2 SEMUEL 17 - Nanduk Ngget Tul Pidnak Wene

Agitopel-nen kwarurak yidnak wene ereba na Usai-nen lak tak pidnak wene 17:1-14

¹ Iri kwatluk ereya na-t Agitopel-nen Apsalom yak tosolar-e: ”Yanem-et kubu yu-t ap duabelas ribu (12.000) len unpuruk Ndaut muk kil kubu mbirimin yu-ge nunggwirig-o?

² At iri-ge ndeyak luk amawi lak marik worasoma, ebem kore yimin-o. Iri yosola, wendet luk at imin nugwi nap oboksa-ge engga kerengga ndibi ndi ma-o. Iri yogola, Nagawan Ndaut nak wirimin-o.

³ Alat nde imin nugwi nab-e kweyap ndugum un wok purak eram pil mburugwi nggal kat keram inpil lobok yimin-o. Nde, nap kat-nen-e ap misiget nak wururak yusu nar-o. Ap ereb-e indigit lak keya unpurak yusu nar-o” luk yak tij-o.

⁴ Yosoloma-ge, Apsalom min Isarael nap ennggendumu enne kulugwi nap oboksa-nen-e: ”Ob-et yij-o” luk peraiga-o.

⁵ Peraiga-t nde, Apsalom-nen yosolar-e: ”At indi-nen perasu wene na yak nunduwak-nen Usai wene mbo bil mberer-o” yak indij-o.

⁶ Iri yamu Usai iri na it endam lobok yosola, Apsalom-nen Agitopel-nen yidnak wene iri na yak turuk-nen yosolar-e: ”Wene iri-ge nir-e kwarul, lak? Lak nde ala-ge, kat-nen kindi perasu yak nindi-o” luk yak tij-o.

⁷ Yosoloma, Usai-nen onggo yosolar-e: ”Agitopel-nen yawo yid iri-ge meya-t yij-o.

⁸ Nagawan kek tak wa-e. Kar-e mondok karu-o. Ndaut min at imin nugwi nap inmin iri-ge san wari mondok kwiye lak enmawi worak iri nar-o. It iri-ge isilepma worak mberuang ija-nen amarik lak yosoma-nen kwaroso nggal insilepma worak iri nar-o. Nde, Ndaut iri na-ge mondok wim wari wim nggoso aru nap me, at owosirak inmin-e mondok nene yoso buk, arik nak mboksa nene yoso nar-o.

⁹ Erep-nen-e yanem na ar-e kerep yanggoma, lak? Are, mbi me ereba arik nde kurak tak worasu nde ma-o. Kat-nen idnak san ombo nde wirik unpugundik pem-nen nde, Ndaut-nen nde unduwama-ge, ap-nen kologola-t nde: ’Apsalom-nen idnak san ombo-ge indij-o’ yidnak wene nde kologolar-e, ’Apsalom-nen idnak san ombo-ge abu urugwe nggwe rak inpij-o’ luk yuwa-o.

¹⁰ Kat keid iri-ge mondok wim wari iri nar-o. Nde, at-nen idnak san ombo na wim wari mondok kwiye kagwi buk iri nar-o. Iri kwarugwi iri-ge Isarael nap oboksa-nen enaru me, iri wene kulurug-e, ap kwiye lak enmawi worak singa ndakngge nggal-et nde, ndemeret kwiye-t yuwa-o.

¹¹ Iri bem-e an-nen perasu-ge yu nggal-o: Isarael nap oboksa enma lombok woragwi oboksa yi sisiri nggal ndok wat unpuruk, kat-net anggul tak unpuruk wim timbiril mbururag-o.

¹² Iri kwasa mburukmu nde nin me ereba Ndaut nde karug-e, mimo ebem yeberak lak ma ebem mbud yogola-ge, ir-e no kwaruwa-o? Iri-ge misiger-o luk mbi mondok mburuwa bug-o. Ndaut na irit, at-nen idnak san ombo na irit mondok oboksa undul-o.

¹³ Nde, Ndaut nde o siri misik me nggosola-ge, nit Isarael nap oboksa-nen kere wanulndik o siri iri-ge kere bem keya buruk, o siri iri koroga mbirik ereba me mberak purug-e, iri rak pulmu, kerep misiger-o luk tet ndobo iri bem-e woragit lak mag-o” luk yij-o.

¹⁴ Wene iri na kulurug-e, Apsalom min Isarael nap oboksa min nen yogolar-e: ”Yawo Usai-nen yid wene iri perak konag-o. Nde, Agitopel-nen yij-e meya nggal-o” luk yiga-o. Nde iri yiga iri-ge Nagawan Indo-nen Agitopel-nen wene konak nak ngarusu iri na ebe lak tak puruk, lak tak unpurak mende Apsalom ebem mbuwakluk-nen kwarij-o.

Ndaut ondomok-nen agap ndagid wene 17:15-29

¹⁵ Iri yosoluk Usai-nen-e Agitopel min at min-nen Apsalom min Isarael nap ennggendumu enne kulugwi nap ereba na min yak indidnak wene-ge tepan ombo Sandok min Abiyatat min yak indij-o.

