2 SEMUEL 12 - Nanduk Ngget Tul Pidnak Wene

Natan-nen Ndaut wene yak tosola, Ndaut-nen niri nera-o luk yidnak wene 12:1-15a

¹ Iri na kwatluk ombol nggwe-ge Nagawan Indo-nen-e Mbal Pem Nagawan ene lomboksa yoso nap Natan na-ge Ndaut eram wirik pamu, Ndaut eram mberarik-nen yak tosolar-e: ”O siri misik me-ge ap mberen mbi woraiga-o. Woragolar-e, misig-e arengge worak, nde, misig-e arengge lak irit woragolar-e,

² arengge kwarat worak nap iri na-ge olomba min owam erep min-et kwarat irit woragij-o.

³ Nde, ap arengge lak iri na-ge olomba wam misiget nak onggo puruk, ilirak inmin ama irit imin woralar-e, nunggwi mende-ge it-nen nunggwi ereb-et mak tosolat, yi na at-nen naso embe arem-et mak tosolat, nene yosolar-e, ap iri na urugom-et nene yosolat, iri kwat tenak woragij-o. Nde, wene iri nggaruksa yosolar-e, at ondomok ara kwat ibidnak nggal-et kwat obosolat woragij-o.

⁴ Worasoma-ge, arengge worak nap iri na eram-e ap ngguru mbi lobok yij-o. Iri yosola-ge, ap arengge kwarat iri na-nen-e ap ngguru iri na amanggim olomba wam min elembu wam min wururag-e keya buruk, ap arengge lak nap iri na arengge olomba amarik iri na nde worarik, ap ngguru iri na amanggim sagij-o” luk yij-o.

^5-6 Iri yosola, ap arengge kwarat iri na-nen kwaridnak wene iri na kulurug-e, Ndaut na-ge isilepma kwarat yosolat-nen yosolar-e: ”Ap arengge kwarat iri-ge abur-e mondok meya-t kagi-o! Mondok Nagawan Indo Uruk nak Woraso owag-o. Ap iri-ge lomba marik iri onggo posolar-e, empat pem nambena puruk, ebe-ge mondok wururag-o” luk yij-o.

⁷ Yosoloma, Natan-nen Ndaut yak tosolar-e: ”Ap iri-ge kar-er-o! Nagawan Indo Isarael nap Enmbal Pem Nagawan-nen kat yak korosolar-e: ’Kar-e an-nen Isarael nap enanggul pem nagawan mendak kobosolat, Saul-nen kereyekluk yosola, kimiri yosolat kwarukmu-o.

⁸ Saul-nen tena woraso wi min ogwela min-e an-nen kat wok kurukmu-o. Iri-nen an-net kar-e Isarael nap min Yewura nap min enanggul pem nagawan tak kubukmu-o. Nde, ereba nde te nggal ala-ge, mondok ereba nggal nag-et mberen pem nambena wok ketleb-o.

⁹ Noluk-nen kar-e an-nen kebem pidnak wene-ge tarusu-o? Noluk-nen kar-e meya kwarosolat, Uria iri na-ge wuruwakluk wim abi bem ibil ler-o yigenma wiriga-o? Kar-e Amon nap-nen wuruwakluk keya ibigen-o. Iri rak puruk ogwe iri na-ge kar-et wanigen-o!

¹⁰ Kar-e an-nen yidnak keya buruk, Uria ogwe wanidnak me, kat-nen wigarak lolo pem woragolar-e, ereb-e san pem ondogolat wolma-o.

¹¹ Mondok ndemeret yak kurusu-o. Kat kama woragwi nap enpem-net anggun panggun tak kuburak mende-ge kebem pil lobok yimin-o. Nde, an-net kogwerag-e kat kerengen pem-et waga nin nap wok undumu, kerengen pem mo bem-et ap-nen inmin wolma-o.

¹² Kar-e we mbik mbok meya kwarigen-et nde, an-nen kwarosolar-e, nam-et Isarael nap enlengen pem-et kwarimin-o’ yij-o” luk yak tij-o.

¹³ Yosoloma-ge, Ndaut-nen Natan yak tosolar-e: ”Ndemeret an-e Nagawan Indo imbiri bem mondok meya-t kwarigirig-o” luk yij-o. Yosoloma, Natan-nen yosolar-e: ”Nagawan Indo-nen-e kat-nen meya yidnag-e amberam tak pij-o. Kar-e wat yugun pug-o.

¹⁴ Alat nde, iri kwarosolat kar-e Nagawan Indo mbilaro ngin tak pidnak pem-e kambara ngget nderak iri-ge wat ma-o” luk yak tij-o.

^15a Iri yak turug-e, Natan iri na-ge ama mbirij-o.

Ndaut ambara wat yidnak wene 12:15b-23

^15b Iri lug-e, Ndaut ambara Uria ogwe togwe Mbatseba-nen ndagid liap yu na-ge Nagawan Indo indi-nen pidnak pem-et kugi wirij-o.

¹⁶ Worosoloma-ge, la iri na ki rak puwakluk Ndaut-nen-e Mbal Pem Nagawan emengen mbarosolat woralar-e, nunggwi mende na ninggit lak, pempa kubu-ge at nene yoso sa kune bem tag-et mbiringgik nak woragij-o.

¹⁷ Iri kwasa worala karug-e, at woraso sa woragwi ap yok nggok ereba na mborogolar-e: ”Kat iri kwarusu-ge meyog-o. Men min-o” yak tidnag-et nde, ene kola keya bosolat, nunggwi mende na it inmin norak iri na ninggit lak yosolat irit kwarosolat woragij-o.

