2 SEMUEL 15 - Nanduk Ngget Tul Pidnak Wene

Apsalom-nen eid iri na ebem mbud yurak indi mbelak puruk woragid wene 15:1-12

¹ Iri kwatluk ombol nggwe-ge Apsalom-nen-e nggweyak koma misik min lit kuruk mbururak kura min ondomok amanggim lid lud tak pij-o. Iri yosolar-e, at imin nurak nap lima pulu (50) min-et lenak inpij-o.

² Iri rak puruk woralar-e, Apsalom na-ge mondok kubu kabu men yosolar-e, pempa Nagawan woraso sa nggugwi sa pak tu ndanggi eralu mendak woragij-o. Woralar-e, ap oboksa-nen wene worala wene konurak Ndaut eram lobok yogola-ge, Apsalom-nen wene mbo unpuruk, kin wok onposolar-e: ”Kar-e no nab-o?” luk enlem kin wanosolat irit woragij-o. Iri yosola-ge, it-nen-e: ”Nir-e nenlem iri nab-o” luk yak togolat irit woraiga-o.

³ Iri yak togola-ge, Apsalom-nen yosolar-e: ”Kat-nen waruk lobok yusu wene iri-ge ndemeret konag-et nde, meya-ge kat kene kwara kulurak nap Nagawan indipma nap lak iri nak meya-o” luk yak tij-o.

⁴ Iri luk, Apsalom-nen tuguruk yosolar-e: ”An nde ap enpem wene mbenaroso, nap kwat yeleptiknggal-nen-e ap ondomoktak-nen wene worala na, are, yuk puk mbidnak wene waruk lobok yogola na irit, it-nen waruk lobok yogola-ge, an-nen-e wene-ge mondok mot mor-et enpem wene kona lak tak peleb-o” yak ondosolat woragij-o.

⁵ Iri yak ondosola, ap nde Apsalom kek tak obogolat entare nggwe tud yuwokluk eram lobok yogola-ge, Apsalom-nen-e ap iri na paluk unduruk enlabengen porok tosolat wa yak ondosolat woragij-o.

⁶ Nde, ap Isarael nap-nen wene worala konurak Nagawan Ndaut eram lobok yogola-ge, Apsalom-nen-e it oboksa iri nggal kwat onposolar-e, inndi wanosolat woragij-o.

⁷ Iri kwarosolat olengen empat worarug-e, Apsalom-nen Nagawan Ndaut yak tosolar-e: ”An-e an-nen Nagawan Indo yak tosolar-e: ’Irit kwarimin-o’ luk urul pigi ereba na ndak ndag-et kwareyek-nen Eboron mbururag-e nunggwirig-o?

⁸ Nde, an o Siria nggweyak pem o Nggesut woralar-e, an-nen Nagawan Indo imin urul posolar-e: ’Kat-nen nde an tuguruk Yerusalem nibil mborosola-ge, kat kerembel wanurak Eboron mbirimin-o’ luk urul pidnak me, mbirimin-o” luk yak tij-o.

⁹ Yosoloma, Nagawan Ndaut-nen-e: ”Ob-er-o. Konag-et mbiri-o” yak tij-o. Yosoloma-ge, Apsalom iri na-ge Eboron mbirij-o.

¹⁰ Alat nde, at mbirigit lak awo woralat ereya na-ge at-nen-e Isarael nap woragwi sa oboksa wene yu waruk wirik inpij-o: ”Kit-nen kolak worakmu nde, posid poba ene pu nde kulurug-e, kit-nen kenne nggoksa yogolar-e: ’Apsalom na-ge Eboron iri me Nagawan men yij-o’ luk kum wirik purag-o” luk yak indij-o.

¹¹ Iri luk Apsalom iri na mborosola-ge, ab-e Yerusalem-nen dua ratus (200) irit Apsalom imin Eboron mbiriga iri-ge wene mbatluk mbitli iri na enabut na mbarigit lak, enaru buk irit mbiriga-o.

