2 SEMUEL 14 - Nanduk Ngget Tul Pidnak Wene

Yoap-nen Apsalom tuguruk pil lobok yuwakluk tu kore yidnak wene 14:1-24

¹ Nde, Ndaut-nen indi Apsalom ebem worasu iri na Yoap-nen karug-e,

² kwe Tekoa kwe indi nggat nggat worak mbi inggi wil ap wirik enpamu, kwe iri na lobok yosola, Yoap-nen kwe iri na yak tosolar-e: ”Kar-e tabun puruk woraso yuwakluk, tabun puruk woragolat-nen yurugwi sum yutluk, amburu onggo nggok pugwi-ge ndarurak pug-o. Kar-e indi kundik wat yosoma-nen tabun pem woragwi nggal-et kwarurag-o.

³ Iri kwatluk, Nagawan Ndaut eram mbururag-o. Mbutlug-e, yu nggal yurag-o” luk Yoap-nen-e kwe iri-nen yurak wene ereba na yak tij-o.

⁴ Yak tosoloma-ge, kwe iri na-ge Ndaut eram mbirij-o. Mberarik, Ndaut eram erare nggwe tud yosolat-nen yosolar-e: ”An-nen idnak nagawan wa-e. Yongga niri-o!” luk yij-o.

⁵ Yak tosoloma, Ndaut-nen yosolar-e: ”Noluk-nen yongga kururak yusu-o?” yij-o. Yosoloma, kwe iri na-nen yosolar-e: ”An-e kwe togwe narengge lag-o. Nde, an nun-e wat yamu-o.

⁶ Nde, nambararag-e ap nak mberen me, misik tarem-e enarikmu mbirigarik, yig nggogolar-e, ap nggari yurak lak me, misik-nen misik abu wirij-o.

⁷ Nde, yawo-ge an nowe nowot oboksa-nen an nimin sirid mbarogolat-nen yogolar-e: ’La anggam wirid iri-ge iminep wesera wok nindi-o. At wirid ondolma-t mondok wurul-o’ luk yogola, an-nen nde la misik iri wesera enndam posolug-e, an narig-et nowak losa labuk yurak ala karuk meya-o. An nun ondolma wigarurag-e irir-o luk nindi ebem wat tak iri na-ge yugwi rugwi rak purak yili-o” luk yak tij-o.

⁸ Yosoloma, Nagawan Ndaut-nen onggo yosolar-e: ”Iri wene-ge an-nen konimin-o. Mbiri nag-o” luk yak tij-o.

⁹ Yosoloma, kwe iri na-nen yosolar-e: ”Nap kek tak wa-e. Nap kat-nen kwarugun ereba-ge an min an nowe nowot min nenpem-nen yusu-o. Kat min kat kama woragwi na inmin kenpem-e lag-o” luk yak tij-o.

¹⁰ Yosoloma, nagawan-nen onggo yosolar-e: ”Ap mbi-nen kat kebem mbud yosola-ge, ap iri-ge an neram waruk lobok yurag-o. Iri kwarugunmu-ge, kat worasola-ge, abog-e mondok sil keyagit lak ma-o” luk yak tij-o.

¹¹ Yosoloma, kwe iri na-nen yosolar-e: ”Ap-nen nambara misik-nen nambara misik wirid iri na bem wene nggok yosolat nambara misik yu min-et wuruwa naru, nab-o. Kat-nen Nagawan Indo Kembal Pem Nagawan eram tepan yurag-o” luk yak tij-o. Yosoloma, Ndaut-nen yosolar-e: ”Mondok Nagawan Indo Uruk nak Woraso owag-o. Kat kambara iri-ge mondok we marig-et ter-o luk sil kujwa bug-o” luk yak tij-o.

¹² Yosoloma, kwe iri na-nen yak tosolar-e: ”Nap kek tak wa-e. Nab-o. An wene marig-et mbi yurak op, lak?” yosoloma, Ndaut-nen yak tosolar-e: ”Ob-o. Yi-o” yak tij-o.

