2 SEMUEL 18 - Nanduk Ngget Tul Pidnak Wene

Apsalom urugwe nggwe rak puruk, wiridnak wene 18:1-18

¹ Ndaut-nen-e at-nen idnak san ombo oboksa ndok worak unpuruk, lenak inpil lobok yosolar-e, ereb-e ap seribu seribu (1.000) inpil lobok luk, nde, ereb-e ap seratus seratus (100) inpil lobok lug-e, ap iri kwasa enarik tak lenak inpil lobok yid ereba na irit wosa ap ereb-e seribu enanggul pem mendak onposolat, nde, ereb-e ap seratus enanggul pem mendak onposolat kwaril lobok yij-o.

² Iri rak unpurug-e, ap kere kenan tak unpuruk, wim timbiril wirik inpij-o. Iri yamu ap kere kenan ereya na-ge Yoap min Yoap owot Abisai min Nggat nap Itai min-nen yidnak yidnak iri nak kwariga-o. Nde, Ndaut-nen at-nen idnak san ombo ereba na yak ondosolar-e: ”An min-et kinmin mbirimin-o” luk yak indij-o.

³ Alat nde, san ombo ereba na-nen onggo yogolar-e: ”Nagawan wa-e. Kar-e ninmin mbururak pug-o. Nit meya meya rak nonpogola, kwiye mborogolat ala na, nit erep na nondogolat ala na kwaruwa-t nde, wim nab-e enpem yamuk ma bug-o. Ir-e Nagawan kar-et kogore yili-o. Nagawan kar-e kebe misiger-et nde, nit nennggendumu ap sepulu ribu (10.000) ndak ndak-nen yusu-o. Iri ala-ge, kar-e o ma-t woralat, nit yongga nundurak nap nak nendam wirik onposolat wolmin-o” yak tiga-o.

⁴ Yogoloma, Ndaut-nen yosolar-e: ”Iri ala, ob-o. Kit-nen yugup nag-o” luk yak indij-o. Ndaut iri na-ge o siri pak tumende eralu mendak worasola, ap kere misik arem-e seribu (1.000) nggal, nde, kere misik arem-e seratus (100) nggal obo nesa keya buruk mabunuruk mbiriga-o.

⁵ Mborogola, Ndaut-nen Yoap min Abisai min Itai min wene watsa enpem posolar-e: ”An nebem ala, mondok Apsalom ap sujwe iri-ge mariget tet mep tak purak pug-o” luk yak ondosola-ge, ap kere oboksa ereba na-nen-e wene iri na-ge kuliga-o.

⁶ Yak ondosoloma-ge, Ndaut-nen idnak san ombo ereba na-nen-e Isarael nap san ombo ereba na enpem kore yurak mbirigarik, o Eperaim walma ereba-nen wim timbiriga-o.

⁷ Iri kwarogolar-e, Ndaut-nen idnak san ombo-nen Isarael nap san ombo-ge urugwe nggwe rak inpiga-o. Nde, urugwe nggwe rak inpiga iri-ge wene yurag-e mondok meya-o. Isarael nab-e iri tarem nak-net dua pulu ribu (20.000) indiga-o.

⁸ Nde, wim iri na-ge o iri me oboksa-nen wim waruk tabuk yij-o. Iri kwarogolar-e, ap wim silmu-nen indiga-ge marig-et nggal-et nde, walma-nen yat wat mbiga-ge mondok kwarar-o.

⁹ Nde, iri na tarem-et Apsalom iri na-ge kelerai iri na bem kore yosoma-ge, Ndaut-nen idnak san ombo mimo inmin lid pid mbij-o. Iri yosolar-e, kelerai iri na-ge e nggok teberak ereba na enggendumu nggwe mborosolar-e, Apsalom iri na anggul-e e ondogwalma ngonoksa tiong yosola, kelerai wam iri na-ge mboroso komo woragij-o.

¹⁰ Iri kwarosola-ge, Ndaut imin noso nap misik-nen karuk iri wene-ge Yoap yak tosolar-e: ”Yoap wa-e. Apsalom iri na-ge e nggok misik ondogwalma ngonoksa tiong yosola kagi-o” luk yak tij-o.

¹¹ Yosoloma, Yoap-nen onggo yosolar-e: ”Ndemeret ar-e kaigen-a? Noluk-nen kar-e ndag-et wirigit lak yigen-o? Wetlep nggal-nen-e perak tol sepulu min tani are misik min wok ketleb-o” luk yak tij-o.

