2 SEMUEL 16 - Nanduk Ngget Tul Pidnak Wene

Siba-nen Ndaut kwat ibidnak wene 16:1-4

¹ Nde, Ndaut na mborosolat nggeret ndobo kaluruk mbosoma-ge, Mebiboset ndegel oboso nap Siba iri na-ge lobok yosolar-e, oroti worag-e dua ratus (200), nde, anggut engen ut lerag-e seratus (100), nde, engen kerengen ut kamarag-e seratus (100), nde, anggut engen amburu kenanggo-ge embe misik ereba oboksa kelerai wam mberen ombolwak pem puruk, Ndaut eram lobok yij-o.

² Iri kwasa waruk lobok yosola karuk, Nagawan Ndaut-nen yak tosolar-e: ”Yeba-ge ngge rak purak waruk lobok yusu-o?” yosoloma, Siba-nen yosolar-e: ”Kelerai mberen ya-ge kat kogwela inmin-nen ebem koreluk mborobokluk waruk lobok yigi-o. Nde, oroti min engen kerengen yeba-ge kat ndegel kubugwi nap enmanggim-o. Nde, anggut engen amburu yu-ge it nembaga ereba me nogolat enpabok lak ala norag-o” luk yak tij-o.

³ Yosoloma, Ndaut-nen kin wok obosolar-e: ”Kat-nen ndegel oboso nap Saul ombo Mebiboset iri na-ge ngge me worasu-o?” yosoloma, Siba-nen yosolar-e: ”At indi-nen yebet kasolar-e, at ombo Saul-nen nagawan woraso iri na-ge ’Isarael nap-nen yawo an ninggem puwa-o’ luk ar-e Yerusalem-et worasu-o” luk yak tij-o.

⁴ Yosoloma, Ndaut-nen Siba yak tosolar-e: ”Yawo kuri-nen tel korosolar-e, yi mende ndi mende Mebiboset arengge-ge kat karengge kwat ma-o” luk yak tij-o. Yak tosoloma-ge, Siba-nen yosolar-e: ”Nap wiwa-o. Nagawan kat-nen-e pempa kindingen tak nobosolat wolmomtag-o” yak tij-o.

Simei-nen Ndaut kwat ibidnak wene 16:5-14

⁵ Nde, Ndaut iri na o Mbaurim wok yosola-ge, o iri me woraso nap misig-e Nagawan Ndaut-nen ap anggul tak puruk lobok yusu iri na endam panggosa lobok yosolar-e, Ndaut iri na imbiri lamut tak ibil ibil lobok yij-o. Nde, ap iri unu-ge Simei, ap Nggera ambara-o. Ap iri-ge Saul owe owor-er-o.

⁶ Ndaut-nen idnak san ombo onowe ereba na min san ombo erep ereba na min-nen-e Ndaut na wuruwa naru lumurak obogola-t nde, ap Simei-nen-e Ndaut min at eyabu wanugwi nap inmin-e kerep pem indij-o.

⁷ Simei-nen Ndaut imbiri lamut tak obosolat-nen yosolar-e: ”Kar-e mbiri-o! Ap woroso nap, mondok meya kwaroso nap kar-e mondok mbiri-o!

⁸ Kar-e Saul-nen nagawan woraso iri na-ge mengga wanigen-o. Kar-e Saul owe owot min ilirak min kwarat indigen pem-e Nagawan Indo-nen-e onggo angin worak kebem mberak pusu irir-o. Iri kwarosolar-e, Nagawan Indo-nen-e kat-nen nagawan woraso iri na-ge kambara Apsalom wok tid irir-o. Yawo-ge ap woroso kar-e lak min-o” yak tij-o.

⁹ Yosoloma, Seruya ambara Yoap owot Abisai-nen Ndaut yak tosolar-e: ”Kar-e noluk-nen ap nari wari rak onposo yu-ge imbiri lamut tak kobosola keya ubusu-o? Urusu mbareyek-nen wiri-o luk yak niri-o” yak tij-o.

¹⁰ Alat nde, Nagawan Ndaut-nen Abisai owe Yoap min yak ondosolar-e: ”We yik nak karuk larok yer-o. Nagawan Indo-nen yak tidnak pem-nen nde imbiri lamut tak nobosola-ge, kat ta-nen: ’Kat iri kwarusu-ge meyog-o’ luk yurag-e ndag-a? Mondok meya-o” yak indij-o.