¹² Mbirigarig-e, Apsalom-nen Nagawan Indo amanggim wam wosa kan posolar-e, ap Agitopel Nagawan Ndaut indi eyak woroso iri na eram inggi wil o Nggilo wirik inpij-o. Iri nggal kwarogolar-e, Nagawan Ndaut ebem mbud yurak pem Apsalom-nen kwarusu iri na ambigir-e enpe kwarat Apsalom imbirik mborogolat enmawi irit yiga-o.

Ndaut iri na Yerusalem-nen kwiye mbiridnak wene 15:13-37

¹³ Nde, misik tarem-e ap wene waruk noso misik-nen Ndaut yak tosolar-e: ”Isarael nab-e oboksa Apsalom ambigit nak yili-o” luk yak tij-o.

¹⁴ Yosoloma, Ndaut-nen at eyabu wanugwi nap Yerusalem worali ereba na oboksa yak ondosolar-e: ”Nir-e Apsalom inggem-nen kwiye mbururag-e, nir-e o yu me keya buruk mbururak iri na ndag-o. Yanem-et lobok yosolar-e, muk neneyasolat urugwe nggwe rak nunpuwa-o. Iri yosolar-e, Yerusalem woragwi nab-e oboksa unduwa naru yanem-et kwiye mburuwog-o” luk yak indij-o.

¹⁵ Yak ondosoloma, it-nen onggo yogolar-e: ”Nir-e Nagawan kat-nen kindi peragun langgal luk nag-o” luk yak tiga-o.

¹⁶ Iri luk Nagawan Ndaut na-ge at ama woragwi nap oboksa min at eyabu wanugwi nap oboksa min nduguluk mbirij-o. Alat nde, at ndegel ubugwi kweyap enpe sepulu ereya nak perak Nagawan woraso sa o yik karok keya inpij-o.

¹⁷ Nde, Nagawan Ndaut-nen nduguluk iri na-ge o siri keya buruk mborogolar-e, o worok siyem iri na eralu ndong yiga-o.

¹⁸ Iri yogolar-e, Nagawan eyabu wanugwi nab-e at eralu ponok nggwe mendak woragola-ge, san ombo Ndaut nduguluk nugwi nap ereba na-ge at eram obo nesa keya buruk mbiriga-o. Mborogolar-e, san ombo Nggat-nen Ndaut imbirik lobok yidnak na enpe enam ratus (600) ereba inmin-et at eralu irit obo nesa keya buruk mbiriga-o.

¹⁹ Iri kwarogola karug-e, Ndaut-ner san ombo enpe enam ratus (600) ereya na lit unpuruk noso nap onowe Itai iri na yak tosolar-e: ”Noluk-nen kat tet ninmin lobok yusu-o? Kar-e tuguruk mburugundik nagawan ngget men yusu iri imin wolmin-o. Kar-e elem nin nap kuwi keya buruk kibil lobok yidnak nap-nen yusu-o.

²⁰ Kar-e nggeret lobok yigendik yu me kwara woragit lag-et nde, an-nen: ’An nimin yeba waring tenak wolmog-o’ yak kururag-e meya-o. Nde, an na iri me mburusu-o luk il kwarag-e lak me, kar-e kat kene bem san ombo ereba inmin-e tuguruk mberer-o. Nde, Nagawan Indo-ge tugup lak irit kat kabuwa kasolat wolmag-o” luk yak tij-o.

²¹ Yak tij-et nde, Itai-nen onggo yosolar-e: ”Nagawan kek tak wa-e. Nagawan Indo Uruk nak Woraso min nap kat min kenarik konowag-o. Kar-e wat momtak sa mborosola-t nde, ndegel koboso nap an-e mondok keya kibimin pug-o. Kimin-et mbirimin-o” luk yij-o.

²² Yosoloma, Ndaut-nen yosolar-e: ”Iri ala-ge, ob-o. Mburuwog-o!” yak tosola-ge, Itai-nen idnak san ombo onkwela inmin-et lambinik mbiriga-o.

²³ Nde, Ndaut-nen lit karuk ap kere ereba na mborogola-ge, Yerusalem woragwi nap sa nggwa mbiga-o. Iri yogola-ge, Ndaut-nen lit karuk ap ereba na oboksa inmin-e Yi Kitoron mbara ndil lagolar-e, nembaga ambigit nggwe mbiriga-o.

