2 SEMUEL 1 - Nanduk Ngget Tul Pidnak Wene

2 Semuel Ndaut-nen Saul wat yidnak wene kulidnak wene 1:1-16

¹ Nde, Saul iri na wat yosoloma-ge, Ndaut na-ge Amalek nap unduruk, urugwe nggwe rak unpurug-e, tuguruk lobok yosolar-e, mberen pem o Siklak iri me woragij-o.

² Worasoma-ge, kub-e ap sujwe misik wim nggogolat-nen Saul woraso sa iri na me-nen lobok yij-o. Lobok yosolar-e, indi kalok yogolat tabun puruk woragolat-nen kwarugwi kwarosolar-e, usum ndela keya buruk, nggweyak anggul pem ndatluk Ndaut eram wok yosolar-e, Ndaut eram erare nggwe irit tud yij-o.

³ Iri yosola, Ndaut-nen at yak tosolar-e: ”Kar-e ngge me-nen lobok yusu-o?” luk yak tij-o. Yosoloma, at-nen yosolar-e: ”Nab-o. An-e Isarael nap wim nggogolat-nen woragwi sa-nen an-e mengga lobok yusu-o” luk yak tij-o.

⁴ Yak tosoloma-ge, Ndaut-nen kin wok obosolar-e: ”Ereba-nen kwaridnak wene yi-o” yosoloma, ap sujwe iri na-nen yosolar-e: ”Nit Isarael nap san ombo-ge maga ndi rak nonpogolat, ereb-e indiga-o. Iri yogolar-e, Saul min-et Yonatan min et indiga-o” luk yak tij-o.

⁵ Yosoloma, Ndaut-nen kin wanosolar-e: ”Saul min Yonatan min wat yiga wene iri-ge kar-e nggesa-nen karu yigen-o?” luk yak tij-o.

⁶ Yosoloma, at-nen yosolar-e: ”An-e ndemeret Ndobo Nggilmboa bem woralat-nen yik kaginggal-e, wim nab-e wim koma bem min kura wam ombolwak pem min Saul iri na wuruwokluk lop lop worogola-ge, ar-e erege iri na bem watsa nggulal yosola kagi-o.

⁷ Iri yosolat-nen erengen ombol nggwe nden kaga yik kagaidnggal-e, an neyarug-e, wene mbo nobosoloma, an-nen yosolar-e: ’Nab-o. No-o?’ yosolakmu,

⁸ at-nen kin wok nobosolar-e: ’Kar-e ta-o?’ yosoloma, an-nen yosolar-e: ’An-e Amalek nab-o’ luk yosolakmu-ge,

⁹ at-nen an yak norosolar-e: ’An-e mondok mare worak me, mondok wat yekluk yusu me, ndak lobok yugundik niri-o’ yak nirij-o.

¹⁰ Yosoloma, an-nen lombot piginggal-e, abu amawi lak me, mbud lug-e, men momtag-e mondok meya, wat momtag-et kagi-o. Iri ala karuk, an-nen wirigi-o. Wutlug-e, nagawan at-nen poso topi iri na-ge anggul pem-nen yonggora wanuruk, manggo erabit pem iri na yonggora wanuruk, keram waruk lobok yigi yur-o” luk yak tij-o.

¹¹ Wene iri na kulurug-e, Ndaut na-ge indi puru yosolar-e, Ndaut min at imin nugwi nap min unsum ereba na-ge ndela bela keya biga-o.

¹² Iri rak purug-e, Ndaut iri na at imin nugwi nap inmin-e iri tarem-e Saul min Yonatan min Nagawan Indo ilirak Isarael nap erep ereba na inmin-et indidnak me, nunggwi mende ninggit lak, yip nggu lek tenak iri-net ndamuk yij-o.

¹³ Iri luk Ndaut-nen ap sujwe wene waruk lobok yid iri na yak tosolar-e: ”Kar-e no nab-o?” yak tosoloma, at-nen yosolar-e: ”An-e Amalek nab-et nde, kit kinmin yeba worasor-o” luk yak tij-o.