¹² Alat nde, ap iri na-nen onggo yosolar-e: ”Perak tol seribu (1.000) wok netleb-et nde, an-e Nagawan ambara iri-ge mondok andi bandi rak ebelep pug-o. Nagawan Ndaut-nen kat min Abisai min Itai min yak kondosolar-e: ’An nebem ala, an nambara ap sujwe Apsalom iri-ge marig-et tet mep tak uburak pug-o’ luk yak kindid wene iri-ge nit oboksa kulige iri nar-o.

¹³ Nde, an-nen nde yanem Apsalom nde wetlep nggal-nen-e kwaridnak mende-ge Nagawan iri-ge yi wene ndi wene oboksa koloso me, Nagawan Ndaut-nen aru-t yeleb-o. Aru luk at-nen norosola-ge, kat-nen-e nimiri-ge yelep puk irir-o” luk yak tij-o.

¹⁴ Yosoloma, Yoap-nen yosolar-e: ”Kat kimin nak wene onggo onggo yik tenak mbot o ndamuk tak pusu-o” yak turuk yarig-e, tege kenan wanosolar-e, Apsalom iri na-ge e ondogwalma uruk ngonoksa tiong tak worasoma, imidwak arem pil nggwij-o.

¹⁵ Iri rak purug-e, Yoap imin nugwi nap enpe sepulu iri-ge Apsalom na lop lop worogolar-e, wiril mbiriga mbiriga wosa biga-o.

¹⁶ Iri rak purug-e, Yoap-nen-e at owosirak-nen Isarael nap muk iniyil mbitli iri na ndong makluk posid poba ene pu yij-o.

¹⁷ Iri rak purug-e, Apsalom worak iri na-ge waga walma mbunmu mberak purug-e mbun iri na-ge kerep-nen kobongsa ligik puruk keya biga-o. Nde, Isarael nap san ombo ereba na-ge kwiye-nen enariktak enma lombok ndibi ndi yiga-o.

¹⁸ Nde, Apsalom iri na uruk woralar-e, at unu ki rak purak kerep nggweyak pem-nen kona irit Nagawan Mbirik iri na me-nen wosa mendak pil lagaij-o. Ar-e at ondolma unu ki rak purak ambara lak ala karuk, at unu ki rak purak konid iri na unu-ge at ambik unu bem para irit yarij-o. Nde, o yawo-nen na iri na unu yogolar-e: ”Apsalom-nen unu ki rak purak wiril laidnag-o” luk irit yili-o.

Apsalom wiridnak obok Ndaut yak tidnak wene 18:19-33

¹⁹ Nde, Sandok ambara Agimas-nen Yoap yak tosolar-e: ”Nab-o. An-e Nagawan Ndaut eram mbirimindik Nagawan yak tosolar-e: ’An-e konak wene-t waruk lobok yusu-o. Nagawan Indo-nen kar-e wim nap ininggem-nen kimiri yij-o’ luk yak teyek-nen an ndaget mbururag-e op, lak?” luk yak tij-o.

²⁰ Yosoloma, Yoap-nen yosolar-e: ”Meyog-o! Yawo ge Nagawan ambara-t wiridnak me, yawo-ge waruk mbururak pug-o. Abok-nen perak waruk mbururag-o” luk yak tij-o.

²¹ Iri luk, Yoap-nen-e at nen idnak mumnggup manggi Sundan nap iri na yak tosolar-e: ”Kat kerengen-nen kaigen yeba wene-ge Nagawan Ndaut yak til mbiri-o” yak tosoloma-ge, at ndegel oboso nap iri na-ge Yoap kek tak obosolat eram tud yosolug-e, pong kil mbirij-o.

²² Alat nde, Agimas-nen Yoap iri na emengen kiri keresa mbarosolar-e: ”Kwat ma mende oboksa wene waruk mbururak pem-e ’Wene waruk mbiri-o’ lut an min-et yak nururag-o” luk yij-o. Yosoloma, Yoap-nen yosolar-e: ”Noluk-nen kar-e kat min-et mbururak kamawi kundusu-o? Nambara-o. Iri kwarugun pem-e onggo wanugun-e lag-o” luk yak tij-o.

