2 SEMUEL 11 - Nanduk Ngget Tul Pidnak Wene

Ndaut min Mbatseba min-nen kwaridnak wene 11:1-27

¹ Pempa woragolar-e, nagawan nagawan-e toro wok yidnak tarem worarug-e, wim timbiril mburugwi me-ge, o toro wok yidnak tarem iri na worarug-e, Ndaut-nen-e wim timbiril mburuwakluk Yoap iri na wirik obosola-ge, Isarael nap san ombo onowe ereba na min san ombo erep ereba na min irit Amon nap inmin wim mbatluk, Amon nap urugwe nggwe rak unpuruk, o siri Araba iri na leget waniga-o. Alat nde, Ndaut iri na-ge Yerusalem woragij-o.

² Nde, misik tarem-e keyama nggwe-ge Ndaut na nene luk men yosolar-e, at uwi ngguwa mbirik yamuk tak ereba na bem waring kil nosolat-nen yik kagaidnggal-e, kwe mondok konak mbi aboro marosola, yik kagaij-o.

³ Yik karug-e, Ndaut-nen-e: ”Kwe iri-ge ta-o?” luk kin wanuwaklug-e, ap enpem pij-o. Posoloma-ge, it-nen yogolar-e: ”Iri-ge Mbatseba-o. Nde, eid unu-ge Eliam-o. Nde, un-e Et nap Uria iri nar-o” luk yak tiga-o.

⁴ Yogoloma-ge, Ndaut-nen-e: ”Kwe iri na-ge waruk lobok yer-o” yamu, waruk lobok yiga-o. (Nde, Mbatseba iri na-ge kwami karuk, ombol nggwe-ge mbektak wolmokluk-nen kwarugwi mende kwatluk-nen lobok yij-o.) Nde, kwe na-ge Ndaut-nen imin nene yamu, kwe iri na-ge ama mbirij-o.

⁵ Nde, siyak woralar-e, kwe iri na-ge abila alama-ge, iri na wene-ge Ndaut eram wene wosa pil lobok yij-o.

⁶ Kulurug-e, Ndaut-nen-e ndag-et nak wene Yoap amanggim posolar-e: ”Et nap Uria iri-ge ndag-et nak an neram lobok yuwag-o” luk wene wosa pil mbirij-o. Pil mberamu-ge, Yoap-nen-e Uria iri na-ge Ndaut eram pil mbirij-o.

⁷ Iri yamu, mberarig-e, Ndaut eram wok yij-o. Wok yosola, Ndaut-nen kin wok obosolar-e: ”Isarael nap san ombo min Yoap min-e ngge kwarak worali-o? Nde, wim-e ngge kwatli-o?” luk kin wanij-o.

⁸ Iri yak turuk, Ndaut-nen Uria yak tosolar-e: ”Nab-o. Kar-e kama mburugundik, siyak kababok kwasa kama wolmin-o” yak tosoloma, Uria na Ndaut eram-nen mborosola-ge, Ndaut-nen-e silobulo siyak Uria ama wirik pil mbirij-o.

⁹ Alat nde, Uria na-ge mborosolar-e, o siri pak tumende bem Ndaut-nen idnak san ombo tumende pak tak worali ereba na inmin nde nene yij-o.

¹⁰ Iri yosola kulurug-e, Ndaut-nen Uria kin wok obosolar-e: ”Kar-e erepma-nen lobok yigen-et nde, noluk-nen kama mbirigit lak yusu-o?” yij-o.

¹¹ Yosoloma, Uria-nen onggo yosolar-e: ”Isarael nap san ombo min Yewura nap san ombo min urul pidnak wene labu mbarak iri na-ge inmin woralat, wim-e mondok kwiye worak nggogolat, nde, nit-nen idnak san ombo nonowe nggok Yoap min at indipma wim wari ereba na inmin-e o lije-ge karu me wirigarik woragola-t nde, an-e nomok worak kwasa nama mbirimindik, nunggwi mende nasolat, nogwe imin nene yosolat kwarimin-a? Mondok nenarik nonowag-o. An-e mondok iri kwarimin pug-o!” luk yij-o.

¹² Yosoloma, Ndaut-nen yak tosolar-e: ”Kababok kwarosolat yawo-ge yu me wolmin-o. Nde, kup-nen an-nen mbiri-o yak kirimin-o” yak tosoloma-ge, iri na tarem-e Uria na-ge Yerusalem woragij-o. Nde, kup-nen-e nunggwi mende norak Ndaut-nen yonggo ibij-o.