¹⁴ Yak tosoloma, Ndaut-nen at yak tosolar-e: ”Kar-e Nagawan Indo-nen mendak ibidnak nap nagawan-et nde kwiye lag-et wirigen yu-ge ijar-o!”

¹⁵ Yosoluk, at imin nugwi nap ereba na misik yak tosolar-e: ”Wururag-o” luk yak tij-o. Yosoloma, Amalek nap sujwe iri na-ge wirij-o.

¹⁶ Wereyekluk-nen Ndaut-nen ap sujwe iri na yak tosolar-e: ”Kat kondomok-nen yosolar-e: ’Nagawan Indo-nen lenak pidnak nap iri na wirigi-o’ luk para yidnak me, kat kondomok-nen kwarigen pem-et onggo wat min-o” luk yak tij-o.

Ndaut-nen Saul min Yonatan min unpud yip tidnak wene 1:17-27

¹⁷ Iri na kwatlug-e, Ndaut-nen-e Saul min Yonatan min enpem yip lilan wanosolar-e, ndawi yu yij-o.

¹⁸ Nde, at-nen-e: ”Ndawi yu-ge Yewura nap mirik unpurag-o” luk yak indij-o. (Nde, ndawi yu-ge engga Yasat arem mbarak worasu-o.) Ndaut-nen ndawi yosolar-e:

¹⁹ ”Isarael wa-e. Kondobo ereba bem kensan wari-ge wat yij-o. Mondok kensan ombo kwiye lak kalu kalu ereba na-ge nggweyak ma rak inpiga-o.

²⁰ Iri wene-ge Nggat iri me wigarurak pug-o. Askelon tula tula ereba me yil nurak pug-o. Pilisin ligwami enalin enalen kagu-o. Mbal Pem Nagawan enaru buk ligwami enalin enalen lek kagu-o.

²¹ Ndobo Nggilmboa wa-e. An nene kuli-o: Kwiye lak kalu kalu iri na undumno-ge iri me abu mbo bidnak me, Saul undumno iri na-ge tuguruk amburu ndarigit lak pase tam yusu me, lilangen min talme min-nen piri rak kubugu-o. Keneyabu-ge merek leyaga labuk mag-o.

²² Yonatan amare we-ge lobok yoso bug-o. Ondoso nag-o. Saul eyalawi-ge enabuwa-ge yoso bug-o. Wim nab-e ondosolat, inmin sirid nab-e lak tak onposolat kwaroso-o.

²³ Nde, Saul min Yonatan min-e mondok konak nak kwarogola, ap-nen inndi kundik-nen yili-o. It enmbereg-e unluk wolmomtak pem-nen na irit, wat momtak pem-nen na irit mondok inndi misiget nak woragwi-o. Towe ud iri-ge ndag-et nak mboroso-t nde, it enmberek-nen mburugwi-ge terak minik-net yusu-o. Singa ndakngge amawi-ge worag-et nde, it enmawi-ge terak minik-net yusu-o.

²⁴ Isarael kweyap wa-e. Saul nagawan iri na ubud-nen tabun per-o! At-nen-e kunsum leyok sum mimi konak nak yesa wok kondosolat, emas abinal worak onggo nggok pugwi bem kinmirik kunmuruk konposolat yij-o.

²⁵ San wari kalu kalu ereba na-ge lerasa mbiga-o. Wim silmu-t mbud yiga-o. Yonatan-e ndobo bem wim silmu-t lerasa mbij-o.

²⁶ Nanggam Yonatan wa-e. Kar-e an nimin-e konak nak yoso me, an-e mondok nindi abi kalok yusu-o. Kat-nen nebem kindi kundik woraso-ge mondok nggok-nen yusu-o. Kwami-nen inndi ap enpem pugwi iri-ge te-t nde, kat-nen an nebem kundik woraso iri-ge mondok nggok-nen yusu-o.

²⁷ Isarael nap wim wari kalu kalu ereba na-ge lerasa mbogolat, it ensan ereba na-ge ebe lak mende nde kwasa labuk yij-o” luk yij-o.