¹³ Yosoloma, kwe iri na-nen yosolar-e: ”Kat kemndam nggwe-nen wirik posolar-e: ’An nambara iri-ge tuguruk lobok yurag-e lag-o” luk watsa yigen iri bem-e kar-et meya-o. Noluk-nen kar-e lugud tak iri nggal-e Mbal Pem Nagawan ilirak inmin kwarigen-o?

¹⁴ Nit oboksa-ge war-et mul-o. Nir-e yi sisiri bem kiril kaidnak tuguruk ndok wururak meya iri nggal-nen yusu-o. Mbal Pem Nagawan-nen na irit wat yidnak nab-e unluk tak unpuwa bug-er-o. Iri bem-e, nab-o. Mbo ibidnak nab-e tu kore yaga tuguruk ibil lobok yurag-o.

¹⁵ Nde, an-e ap-nen nebem kore yuwokluk yogola karuk, kat keram lobok yigi-o. Nde, an-nen yebet kasolar-e: ’At imin wene yurak perak ndak-nen yusu-o’ luk nindi-ge wat tak puruk lobok yigirik, wene yak korosoma-ge, nene kulugun kasu-o.

¹⁶ Nde, an-nen yebet kasolar-e, ap iri-nen an nambara min nundurak tu kore yusu-t nde, kat-nen-e an-nen nggi yak kirigi wene kuluruk ninmiri-t yugun-o luk yebet kasu-o. Nde, at-nen yebet kagolar-e, Mbal Pem Nagawan-nen at ilirak tembesa wok indidnak nggweyak iri na me-nen wirik inpimin-o luk yebet kasu-o.

¹⁷ An nindi-nen-e nap kar-e Mbal Pem Nagawan-nen idnak aid nap nggal iri-ge meya kagi, nde, iri-ge konak kagi luk lombonoso me, kat-nen urul pigen iri-ge nimiri-t yugun-o luk perasu-o. Nde, nap kar-e Nagawan Indo Kembal Pem Nagawan-e kimin wolmag-o” luk yak tij-o.

¹⁸ Yosoloma, Nagawan Ndaut-nen yosolar-e: ”An-nen wene misik kin wok kobosola-ge, onggo-ge ndemeret mot mot nak yurag-o” luk yak tij-o. Yosoloma-ge, kwe iri na-nen yosolar-e: ”Yi-o, nab-o” luk yosoloma-ge,

¹⁹ Ndaut-nen yosolar-e: ”Kar-e Yoap-nen kibil lobok yamu, lak?” luk yak tij-o. Yosoloma, kwe iri na-nen onggo yosolar-e: ”Kat karik worasu kowag-o. An-nen lag-o luk yubul purag-e meya-o. Nab-o. Ndemerer-o. An-nen yurak wene min an-nen kwarurak wene min-e Yoap-net yak neramu-o.

²⁰ Alat nde, at-nen iri kwarid iri-ge wene iri kona ndama lak tak purak pem-et kwarij-o. Nde, nap kar-e Mbal Pem Nagawan-nen idnak aid nap enaru nggal, kwat yusu mende oboksa iri-ge mondok karu-o” luk yak tij-o.

²¹ Iri luk, Nagawan Ndaut-nen Yoap wene mbo uburuk-nen yak tosolar-e: ”Kat-nen kindi perasu iri-ge kwarimin-o. Kar-e mburugundik, Apsalom iri waruk lobok yi-o” yak tij-o.

²² Yak tosoloma-ge, Yoap na-ge Ndaut eram erare nggwe tud yij-o. Iri yosolat-nen yosolar-e: ”Nab-o. Nagawan Indo-nen imbiringgat tak kubuwag-o. Yawo-ge ndegel koboso nap an-nen nggi yak kirigi-ge nene-t kolosola karuk, kar-e an-e kindingen-et neyasu-o luk yebet kasu-o” yak tij-o.