¹³ Yonggo uburuk, nunggwi mende nonggolar-e, Ndaut-nen inndi nden kaso yi kwarat wok tosola, nasolar-e, indi nden kagaij-o. Alat nde, iri na tarem kubu nggwe na Uria na-ge ama-ge mbirigit lag-er-o. Are, ap san ombo pak tumende yik karok woragwi ereba na enma embem sum yemara nene-t yij-o.

¹⁴ Iri ala karug-e, kub-e Ndaut-nen-e Yoap amanggim engga mbara keya burug-e, Uria inggem puruk, wirik pij-o.

¹⁵ Engga iri na arem wene ebe mbarosolar-e: ”Nde, Uria iri-ge wim abi bem mondok pinde kwiye worak lambu yoso sa nggal-et purag-o. Iri rak purug-e, arig-et poksa keya buruk kenpe-ge inggi mbara mbururag-o. Iri rak pugupmu, mondok wuruwag-o” luk mbarij-o.

¹⁶ Nde, o iri na kut wanogolar-e, Uria na-ge Yoap-nen-e wim nap kalu kalu woragwi sa iri na me wim abi bem pil mbirij-o.

¹⁷ Nde, wim nap o silmu nggwe-nen kuwaluk wagolar-e, Yoap iri na owosirak inmin enpem kore yogolar-e, Ndaut-nen idnak san ombo onowe erep min ondogolat, Uria iri na min-et wiriga-o.

¹⁸ Iri yogola-ge, Yoap-nen-e wim iri na wene-ge ab-e wene waruk Ndaut eram wirik ibij-o.

¹⁹ Wirik obosolat-nen ebem wene posolar-e: ”Ndaut-nen nde wim wene yu kulurug-e,

²⁰ isilepma luk kin wok kubuwa nde ma-o. Iri yosolat, at-nen yosolar-e: ’Noluk-nen kir-e o silmu korok korok mbirigepndig-o? Wim nap enmare-ge kerep pak leget anggul pem-nen mbisingsa mare-ge pil mbuma-o lug-e kenaru bug-a?

²¹ Nde, Abimelek Nggireyon ambara iri na-ge o Tebes iri me-nen wiriga iri na-ge kir-e kinndi meme rak pigepndik, lak? Nde, Abimelek iri-ge kwe-net nde, nggandum mbato yugurugwi kerep pem pak anggul pem-nen wosa mberak pil mbid iri na-t nde, noluk-nen kerep leget ereba korok korok mbirigeb-o?” luk nde Ndaut-nen yak korosola-ge, ’Kat-nen idnak san ombo Uria min-et wiriga-o’ luk yak turag-o” luk yak tij-o.

²² Yak tosoloma mberarik, Ndaut eram wok yosolar-e, Yoap-nen ebem pidnak wene ereba na-ge Ndaut yak tij-o.

²³ Yak tosolar-e: ”Wim nab-et mondok enmawi kondogolar-e, o silmu-nen mondok kuwaluk lobok yogolat, karu me-nen nenpem kore yiga-o. Iri yogola-ge, nir-et neneyak linggirik puruk, nenmawi kondogolar-e, pak tumende bem maga wirik inpil mbirige-o.

²⁴ Iri yukmu, pak anggul pem-nen mare wosa mberak ninpil lobok yogolar-e, kat-nen idnak san wari erep min-et ondogolat, Uria min-et wiriga-o” luk yak tij-o.

²⁵ Yosoloma, Ndaut-nen ap wene waruk lobok yid iri na yak tosolar-e: ”Wim iri nggogolar-e, at iri wat ma-o luk nenaru-nen-e nggwigit lak me, Yoap iri indi kabak yuwa naru indi uwi yaburag-o. At yak tosolar-e: ’Wim iri-ge mondok enpem-et korerenak worakmu, wim nab-e urugwe nggwe rag-et unpuruk-nen keya unpurag-o’ yak ti-o” luk yak tij-o.

²⁶ Nde, kwe Mbatseba iri na-ge un iri na wiridnak wene kulurug-e, tabun puruk woragij-o.

²⁷ Nde, tabun puruk woragwi tarem woraruk ombol nggwe-ge Ndaut-nen-e kwe Mbatseba iri na-ge inggi wil ap wirik enpamu, waruk at woraso sa lobok yikma-ge, kwe iri na-ge Ndaut-et wanij-o. Wanuruk, waneya siyak worasoma-ge, liap misik ndagij-o. Alat nde, Nagawan Indo-nen-e Ndaut-nen kwarid iri na-ge mondok isili rak puruk irit woragij-o.