¹⁶ Yak ondosolat-nen Usai-nen yosolar-e: ”Ndag-et nak Ndaut yak turag-o. Nembaga ereba me yi mbarugwi sa ereba na me-ge nene yurak pug-o. Are, mondok Yi Yareren mbara ndil lujwag-o. Lak nde ala-ge, at min at-nen idnak san ombo inmin-e mondok lak tak unpuwa-o” luk wene wosa pij-o.

¹⁷ Iri kwarogola-ge, Abiyatat ambara Yonatan min Sandok ambara Agimas min ereya na-ge Yerusalem inggi nggwe yi Enorogel urusu iri na me nak towarak woraiga-o. O silmu nggurag-e ap-nen iniyujwa naru Yerusalem inggi nggwe iri me nak woraiga-o. Woragola-ge, kwe mumnggup manggim iri nak-nen wene Ndaut yak turak wene-ge waruk yak indil lobok yosolat woragij-o.

¹⁸ Alat nde misik tarem-e liap misik-nen eneyaruk, Apsalom yak tidnak me, it na-ge ndag-et nak kwiye mbirigarik, o Mbaurim woraso nap misik ama kurak yil mbiriga-o. Nde, o iri na eralu-ge yi kenanggugwi nggweyak emnde mbaridnak mbi worala me, it mberen iri na-ge iri na me kurak yil nggwiga-o.

¹⁹ Nde, ap o iri ombo iri na ogwe-nen-e yi mbun emnde iri na-ge sum abak misik-nen muruksa langgwirik purug-e, nggandum mbato-ge ebem liring kaga keya bij-o. Iri rak pamu-ge yi mbun emnde mbarak iri na-ge lak nggal irit woragij-o.

²⁰ Iri rak enpamu woragola-ge, Apsalom-nen onkore inpil lobok yidnak nab-e o iri na me lobok yogolar-e, kwe iri na kin wok obogolat-nen yogolar-e: ”Agimas min Yonatan min-e ngge me worali-o?” yogola, at-nen yosolar-e: ”Yanem-et yi eyak ele bem ndil likma-o” luk yak indij-o. Yosoloma-ge, ap sujwe mberen ereya na onkore yiga-t nde, eneyagit lag o. Iri ala karuk, tuguruk Yerusalem mbiriga-o.

²¹ Mborogola-ge, Agimas min Yonatan min ereya na-ge yi emnde mbarak arem-nen wurungsa wagolar-e, ndag-et nak mbirigarik wene ereba na-ge oboksa Nagawan Ndaut yak tiga-o. Yak togolat-nen yogolar-e: ”Agitopel-nen-e kat kururak wene wirik pidnak me, mondok yanem-et yi mbara ele bem ndil lorag-o” yak tiga-o.

²² Yak togolikma Ndaut na-ge at imin nugwi nap inmin-e Yi Yareren mbara ndil laigarik, eyak ele bem wok yukmu-ge o kil pij-o.

²³ Nde, Agitopel na-nen yik kagaidnggal-e, at-nen yidnak wene-ge mondok nggarugwi buk ala karug-e, kelerai wam ombolwak pem kore yogolat-nen puruk kore yugwi ondoro iri na kelerai wam ombol pem puruk ebem kore luk, at ambik ama mberarig-e, at-nen kwarurak mururak ereba na ndegera kwatlug-e, ambikpebe urusuwak ngonoksa tiong yamu, at owe owot yapma unpugwi sa iri na me yapma ibiga-o.

²⁴ Nde, Apsalom-nen ap lit karuk na-ge Yi Yareren mbarogola-ge, Ndaut na-ge o siri Maganaim iri me wok yij o.

²⁵ (Nde, Apsalom-nen-e Yoap ondolma Amasa iri na-ge san ombo onowe irit mendak pij-o. Nde, Amasa iri-ge Ismael nap Yitera iri na ambara-o. Nde, ija unu-ge Abigail. Nde, Abigail iri-ge ap Nagas ara-o. Nde, Abigail iri-ge Seruya iri na ineid iniya misiget-nen nderag-o.)

²⁶ Nde, Apsalom-nen lit karuk imin nugwi nap inmin-e o Nggileat nggweyak pem ereba me o sare lit kaiga-o.

²⁷ Nde, Ndaut iri na Maganaim wok yosola-ge, Amon wi iri me o siri Araba nap Nagas ambara Sopi min Londebat nap Amiel ambara Magit min O Nggileat-nen o siri Orogelim nap Mbarasilai min-nen-e Ndaut iri na inmin tak piga-o.

^28-29 It-nen wok indil lobok yogolar-e, yi kenangga nunggwi min kuali min yemara ebem nene yugwi min nggandum mbato min jelai mbato min nggandum mbato amburu bem woraidnak min kuma mimi min kuma mimi nggok min tamuk amburu min mentega nggal keju min sapi agamo amburu min lomba erep min irit Ndaut min at imin nugwi nap min nembaga ereba nogolat enmawi lak yidnak ala karuk, wok indil lobok yiga-o.