²³ Yosoloma, Agimas-nen yosolar-e: ”Noluk-nen-o? An-et mbirimin-o” luk watsa yij-o. Yosoloma-ge, Yoap-nen yosolar-e: ”Iri ala-ge, mbiri-o” yosoloma-ge, Agimas na-ge pong karuk, tula nin Yareren mbirik iri na nggwe mberarik, Sundan nap iri na-ge abok tak puruk, at nanduk mbirij-o.

²⁴ Mbiridnggal-e, Nagawan Ndaut na-ge o siri pak iri arem nggwe wok amberam nggwe wok iri na me koreyak woragij-o. Nde, tu yik karok woraso nab-e pak tu mende iri na anggul pem mbirik yamuk tak iri na me lagarik, mendak worasolat-nen yik kagaidnggal-e, ap misik pong kil lobok yosola yik kagaij-o.

²⁵ Ap tu yik karok woraso iri na-nen Ndaut eram wene pil mbosolar-e: ”Ap mbi lobok yusu-o” yosoloma, Ndaut-nen yosolar-e: ”Ap misik arig-et nde lobok yosola-ge, iri-ge konak wene waruk lobok yosolar-o” luk yij-o. Nde, ap nanduk lobok yid iri na panggosa nggal lobok yosola tarem-e

²⁶ tu yik karok woraso nap iri na-nen tuguruk yik kagaidnggal-e ap misik min-et imbirik pong kil lobok yosola kagaij-o. Yik karuk tuguruk ene pil mbosolar-e: ”Ap misik min-et arig-et pong kil lobok yusu-o” luk yij-o. Yosoloma, Nagawan Ndaut-nen yosolar-e: ”At iri na konak wene-t waruk lobok yusu nde ma-o” luk yij-o.

²⁷ Tu erengen woraso nap iri na-nen yosolar-e: ”Nab-o. An-e naru-o. Ap nanduk lobok yusu iri-ge Agimas-nen pong kil lobok yoso nggal-et kasu-o” luk yij-o. Yosoloma, Ndaut-nen yosolar-e: ”At iri-ge konak nab-er-o. Konak wene-t waruk lobok yusu-o” luk yij-o.

²⁸ Nde, Agimas-nen-e erepma ereba-nen ene nggoksa Nagawan Ndaut iri na wa yak til lobok luk-nen erare nggwe tud luk-nen yosolar-e: ”Kat kondolma nggurak puruk kebem mbud yili nap kegera kat kinggem pid Nagawan Indo Kembal Pem Nagawan nak kek tak uburag-o!” luk yak tij-o.

²⁹ Yosoloma, Ndaut-nen kin wanosolar-e: ”Ap sujwe Apsalom iri na-ge uruk worasu, lak?” luk yak tij-o. Yosoloma, Agimas-nen onggo yosolar-e: ”Nagawan wa-e. Yanem an Yoap-nen nibil lobok yosola-ge, enne kwarat sa nggwa mbogola kuligi-o. Alat nde, iri-ge no kwariga-o? Iri-ge an-e naru bug-o” luk yij-o.

³⁰ Iri yosola-ge, Nagawan Ndaut nen yosolar-e: ”Iri me men yil mbiri-o” yak tosoloma-ge, Agimas na-ge iri na me men yil mbirij-o.

³¹ Worakmu-ge Yoap ndegel oboso nap iri na lobok yarik, Nagawan Ndaut yak tosolar-e: ”Ndegel koboso nap an-e konak wene-t kamanggim waruk lobok yusu-o. O yawo-ge kat kondolma nggurak puruk kebem mbud yili nab-e Nagawan Indo-nen urugwe nggwe rak unpuruk, ombol nggwe rak kibij-o” luk yak tij-o.

³² Yosoloma, Nagawan Ndaut-nen kin wanosolar-e: ”Nde, ap sujwe Apsalom iri na-ge uruk worasu, lak?” luk yij-o. Yosoloma, ap iri na-nen yosolar-e: ”Nagawan kuwim nap min kat kondolma nggurak puruk kebem mbud yili nap oboksa min-e ap sujwe iri na ebem mbid nggal-et enpem mbumag-o” luk yij-o.

³³ Yosoloma, Nagawan Ndaut iri na-ge wene iri na kulurug-e, indi abi kalok luk pak tu mende anggul pem o kuri worak iri na me yip til til lasolat-nen yosolar-e: ”Ije! Nambara! Nambara Apsalom-e lag-o! Nambara Apsalom-o! Kat kondolma-ge an nde wat yeleb-e konag-o. Nambara Apsalom-o!” luk yip til til lagaij-o.