²⁴ Nde, tepan ombo Sandok min Abiyatat min-e Lewi nap Nagawan Indo-nen idnak urul pidnak wene labu mbarak waruk mbitli ereba na inmin woraiga-o. Nde, urul pidnak wene labu mbarak iri na-ge nggweyak ma purug-e, ap oboksa o siri iri na me-nen ndegera lobok yigit lak ma-ge kud tigit lak woraiga-o.

²⁵ Woragola, Ndaut-nen Sandok yak tosolar-e: ”Nagawan Indo-nen idnak urul pidnak wene labu mbarak iri-ge tuguruk Yerusalem pil mberer-o. Nagawan Indo-nen nde an Indingen tak nobosolar-e: ’Ndemeret tuguruk mbiri-o’ yak nuruwama, lobok yimindik, Nagawan Indo-nen idnak urul pidnak wene labu mbarak iri min at woraso o lije iri min-e kamin-er-o.

²⁶ Alat nde, Nagawan Indo-nen nde an nde isili rak nobosolat na at nak-nen kwat nubuwa-o” luk yak tij-o.

²⁷ Yosoluk, Ndaut-nen wene erep min-et Sandok yak tosolar-e: ”Kat-nen kambara Agimas min Abiyatat ambara Yonatan min inmin tuguruk o silmu mburugupndik kindiyabu wolmer-o.

²⁸ An-e yi mbarugwi sa nembaga ereba me pak tak woralar-e, kit-nen wene pil lobok yugup nak kolak woramin-o” luk yak tij-o.

²⁹ Yak tosoloma, tepan ombo Sandok min Abiyatat min na-ge urul pidnak wene labu mbarak iri na-ge tuguruk Yerusalem waruk mbirigarik, iri me woraiga-o.

³⁰ Iri yogola-ge, Ndaut min at imin mbitli nap oboksa-nen unuwok sum yonggora keya buruk, inndi puru yogolat-nen pugwi mende enanggul pem pil lobok luk, Saitun Ndobo iri bem laiga-o.

³¹ Nde, ap-nen yak togolar-e: ”Agitopel min-et Apsalom ambigit mbirij-o” yogola karuk, Ndaut-nen tepan yosolar-e: ”Nagawan Indo wa-e. Agitopel-nen nggomo yak tuwa ereba-ge ebe lak yaga keya bi-o” luk yij-o.

³² Laigarik, ndobo yengen pem ap-nen Nagawan Indo erembel wanugwi sa wok yosoma-ge, Ndaut anggam indi kundik Areki nap Usai usum na ndelep ndalep tak, nggweyak anggul pem ndugud tak irit Ndaut imin lid pid yij-o.

³³ Iri yosola, Ndaut-nen Usai yak tosolar-e: ”Kat nde an nimin tak pugundig-e kar-e an nebem angin tak pugun-o.

³⁴ Alat nde, kat nde tuguruk o ma mborosola-ge, iri-ge yongga norosolar-e, kat-nen mburugundik Apsalom iri yak tosolar-e: ’An-e nanduk kat keid eyabu wanosolat tugup lak woraso iri na nggal-et yawo-ge kat keyabu wanimin-o’ luk yak turag-o. Iri nggal kwarosolar-e, kat-nen-e Agitopel-nen nggomo yak tuwa wene-ge oboksa ebe lak tak pugun-o.

³⁵ Nde, tepan ombo Sandok min Abiyatat min na iri me-t wolma-o. An woraso sa iri me-nen kulugun wene oboksa-ge kat-nen-e it mberen ereya-t yak undurag-o.

³⁶ Nde, Sandok ambara Agimas min Abiyatat ambara Yonatan min-e ineidtak inmin-et wolma-o. Nde, kat-nen kulugun wene-ge oboksa li mberen ereya yak undugunmu, wene waruk an neram wirik unpugun na-e” luk yak tij-o.

³⁷ Yak tosoloma, Ndaut anggam Usai iri na-ge Yerusalem mbiridnggal-e, Apsalom na Yerusalem wok yosoma, ndak ndak irit wok yil mbirij-o.