2 PETERUS 1 - Nanduk Ngget Tul Pidnak Wene

Wa yak indidnak wene 1:1-2

¹ Yesus Kerisut ndegel oboso nap, at-nen wirik nibidnak nap, Simon Peterus an-nen-e. Nenmbal Pem Nagawan min Ninmiri Yoso Yesus Kerisut min-nen-e lud tak nak kwaroso elem na bem-e kit kinndi angin tubu yuwakluk wok kondosolar-e, kit kinndi angin tubu yigep iri-ge nit ninndi angin tubu yige iri na nggal-et iminep mbarak irit wok kindid nap kenmanggim engga yu mbarusu-o.

² Kir-e Mbal Pem Nagawan min Nenagawan Indo Yesus min kenaru yigep pem-e, we wok ondoso elem min yamuksa woragwi elem min kobongsa wok kunduwag-o.

Mbal Pem Nagawan-nen wene mbo unpuruk, len inpid wene 1:3-15

³ Nir-e at ondomok unu kek tak woraso min at lud tak nak kwaroso min at imin winde yuwakluk wene mbo ninpid nap na nenaru yidnak pem nir-e Mbal Pem Nagawan indi konak-nen kwaroso na ndak kwaruwakluk, Mbal Pem Nagawan-nen idnak amawi-nen-e yi mende ndi mende pidsa wok nindid irir-o.

⁴ Iri nggal kwasa Mbal Pem Nagawan-nen urul posolar-e, wene mondok ija, nggulok lombok irit urul yak nindij-o. Nde, kit-nen urul pidnak iri wanogola-ge, nggweyak ma yu-nen ukwe ukwe yugwi mende na inggem-nen wesel yogolat, Mbal Pem Nagawan abage wanili-o.

⁵ Iri bem-e, kir-e kwara kenmawi kondogolar-e, kit kinndi angin tubu yidnak min lombok tak pogolar-e, konak nak kwarugwi mende lambuksa waner-o. Nde, konak nak kwarugwi mende min lombok tak pogolar-e, enaru yugwi mende na lambuksa waner-o.

⁶ Nde, enaru yugwi mende min lombok tak pogolar-e, kondomok-nen kinndi tena woragwi na lambuksa waner-o. Nde, kondomok-nen kinndi tena woragwi na min lombok tak pogolar-e, kinndi tugup lak woragwi na lambuksa waner-o. Nde, kinndi tugup lak woragwi na min lombok tak pogolar-e, Mbal Pem Nagawan-nen kwaroso nggal kwarugwi irit lambuksa waner-o.

⁷ Nde, Mbal Pem Nagawan-nen kwaroso nggal kwarugwi na lombok tak pogolar-e, konowe konowosi enabuwa kagwi na lambuksa waner-o. Nde, konowe konowosi enabuwa kagwi na min lombok tak pogolar-e, ap pidsa enabuwa kagwi elem lambuksa waner-o.

⁸ Iri mende iri pidsa-ge kit-nen tena wolmomtak mende irir-o. Nde, iri mende iri kit kenpem wok tenak woragolar-e, kir-e Nenagawan Indo Yesus Kerisut kenaru yogolar-e, kenmawi min-et ebe worak mende irit kenaru yugwi rak puwa-o.

⁹ Alat nde, iri mende iri wanigit lak nab-e at erengen ngguru, lumu kumu rak me, at nanduk-nen meya yosolat woraidnak na marak ibidnak iri-ge meme rak pusu-o.

¹⁰ Nanggamirak wa-e. Iri bem-e Mbal Pem Nagawan-nen wene mbo kunpuruk, len kinpid iri na bem tugup lak worabokluk, mondok kwara kenmawi konder-o. Kit nde iri nggal kwarogolar-e, kunuwok pijaksa wosa mbugup pug-o.

¹¹ Iri kwarak woragola-ge, Nenagawan Indo Ninmiri Yoso Yesus Kerisut-nen tenagaidnak wi, pem-et woralik nalik wolmomtak wi iri me nggurak nap ndak tak kunpuwa-o.

¹² Iri bem-e wene abam yu-ge kenaru luk, ndemeret wene wanigep na bem kinndi tugup lak worali-t nde, pempa yeberak konposolat woramin-o.

¹³ Wene abam yu yeberak kunpurag-e an neyabu-t me, an nuruk woralar-e, yeberak konposolat woramin-o.

¹⁴ Nde, Nenagawan Indo Yesus Kerisut-nen nam-et nak yak niridnak me, siyag-et nak woraruk, naboro yu-ge keya bimin-o.

¹⁵ Nde, an wat yumu wene yu pempa kit yeberak konposolat wolmaklug-e, an-e ndemeret namawi kundusu-o.

Kerisut-nen kek tak woraso iri-ge nam-et nenlengen-nen kaige-o 1:16-21

¹⁶ Nde, Nenagawan Indo Yesus Kerisut na amawi min lobok yurak wene min yak kindige iri-ge, tisiya ap inndi-nen mbela enesiget yugwi nggal yak kindili-ge lag-o. Are, Yesus Kerisut-nen kek tak woraso iri-ge nit nenlengen towelengen-nen kaige-o.

¹⁷ Eid Mbal Pem Nagawan-nen Yesus kek tak paga nggok tak obosolar-e, Mondok Abinal worak Kek tak Nap-nen at imin yosolar-e: ”Yu-ge an Nambara nindi kundik-nen yusu-o. At ebem an nalen kasu-o!” luk nit ninmbiri bem-et yosola, kulige-o.

¹⁸ Nir-e at imin marak ndobo iri me worakmu-ge, ene na aid arem-nen pil mbuwasola-ge, neneyanggo-nen kulige-o.

¹⁹ Iri bem-e, Mbal Pem Nagawan ene lomboksa yugwi nap-nen yidnak wene na-ge kwara nenaru yili-o. Nde, urul pidnak wene na-ge ndamuk woraso sa tal pago pidnak nggal-nen yusu-o. Nde, tal iri amare irit worasoma, o nda yosolat o nda nda wonaru pil wasolar-e, kit kenarem yaya rak purak iri na yik karok woragolar-e, kir-e wene iri na kwara yebet kagolat wolmomtag-e ob-o.

²⁰ Alat nde, wene owak ndum yu-ge yebet yebet tak wolmer-o. Mbal Pem Nagawan engga bem abok-nen kwat momtak urul paga pidnak wene iri-ge ap inndi-n yebet kaidnak pem nak ap mul undurak pug-o.

²¹ Nde, Mbal Pem Nagawan engga bem abok-nen kwat momtak urul paga pidnak wene iri-ge ap inndi-n pidnak pem-e mondok mbarigir-e lag-o. Are, Konak Indi nak-nen mul ondosola, ab-e Mbal Pem Nagawan-nen yidnak wene ap yak undugwi-o.