ yigenma, kat woraso sa iri me-nen naso me, an-nen tebesa yi mende ndi mende kebem nggi yurag-e kwiye-o” luk yij-o.

²⁹ Yosoloma, Nagawan Ndaut-nen onggo yosolar-e: ”Kat-nen tuguruk wene yilik ndilik yurak pug-o. Saul arengge yi mende ndi mende-ge an-nen kat min Siba min wok kindimin-o luk abu mbarak pigi iri nar-o” luk yak tij-o.

³⁰ Yosoloma, Mebiboset-nen yosolar-e: ”Nagawan kar-e kurug-et lobok yigen pem nebem yamuk yusu irit nggog-o. Nde, yi mende ndi mende ereba-ge Siba nde wanuwag-o” luk yij-o.

Ndaut-nen Mbarasilai min-et indingen tak ibidnak wene 19:31-39

³¹ Nggileat nap Mbarasilai min-et Nagawan Ndaut nduguluk Yi Yareren mbatluk ndil lorak pem o Orogelim-nen lobok yij-o.

³² Nde, Mbarasilai iri-ge abu indi worak olengen delapan pulu (80) woraidnak irit woragij-o. Nde, at iri-ge mondok arengge kwarat me, nanduk Ndaut o Maganaim worala-ge, at-nen norak nunggwi mende-ge Mbarasilai-nen lid lud tak posolat woragij-o.

³³ Iri yidnak me, Nagawan Ndaut-nen at yak tosolar-e: ”Kar-e an nimin Yerusalem mburul-o. Kat-nen ukwe yugun mende-ge kamanggim lid lud tak pimin-o” luk yak tij-o.

³⁴ Alat nde, Mbarasilai-nen onggo yosolar-e: ”An nuruk wolmomtag-e poro yidnak me, no manggim an-e kat kimin Yerusalem mbirimin-o?

³⁵ An nuruk woralar-e, olengen delapan pulu (80) woragi-o. An nalen tak purak mende mbi worasu bug-o. An-nen nunggwi mende min yi min nasu-t nde, undu kasu bug-o. Ndawi yogola na yawo-ge kwara kulusu bug-o. An-e kat anggun panggun tak nak kibimin-o.

³⁶ Onggo iri nggal an nggal-nen wanurag-e meya-o. An-e Yi Yareren eyak ele bem we marig-et nak ndimirik kibil mbirimin-o.

³⁷ Kibil mbirimindik, keya nobosola-ge, nama mbirimindig-e wat yumu an neid niya yapma inpidnak entalu yapma nubuwa-o. Alat nde, an nambara Kimam yu perak nde, ’Nimin mbiri-o’ yak tugundik, at-nen kwat uburak pigen ereba-ge kwat uburak nag-o” yak tij-o.

³⁸ Yosoloma, Nagawan Ndaut-nen yosolar-e: ”Kimam yu-ge an waruk mbirimindik, kat kindi-n perasu mende irit kwat obosolat, kat-nen an nebem nggi yugun mende oboksa ndak ndag-et kwat kibimin-o” yak tij-o.

³⁹ Yak turug-e, Ndaut min at imin nugwi nap oboksa inmin-e Yi Yareren mbatluk ndil laiga-o. Ndil larug-e, Ndaut na-ge Mbarasilai iri na paluk tarik, wa yak tosolat imbiringgat tak obosola-ge, Mbarasilai iri na-ge ama mbirij-o.

Nagawan Ndaut wene lit lit Yewura nap min Isarael nap min yuk puk mbiga wene 19:40-43

⁴⁰ Yewura nap ap kere oboksa nde Isarael nap minggirik erep nde-nen-e Nagawan Ndaut na-ge nduguluk Yareren mbatluk ndil laiga-o. Ndil larug-e, Nagawan Ndaut na-ge nok Nggilnggal mbirij-o. Mborosola-ge, Kimam iri na-ge Ndaut imin mbirij-o.

⁴¹ Iri yamu-ge Isarael nap oboksa-nen Nagawan Ndaut eram lobok yogolat-nen yak togolar-e: ”Nit nennggamirak Yewura nap-nen yogolar-e: ’Ndaut ndegel uburuk ndil wagolat, at yik karok woragolat, at wok obogolat kwarurak iri-ge nit min nit nonowe nonowot min nak-nen kwarurag-o’ luk yili yu-ge noluk-nen-o?” yak tiga-o.

⁴² Yak togola karuk, Yewura nap-nen onggo yogolar-e: ”Ndemeret Nagawan yu-ge nit mende yu-t nde, noluk-nen kir-e kinsilepma yili-o? Nit-nen ukwe yidnak mende-ge Nagawan-nen wok nondosolat, we wok undugwi mende mbi siyak wok nondoso kali-a?” luk yak indiga-o.

⁴³ Yogoloma, Isarael nap-nen onggo yogolar-e: ”Nagawan iri-ge kit mende-t nde, nit-nen perak nagawan iri-ge nit-nen idnak nagawan-net yusu-o luk sepulu bem nggal nambena yurak iri-ge nit-nen yurak perak ndak-nen yusu-o. Noluk-nen kir-e nit nenambigir-e te rak ninpili-o? Nagawan tuguruk Yerusalem pil lobok yurak wene-ge nit nanduk-nen yige-o” luk yak indiga-o. Alat nde, Isarael nab-e iri yiga-t nde, it Yewura nab-et enne amawi lagolat, Isarael nap-nen yidnak wene-ge tara keya biga-o.