¹⁸ Iri kwat tenak minggu misik worarug-e, la yu na-ge wat yij-o. Wat yosoloma-ge, Ndaut ndegel ubugwi nap ereba na-nen yogolar-e: ”La iri we kugi worak nak worala perak nde, nit-nen wene yak tidnag-e koloso buk me, ambara iri wat yidnak wene-t nde kuluwarig-e, ambikpebe wat kurujwa-o” luk yogolar-e, la wat yidnak wene iri na-ge yak turag-e kwiye irit yiga-o.

¹⁹ Iri yogolat, at ndegel ubugwi nap yeba na-nen yagap yagap wene yogola karug-e, at-nen yebet kasolar-e: ”La yu na-ge war-et yamu kagi-o” luk yenggerak pij-o. Iri luk at-nen it kin wok onposolar-e: ”La iri na-ge wat yamu, lak? Ngge kwarag-o?” luk yak indij-o. Iri yosoloma-ge, it-nen yogolar-e: ”Nab-o. Wat yamu-o” luk yak tiga-o.

²⁰ Iri yogoloma-ge, Ndaut men yosolar-e, aboro matluk, anggulsu erok ngatluk, sum ngget konak yutluk, Nagawan Indo ama Nagawan Indo erembel wil mbirij-o. Iri luk tuguruk at woraso sa lobok yosolar-e: ”Nunggwi mende wok niril lobok yer-o” yamu, nunggwi mende saga eram pogola, nunggwi mende ninggij-o.

²¹ Iri kwarosola karug-e, at ndegel ubugwi nap ereba na-nen at yak togolar-e: ”La iri na uruk worala-ge, mondok nunggwi mende-ge ninggit lak, ubud nak yip tenak woraigen-et nde, wat yosoloma-ge, kar-e men yosolat nunggwi mende nasu yu-ge nir-e nenaru bug-o” luk yak tiga-o.

²² Yogoloma, Ndaut-nen onggo yosolar-e: ”Nagawan Indo-nen nabuwa karuk, la iri-ge Nagawan Indo-nen ki rak puwa-o luk-nen la iri kugi worak worala-ge, nunggwi mende ninggit lak, tepan yosolat woragi-o.

²³ Alat nde, yawo-ge no amanggim-nen wat yidnak ombol nggwe-ge nunggwi mende ninggit lak wolmomtag-o? An-nen tuguruk uruk tak pimin-a? Abok na an-e at worasu iri me-ge mbirimin-et nde, at perak an neram-e lobok yuwa bug-o” luk yak indij-o.

Salomo ndagidnak wene 12:24-25

²⁴ Abok nggwe-ge Ndaut-nen ogwe Mbatseba iri na indi yanggona keya buruk, imin woralar-e, kwe Mbatseba-nen-e liap misik ndagamu, Ndaut-nen-e unu-ge Salomo irit yarij-o. Nde, Nagawan Indo-nen-e la iri na-ge abuwa-t kasolat woragij-o.

²⁵ Nagawan Indo-nen la iri na abuwa kasoma, Nagawan Indo-nen la iri na unu yaruwakluk, Natan ebem pamu-ge, la iri na unu-ge Yerija yarij-o.

Ndaut-nen o Araba mengga wanid wene 12:26-31

²⁶ Ereba na kwarogola-ge, Yoap iri na-ge Amon nap unuwi siri iminepma Araba iri na me inmin wim mbarosolar-e, o siri iri na-ge mondok mengga wanurak irit panggo yij-o.

²⁷ Woralar-e, Yoap-nen wene waruk Ndaut eram ap wirik onposolat-nen iri me kwatli wene ereba na enpem posolar-e: ”An-e Araba nap inmin wim mbarosolat, o siri iri me yi kenanggugwi sa abu wanigi-o.

²⁸ Nde, yawo-ge o siri iri nde an-nen mengga wanumu-ge, ap-nen an nunu luk, at eresa-nen mengga wanidnag-o luk an nunu ki rak puwa naru, kar-e nit-nen idnak san ombo erep iri me worali ereba lit unpuruk lobok yugundik, kat-nen o siri yu mengga wanurag-o” luk yak tij-o.

²⁹ Yosoloma, Ndaut-nen-e san ombo erep ereba na oboksa ndok wat unpurug-e, o siri Araba enpem mbud yosolar-e, urugwe nggwe rak inpij-o.

³⁰ Ndaut-nen-e nagawan-nen pugwi topi o iri me nagawan iri na-nen poso topi iri na wanarik, at pij-o. Nde, topi iri na angin-e tiga pulu lima (35) kilo. Nde, topi iri na bem-e kerep abinal worak misik pidnag-o. Nde, Ndaut-net o siri iri me woraso yi mende ndi mende oboksa wim kugun pem wanij-o.

³¹ Nde, ereb-e iri me woragwi nab-e kugun pem ndegel unpuruk mborogolar-e: ”E ngarugwi nggere nggere min posid tege min posid min-et waner-o” yak endamu, waruk mbirigarig-e, ap ereba na-ge o wururak nggweyak konugwi sa nggweyak kerep konuwakluk inpil lobok yosolar-e, iri nggal-et kwasa Amon nap o siri nin me nin me worali ereba na iri nggal-et kwasa enpem pil lobok yij-o. Iri rak unpurug-e, Ndaut min Isarael nap san ombo oboksa min tuguruk Yerusalem mbiriga-o.