²³ Iri yak turug-e, Yoap na-ge o Nggesut wi Apsalom iri na inggi wil mberarik, waruk Yerusalem ibil lobok yij-et nde,

²⁴ Ndaut-nen-e: ”Apsalom iri na-ge an woraso sa iri me wolmomtag-e lag-o. An-nen yik kudtak na mondok nimbir-o” luk Ndaut-nen yij-o. Iri yosola karug-e, Apsalom iri na-ge Ndaut eram wok yigit lak, nok ama nggwe mbirij-o.

Apsalom Ndaut imin wene kona lambuk tak inpidnak wene 14:25-33

²⁵ Nde, Apsalom iri-ge ebe mondok tenaga men yidnak me, Isarael nap oboksa-nen erembel wanogolat woraiga-o. It ennggendumu-nen ap misiger-o luk at nggal mbi mondok lag-o. At iri-ge ijok mok kuri-nen anggulsu kuri-ge ebem ambut lak irit woragij-o.

²⁶ Anggulsu-ge mondok nggok me, angin ala karug-e, olengen ndak wosa pempa mbal tenak woraso-o. Nde, anggulsu mbarak ereba na nagawan-nen angin ndak wurugwi mende bem ndak worogolar-e, dua kilo ombol nggwe-o.

²⁷ Nde, Apsalom iri-ge ambararag-e kenan irit woragij-o. Nde, ara-ge erare mondok konak unu-ge Tamat irit woragij-o.

²⁸ Nde, Apsalom na-ge Yerusalem iri me worasolar-e, olengen mberen woragij-et nde, Nagawan Ndaut imin-e lambuk yigit lag-o.

²⁹ Nde, misik tarem-e Apsalom-nen-e Yoap iri na-ge Nagawan Ndaut eram wirik peyekluk yonggo ibij-et nde, larok yij-o. Larok yosoma, tugurug-et wene mbo bij-et nde, iri na Yoap-nen-e lobok yurak larog-et yij-o.

³⁰ Iri ala karuk, Apsalom-nen at ndegel ubugwi nap ereba na yak ondosolar-e: ”An neyabu inggi nggwe Yoap eyabu jelai mbato uwi yagid iri-ge kenaru iri nar-o. Iri ala-ge, mburugupndik kan per-o” yak indij-o. Yak ondosoloma-ge, it yeba na-ge kan pil-et mbiriga-o.

³¹ Kan pikma, Yoap na Apsalom eram lobok yosolar-e: ”Noluk-nen ndegel kubugwi nap yeba-ge an neyabu kan piga-o?” luk yak tij-o.

³² Yak tosoloma, Apsalom-nen onggo yosolar-e: ”An-nen yimin wene waruk Nagawan eram mburugundik yak tonokluk wene mbo kibigi-t nde, kar-e larok yosola karuk-nen kan pikma-o. Nde, iri-ge yu yak turak nde yigi-o: ’An-e o Nggesut worayek lag-et nde, no amanggim-nen an-e tuguruk yu me lobok yigi-o?’ yak ti-o” luk yij-o. Yosoluk wene erep yosolar-e: ”Ndak an Nagawan eram wok yek-nen kamawi kundugundik tu kore yi-o. An nde meya yoso nab-et yik neyasola-ge, mondok nururag-e ndak-nen yusu-o” luk yij-o.

³³ Yosoloma-ge, Yoap iri na-ge Nagawan Ndaut eram mbirij-o. Mberarig-e, Apsalom-nen yid wene ereba na Ndaut yak tij-o. Yak tosoloma-ge, Ndaut-nen-e Apsalom iri na wene mbo obosola, Apsalom iri na lobok yosolar-e, Ndaut eram erare nggwe tud yosola-ge, Ndaut-nen-e paluksa wa yak tij-o.