¹¹ Iri luk, Ndaut-nen tuguruk Abisai min at eyabu wanugwi nap oboksa min yak ondosolar-e: ”An nondomok niyema-nen pigi yu-nen perak an nururak yusu-o. Iri bem-e kir-e Mbenyamin nap yu-nen kwarusu iri karuk noluk-nen kinndi pok yili-o? Nagawan Indo-net an neresa ’Imbiri lamut tak ibi-o’ yamu-nen imbiri lamut tak nubusu-o. Iri bem-e imbiri lamut tak nubuwag-o. Kit-nen at imin-e yi kwatlik ndi kwatlik kwarurak pug-o.

¹² Erep-nen-e Nagawan Indo-nen an-nen andi bandi kasu yu neyaruk, imbiri lamut tak nubusu onggo imbiringgat tak nubuwa nde ma-o” luk yak indij-o.

¹³ Yak undurug-e, Ndaut min at imin mburugwi nap min iri na mborogola-ge, Simei na-ge inmbirik it na mbogola-ge, muk muk iniyil mbosolar-e, inmbiri lamut tak onposolat, kerep puk pak indil mbirij-o.

¹⁴ Iri yosola mborogolar-e, Ndaut min at imin nugwi nap oboksa min-e pabok pabok mbirigarik, enpabok lak sa Yi Yareren eyak pem wok yogolat enpabok kwariga-o.

Apsalom Yerusalem woralat-nen kwarid wene 16:15-23

¹⁵ Ereba kwarogola-ge, Apsalom min Isarael nap at imin nugwi nap oboksa inmin-e Yerusalem nggogola-ge, Agitopel iri na-ge inmin-et nggwij-o.

¹⁶ Nggogola-ge, Ndaut anggam mondok tugup lak Usai iri na-ge Apsalom imin lambuk yogolat Usai-nen yosolar-e: ”Nagawan-e kar-er-o! Nagawan-e kar-er-o!” luk ene nggoksa yij-o.

¹⁷ Alat nde, Apsalom-nen at kin wok obosolar-e: ”Kat kanggam Ndaut tugup lak imin worasu na-ge ngge me worasu-o? Noluk-nen kar-e imin mbirigit lag-o?” luk yak tij-o.

¹⁸ Yosoloma, Usai-nen onggo yosolar-e: ”An at imin mbururag-e ndag-a? An-e Nagawan Indo-nen na irit ap yeba-nen na irit Isarael nap oboksa-nen na irit len ibidnak nap iri nak an-e imin nimin-o.

¹⁹ Iri-nen an-e ta ndegel ibimin-o? An-e at ambara irit ndegel ibimin-o. Nanduk keid ndegel oboso iri na nggal-et yawo-ge ambara kat ndegel kibimin-o” luk yak tij-o.

²⁰ Iri yosoloma, Apsalom-nen Agitopel yak tosolar-e: ”Nit-nen kwarurak wene mbi yi-o” yak tij-o.

²¹ Yosoloma, Agitopel-nen onggo yosolar-e: ”Kat keid-nen-e at imin sirid nap nggal-e yik kiyujwakluk kar-e keid woraso sa mburugundik, keid-nen inmin nene yoso kweyap at woraso sa yik karok wolmakluk keya inpid kweyap ereba inmin nene yosolat wolmin-o. Iri kwarosola-ge, Isarael nap oboksa-nen-e enmawi kondogola kagun-o” luk yak tij-o.

²² Iri yosoloma-ge, o lije sum uwi Ndaut woraso sa o ngguwa mbirik yamuktak iri na me o lije wat tiga-o. Wat togolikma-ge, Apsalom na-ge ap oboksa enlengen pem-et eid-nen inmin nene yoso kweyap ereya na-ge inmin nene yosolat woragij-o.

²³ Nde, ereya tarem-e Agitopel-nen yidnak wene oboksa-ge Ndaut-nen na irit Apsalom-nen na irit Mbal Pem Nagawan-nen yosola nggal kologoluk kwarogolat woraiga-o.